1 Samuel 29:6 - সান্তালী বাইবেল

⁶ Unre Akis do Dạud hohoadeteye metadea, “Jiwetʼ Probhu Isor ńutumteń metamkana, ińiń baḍaea am dom soṛa hoṛkana. Noko lạṛhại phạdko talare oḍok bolokʼ do iń nońjorre boge kangea. Amem hecʼen hilokʼ khon teheń hạbicʼ amre jãhãn behokakʼ do bạń ńelakada, menkhan eṭakʼ rapajko amre kusi do bạnukʼkoa.

1 Samuel 29:6 Referans Kwoze

2 Rapajko 19:27

Menkhan am do okarem tahenkana ar tinrem hijukʼ kana arem calakʼ kana ar cedakʼ iń upạrtem raṅgaokʼkana ona jotogeń baḍaea.

2 Samuel 3:25

Am do Nerren hopon Abnerem baḍae akadegea; uni do am sãote cholkate amakʼ khoj khobor hatao ar cetʼkom ceka kana ona baḍae joṅ lạgitʼe hecʼlena.

Sereńko 121:8

Probhu Isor do din hilokʼe horho jaṅgemea, ńit khon jaejug hạbicʼge.

1 Samuel 20:3

Menkhan Dạud do arhõ kiriạkateye menkeda, “Abenren baba do bhagetegeye baḍaea aben do ạliń ben dulạṛetʼ lińạ. Onate pasecʼ uni do mone moneteye hudiseda, Jonathan noa babotre baṅ baḍae ocoyege bhagea, ente uni do duke ńama. Menkhan jiwetʼ Isor ńutumte ar abenakʼ jiwetʼ leka ạliń ar gujukʼ talare do eken mitʼ taṛamge pharak menakʼa.”

1 Patras 3:16

Apeakʼ bibek do sapha dohoytape, jemon Mạsiren hoṛ lekate apeakʼ bhage colon iạte okoeko oktawape onko do lajaoreko paṛaokʼ.

1 Patras 2:12

ente onako do aperen Jiu upạrteye lạṛhại kana. Okoe Isor bako baḍae akade onko talare ape do dhoromte colonpe jemon bedhoromko menteko dusạulepere hõ apeakʼ bhage kạmi ńelte ar bicạr dinre apeakʼ ona kạmiko iạte Isorko sarhaoe.

Mathae 5:16

Onkage apeakʼ marsal do hoṛko samaṅre jolokʼtapema, jemon apeakʼ bhage kạmi ńelte aperen sermaren Babako sarhaoe.

Jirimiạ 12:16

Mitʼdin onko do ińren hoṛko Bakʼal debota ńutumteko kiriạ ocoletʼkore hõ enhõ jodi ińren hoṛkoakʼ horteko taṛam ar ‘Jiwetʼ Probhu Isor ńutumteko kiriạkʼ, enḍekhan onko do ińren hoṛko talareko benao rakapʼa.

Jesaea 65:16

Disạm talare jãhãe hoṛ ạsirbade khoj uni do sạriạkʼren Isor ṭhengeye khoja; ar disạm talare jãhãegeye kiriyạkʼ uni do Isor ńutumtegeye kiriạkʼa; ente hoṛ do lahateakʼ kosṭoko hiṛińa ar ińakʼ mẽtʼ samaṅ khon ona do danaṅokʼa.

Jesaea 37:28

Menkhan am do okarem tahen kana ar tinrem hijukʼkana arem calakʼkana ar cedakʼ iń upạrtem raṅgaokʼkana onako joto doń baḍaegea.

1 Samuel 29:3

Onko ńelte Philisṭikoren subedar doko kuliyana, “Noko Israelko do nonḍe cedakʼ menakʼkoa?” Akise menkeda, “Nui do Israelren raj Sạulren golam Dạud kanae. Nui do ḍher din ar bochor khon iń ṭhen menaea. Uni do Sạule bhiṅgṛạu akade tayom khon teheń hạbicʼ unire jãhãn dosge bạń ńam akada.”

1 Samuel 28:10

Unre Sạul do Probhu Isor ńutumte kiriạkateye menkeda, “Jiwetʼ Isor ńutumteń metam kana, niạ iạte am cetanre cetʼ sạjạige baṅ hijukʼa.”

Josuạ 22:30

Ruben, Gad ar Manase gusṭiren hoṛko do naeke Phinehas ar Israel manḍerren mukhiyạko, metakʼme Israel bõskoren mathako okaṭakʼko metatʼko onate onko doko kusiyena.

Dosar Biboron 10:20

Ape do aperen Probhu Isor ḍobokʼaepe ar unige sewawaepe; unirege jamaṛ akan tahenpe ar uni ńutumtege kiriạkʼpe.

Genesis 16:6

Abram do Sạriye roṛ ruạṛadea, “Ńelme, amren kạ̃ṛmĩ do amakʼ tirege menaea. Am oka bhagem hudisetʼ onage onkaeme.” Unre Sạri do Hagar cetanre santaoe ehopʼkeda onate Hagar do uni ṭhen khon ńir pharakokʼ hoyentaea.

1 Samuel 5:8

Onate onko do hoṛ kolkate Philisṭikoren sanam disạm cakʼlaoko mitʼ ṭhen hoho ạgukateko kuliketʼkoa, “Israelkoren Isorakʼ sinduk dobon cekaea?” Onkoko menkeda, “Israelkoren Isorakʼ sinduk do Gad nagrahate idikʼma.” Onate Asdodren hoṛ do Israelkoren Isorakʼ sinduk do Gadteko idikeda.

1 Samuel 29:7

Onate am do ruạṛ calakʼme; ar nonkan jãhãnakʼ alom kạmiya one onate Philisṭikoren rapajko am cetanre bekusi aloko tahen.