Bikʼcạrko 2:14 - সান্তালী বাইবেল

¹⁴ Ona iạte Probhu Isor do Israelko luluṭkoakʼ tireye jimạyetʼko tahẽkana. Onko do onkoakʼ jiniskoko luṭetʼ tahẽkana. Uni do onkoren beṛhaeten bạiriakʼ tireye jimạyetʼko tahẽkana, ar onate bạiriko upạrte bako teṅgo daṛeakʼkan tahẽkana.

Bikʼcạrko 2:14 Referans Kwoze

2 Rapajko 17:20

Ona iạte Probhu Isor do sanam Israelkoe nihạ̃t giḍiketʼkoa. Uni do harket sasetreye dohoketʼkoa ar luluṭkoakʼ tireye jimạkatʼkoa, ar mucạtʼre acʼ samaṅ khone ocokʼ giḍikatʼkoa.

Dosar Biboron 32:30

Mitʼ hoṛ do cekate hajar hoṛkoe lagakoa, ar bar hoṛ ńelte cekate gel hajar hoṛko ńir pharakokʼa, onkoakʼ asray buru bạirikoakʼ tire onko bae ạkhrińleko khan, ar Probhu Isor hõ bạirikoakʼ tire onko bae soprot leko khan?

Bikʼcạrko 10:7

Ona iạte uni do onko cetanre edrete pit caṛhaoadea ar Philisṭiko ar Amonrenkoakʼ tireye jimạkatʼkoa.

Bikʼcạrko 4:2

Onate Probhu Isor do Jabin ńutuman mitʼṭen Kanani rajakʼ tire onkoe jimạkatʼkoa. Jabin do Hasor khon raje calaoetʼ tahẽkana. Uniren senaputiyakʼ ńutum do Sisera tahẽkana. Uni do Harosetreye tahenkan tahẽkana.

Levitikus 26:37

Bako laga ocokʼre hõ lạṛhại khon bańcaokʼ lạgitʼ ńir pharakokʼ hoṛ leka am iń lad ludko bhindạṛokʼa. Ar ape do bạiriko samaṅre bape teṅgo daṛeakʼa.

2 Bõsbudạ 36:16

Menkhan onko do Isoren kol hoṛkoko landa-dhutʼako kan tahẽkana, ar onkoakʼ kathako chi baṅakʼ kan tahẽkana ar uniren nạbikoko ṭiṭkạriyetʼko tahẽkana. Mucạtʼre Probhu Isorakʼ edre do uniren hoṛko upạrte caṛhaoena; ar rukhiyạ ńam lạgitʼ jãhãn hor do ar baṅ tahẽlen takoa.

Jirimiạ 37:10

Okoe Babelren lạṛhại phạdko apeko akromonetʼpe onko jodi sanamkope bhagaoko ar onkoren eken hạ̃n akan hoṛko tạmbureko tahen, enḍekhan onkoge oḍok hecʼkate niạ nagraha do seṅgelteko ḍahao maraoa.

Jesaea 50:1

Probhu Isore meneda, “Eṅgamakʼ bapag dolel do okare menakʼa, one okaṭakʼteń bạgikede? Ińren mahajonko modre okoe ṭheniń ạkhriń akatʼpea? Apeakʼ kại iạtege ape dope ạkhriń akana; apeakʼ behokakʼ lạgitʼge aperen eṅgam doe bạgi ocoakana.

Sereńko 44:12

Am do begor damtege amren hoṛkom ạkhriń akatʼkoa; ar noa iạte cetʼ amakʼ jãhãnakʼ lab hoyakantama?

2 Bõsbudạ 15:5

Onako dinre jãhãte oḍok calakʼ ar hijukʼre jãhãn sulukge baṅ tahẽkana, ente sanam jaegare ạlmạlge tahẽkana.

Bikʼcạrko 1:34

Amoriko do Dan gusṭiren hoṛko buru ṭoṭhareko aṭok dohoketʼkoa; bilạn ṭạnḍite do bako pheḍ ocowatʼkoa.

Bikʼcạrko 1:19

Probhu Isor do Jihudạ gusṭiren hoṛko sãoteye tahẽkana. Onko do buru ṭoṭhakoko hatletʼgea, menkhan bilạn ṭạnḍiren hoṛko do bako laga ńir daṛeatʼkoa, ente onkoakʼ do mẽṛhẽtʼ reakʼ rãt gạḍiko tahẽkantakoa.

Dosar Biboron 28:58

“Noa puthire olakan ạn-ạriko joton salakʼpe senakʼte ona lekape colon, metakʼme ‘aperen Probhu Isorakʼ ṭhonokte perecʼ ar botoranakʼ ńutum bape manot,

Dosar Biboron 28:25

“Probhu Isorgeye nonkaea jemon ape do aperen bạiriko samaṅrepe bhagao ocokʼ. Ape do mitʼ horte jhãpe ema menkhan onko do eae horteko dạṛ pạnḍuja. Dhạrtiren eṭakʼ sanam rajosṭiren hoṛ do apeakʼ halot ńelte botorteko keklesedokʼa.

Dosar Biboron 28:20

“Bạṛicʼakʼko kạmi iạte Probhu Isor do apeakʼ sanam kạmireye sarap apea, uni do ḍamaḍol ar nisṛạuge apereye kola, ar onatepe heṛ idikʼa ar thoṛa okte khangepe marao utạrokʼa.

Numeri 32:14

“Ape kạiyanko do, aperen baba hapṛamko bodoltepe upel akana ar Probhu Isorakʼ edre seṅgel do Israelko cetanre arhõpe sarsao ocoakatʼtaea.

Levitikus 26:28

enḍekhan raṅgaote ape upạrteń colona ar apeakʼ kại reakʼ eae doboṛiń sạjạipea.

Bikʼcạrko 2:20

Ona iạte Probhu Isor do Israelko cetanre edreteye menkeda, “Nokoren hapṛamko okaṭakʼ iń bondobosatʼko tahẽkan ona do noko bako manao akada ar ińakʼ katha hõ bako ańjom akada.

Bikʼcạrko 3:12

Israel hoponko do Probhu Isorakʼ mẽtʼre oka bạṛicʼakʼkan onage arhõ kạmiko ehopʼena. Onate Probhu Isor do Israel hoponko upạrte Moabren Eglon raje daṛe ocokedea.

2 Rapajko 13:3

Ona iạte Probhu Isor do Israel upạrte pit caṛhaoentaea; ar uni do Aramren raj Hasael ar uniren hopon Benhadadakʼ tire ghane ghạṛicʼe soprotetʼko tahẽkana.

Nehemiạ 9:27

Onatege am do bạirikoakʼ tirem jimạletʼkoa ar bạiriko do onkoko santaoetʼko tahẽkana. Onkoakʼ kosṭo oktere onko do am ṭhenko rakʼ homoretʼ tahẽkana ar am do serma khonem ańjomletʼtakoa. Amakʼ maraṅ daya iạte onko bańcaoko lạgitʼ hoṛkom kolletʼkoa. Ar bạirikoakʼ ti khon onkom bańcaoketʼkoa.

Levitikus 26:17

Iń do mẽtʼ ar mẽtʼteń ńelpea ar bạiriko ṭhenpe bhagao ocokʼa. Ar hirkhạwape hoṛge apeko ḍanṭaopea ar celege bako khudạupere hõ ape dope ńir baṛaea.

Numeri 32:13

Israelko cetanre Probhu Isorakʼ edre do rakapʼena ar uni samaṅre bạṛicʼko kạmikan sanam hoṛko ạuriko marao cabakʼ hạbicʼ pongel bochor hạbicʼ uni do hahaṅkarreye ạcur baṛaletʼkoa.

2 Samuel 24:1

Probhu Isor do arhõ Israelko cetanre pit caṛhaoentaea. Uni do onko upạrte Dạude uskurkedeteye metadea, “Am do senkate Israel ar Jihudạren hoṛkom lekhakoa.”

2 Bõsbudạ 28:5

Ona iạtege Probhu Isor do Aram rajakʼ tire uniye jimạkadea. Aramrenko do uniko bhagaokedea ar uniren ḍher hoṛko bondiketʼkote Damesekteko idiketʼkoa. Uni hõ Israelren raj Pekawakʼ tireye jimạ ocoyena. Israelren raj do uniren ạḍi utạr hoṛkoe gocʼketʼkoa. Remaliạ hopon Peka do mitʼ dinte Jihudạren mitʼ lakh bargel hajar lạṛhại phạdkoe gocʼketʼkoa, ente Jihudạren hoṛko do akoren hapṛamkoren Probhu Isorko bạgi giḍi akade tahẽkana.

Sereńko 44:11

Samaṅe lạgitʼ tiyạkʼ idiye bhiḍi leka onkoakʼ tire am dom aṛakʼ akatʼlea ar eṭakʼ eṭakʼ jạtrenko talarem chirchạtur akatʼlea.

Jesaea 42:24

Jakob do luṭe lạgitʼ okoeye soprot akadea? Ar Israel do luluṭkoakʼ tire okoeye jimạ akadea? Unige cetʼ Probhu Isor doe baṅkana, one uni upạrte bon kại akatʼ? Unkin do uniyakʼ horte calakʼ bạkin khojleda, ar uniyakʼ hukum hõ bạkin manaoleda.