2 Bõsbudạ 22:9 - সান্তালী বাইবেল

⁹ Ona tayom uni do Ahasiạ sendraye lạgitʼe oḍokena. Ahasiạ do unre Samariạreye oko akan tahẽkana ar hoṛko do uniko sapʼkedete Jehu ṭhen idikateko gocʼkedea. Arko topakadea, ente onkoko metade tahẽkana, “Nui do Jehosaphat ren goṛomtetʼ koṛa kanae uni do goṭa ontorte Probhu Isorakʼ sana lekae calakʼkan tahẽkan.” Ar Ahasiạwakʼ bõsre raj hoyokʼ leka ektiạri do okoeyakʼge baṅ tahẽkana.

2 Bõsbudạ 22:9 Referans Kwoze

2 Bõsbudạ 22:8

Jehu do tinre Ahabakʼ bõsren hoṛkoe sạjạiyetʼko tahẽkana unre uni do Ahasiạren gokʼṛoko Jihudạren mukhiyạko ar uniren sanam boehakoren hoponkoe ńelńamketʼko khan onkoe gocʼketʼkoa.

2 Bõsbudạ 21:20

Jehoram do pegel bar bochor umerre raje hoylena ar irạl bochor Jerusalemre raje calaokeda. Uniyakʼ gujukʼre okoe hõ bako duklena. Ar Dạudakʼ nagrahare uniko topakadea menkhan rapajkoakʼ topare do bako baeledea.

2 Bõsbudạ 21:17

Onko do Jihudạrenko akromonketʼkoa ar onḍe bolokate raj oṛakʼ reakʼ sanamakʼ jinisko, Jehoramren hoponko ar uniren bạhukoko bondi idiketʼkoa. Uniren huḍińicʼ hopon Jehoahas chaḍa ar celege bako sarecʼlena.

2 Bõsbudạ 21:4

Jehoram do acʼ apattetʼakʼ rajosṭi apnar gobolreye ạguketʼteye keṭecʼkeda. Uni do acʼren sanam boehako ar Israelren adom adom lạṭu hudạren hoṛkoe gocʼketʼkoa.

1 Rapajko 14:13

Israelren sanam hoṛ do uni lạgitʼko rakʼ homora arko topakaea. Jerobiamren nijạr hoṛko modre eken unigeye topa ocokʼa, ente Jerobiamakʼ bõsre eken uniren hopontetʼ cetanrege Israelren Probhu Isor do bhuktiye ńelakada.

1 Rapajko 13:21

Ar unre uni nạbi do Jihudạ khon hecʼakan Isorren hoṛ ãṭ aṛaṅteye metadea, “Probhu Isor do niạ kathae meneda, am do Probhu Isorakʼ katham bebatao akada ar Probhu Isor emakʼ hukum bam manao akada.

2 Rapajko 9:34

Ona tayom Jihu do bhitrite senkateye jom-ńũkeda. Uni doe menkeda, “Uni sarapicʼ maejiu do topaye reakʼ bebostaepe, ente uni do rajren hoponerae tahẽkana.”

Jirimiạ 29:13

Ape do ontorte baḍaeyiń reakʼ tinrepe ahkaokʼa unre ińpe baḍae daṛeạńạ.

2 Bõsbudạ 19:3

Tobe amre thoṛa bhageakʼ hõ menakʼa, ente am do disạmren Asera-muṭhạnkom marao giḍi akatʼkoa ar Isorakʼ sana leka calakʼ lạgitʼ amakʼ monem keṭecʼakada.”

2 Bõsbudạ 24:25

Ar Aramrenko do Joas raj ghạlgeko bạgi oṭoadea. Joas do naeke Jehoyadaren hopone gocʼ ocoledete uniren gutiko hõ uni upạrte soṛojontrokate aṭetʼregeko gocʼkedea. Are gocʼen khan uni do Dạud nagrahareko topakadea, menkhan rapajkoakʼ topare do bako topaledea.

2 Bõsbudạ 25:27

Amasiạ do Probhu Isorakʼ hor khone ocokʼen khan hoṛko do Jerusalemre uni upạrteko soṛojontrokeda. Onate uni do Lakisteye dạṛkeda, menkhan hoṛko do Lakhiste hoṛ kolkate onḍeko gocʼkedea.

2 Bõsbudạ 33:24

Amonren kạmiyạko do uni upạrteko soṛojontroketʼte raj oṛakʼrege uniko khũnkedea.