2 Samuel 21:12 - সান্তালী বাইবেল

¹² Unre Dạud do Jabes-Gileadren hoṛko ṭhen khon Sạul ar uniren hopon Jonathanakʼ jaṅkoe ạgukeda. Philisṭiko do Gilboare Sạulko gocʼkede khan unkin bana hoṛakʼ mạ̃ṛĩ do Bet-San nagraha reakʼ khạrạireko ṭaṅgaoleda. Jabes-Gileadren hoṛko do onḍe khon onakin mạ̃ṛĩko kombṛo ạguakatʼ tahẽkana.

2 Samuel 21:12 Referans Kwoze

Josuạ 17:11

Isakar ar Asren gusṭikoakʼ simạna tala reakʼ Betʼ-Sean, Iblean ar onako aḍepase reakʼ sanam atoko do Manase gusṭirenkoko emoco akan tahẽkana. Ona chaḍa Dorren, En-Dorren, Tanak ar Magidoren hoṛko sudhạ niạko nagraha ar onako aḍeparen sanam atoko Manase gusṭirenko emocoakan tahẽkana. Ar mucạtʼ secʼ reakʼ pea nagraha ar onako sãoteakʼ atoko do buru ṭoṭhare tahẽkana.

1 Bõsbudạ 10:1

Mitʼ dhao Philisṭiko do Israelko sãoteko lạṛhạiyena ar Israelko do onko samaṅ khonko dạṛkeda. Onko modre ḍherkoge Gilboe burure Philisṭiko hoteteko gocʼ ocoyena.

2 Samuel 1:21

E Gilboa reakʼ buruko, apere sisir ar jạṛi dakʼ do alo baṛe ńurokʼma, ape talare abal ot reakʼ anaj baṛgeko hõ alo baṛe tahenma; ente onḍege birbanṭa hoṛkoakʼ ḍhal do bemanotakʼ hoyakana, Sạulakʼ ḍhalre sunum ojokʼakʼ do ar baṅ hoyokʼa.

2 Samuel 1:6

Uni koṛa doe menkeda, “Iń do unre Gilboa reakʼ burureń tahẽkana ar Sạul do acʼakʼ borlomre ṭenḍarkateye teṅgo akan tahẽkana. Ar un jokhecʼ rãt gạḍi ar aswariko doko khudạu tiyokʼ idiyedekan tahẽkana.

1 Samuel 31:1

Philisṭiko do Israelko tulucʼko lạṛhạiyena ar Israelko do onko samaṅ khonko dạṛkeda. Onko modren ḍherkoge Gilboa burure Philisṭiko hoteteko gocʼ ocoyena.

1 Samuel 28:4

Philisṭiko do mitʼ sãoteko jarwa mitʼente Sunemreko ḍerayena. Ar Sạul hõ Israelren sanam lạṛhại phạdkoe jarwaketʼkote Gilboa burureye ḍerayena.

1 Bõsbudạ 10:8

Dosar hilokʼ Philisṭiko do gocʼ hoṛkoakʼ jinisko luṭ idijoṅ lạgitʼko hecʼen khan Gilboa burure Sạul ar uniren hoponkoakʼ mạ̃ṛĩ do giḍi akanko ńelkeda.

1 Samuel 31:3

Ona tayom Sạul upạrte lạṛhại do artetʼ sạrdi idiyena. Dhinkiạko hõ uniko ńamkedea arko hạnkedea.

1 Samuel 31:4

Unre Sạul do acʼren khanḍa bhanḍa asenicʼ hoṛe metadea, “Amakʼ tarwaṛe oḍokkate ińakʼ hoṛmo sobokʼ tabme. Ar baṅkhan onko bin khatna hoṛko hecʼkateko bemanotińạ.” Menkhan uniren khanḍa bhanḍa asenicʼ hoṛ do bae rebenlena, ente uni do ạḍitetʼ botor caṛhao akawade tahẽkana. Unre Sạul do acʼakʼ tarwaṛe cetanreye bhindạṛena.

2 Samuel 21:11

Sạulren chuṭki era Aya hoponera Rispa okae cekakan ona do Dạudko lạiyadea.

2 Samuel 21:13

Dạud do onḍe khon Sạul ar uniren hopon Jonathanakʼ jaṅkoe ạgu ocokeda. Ar sanam hoṛko samaṅre okoeko gocʼ ocolen onkoakʼ jaṅ hõko halaṅ jarwakeda.

2 Samuel 2:4

Unre Jihudạren hoṛko do Hebronteko hecʼena ar Dạud do Jihudạ gusṭiren raj menteko ojokʼ bahalkedea. Hoṛko do Dạud niạ sombatko lạiyadea, Jabes-Gileadren hoṛge Sạul doko topa akadea.

1 Bõsbudạ 10:12

Unre onḍenko lạṛhại birbanṭa hoṛko do senkate Sạul ar uniren hoponkoakʼ mạ̃ṛĩ do Jabesteko ạgukeda. Ar Jabes reakʼ ela dare buṭạre onkoakʼ jaṅkoko topakada ar eae din hạbicʼko upạskeda.