1 Samuel 19:24 - সান্তালী বাইবেল

²⁴ Uni do acʼakʼ kicricʼe totʼketʼte Samuel samaṅre nạbi lekate Isorakʼ katha roroṛe ehopʼena. Uni do goṭa siń ar goṭa ńindạ kicricʼ chaḍageye tahẽyena. Ona iạte hoṛko mena, “Sạul hõ cetʼ enḍekhan nạbiko modren mitʼhoṛ kanae?”

1 Samuel 19:24 Referans Kwoze

Mikạ 1:8

Noa iạte iń doń rakʼjoṅa ariń homora; iń do eken jaṅga uluṅgeń dãṛã baṛaea; iń do toyo ar utʼ cẽṛẽ rakʼ lekageń homora.

Jesaea 20:2

Ar oka bochore hatketʼ inạ bochorge Probhu Isor do Amosren hopon Jesaeae metade tahẽkana, “Amakʼ hoṛmo khon gõṛẽ kicricʼ ar jaṅga khon panahe bojme.” Onate Jesaea do koṭoge ar eken jaṅgageye dãṛã baṛaekan tahẽkana.

2 Samuel 6:20

Inạ tayom Dạud do acʼakʼ gharońjren hoṛko ạsirbad ako lạgitʼ tinreye ruạṛ hecʼena unre Sạulren hoponera Mikal do uni daram ạguye lạgitʼe oḍok hecʼena are menkeda, “Israelkoren raj teheń do cetʼlekae manotena! Uni do kharap hoṛko leka acʼren kạ̃ṛmĩko samaṅre hoṛmo reakʼ kicricʼkoe totʼ giḍiketʼtaea.”

Aposkạmi 9:21

Ar okoe uniyakʼ kathako ańjomketʼ onko sanamkoge hahaṛakʼ tulucʼko kulikan tahẽkana, “Nui do cetʼ uni doe baṅkana, one Jerusalemre Jisu ńutumte koejoṅkoe khedetʼko tahẽkan? Ar nonḍehõ okoeko onkayetʼkan onko tolkate maraṅ naekeko ṭhen idiko lạgitʼge cetʼ bae hecʼakana?”

2 Samuel 6:14

Dạud do Musnạ reakʼ ephod horokʼkate Probhu Isor samaṅre uniyakʼ sanam daṛete enejokʼe ehopʼena.

Numeri 24:4

Okoe hoṛ Isorakʼ kathae ańjometʼkan ar sanam daṛeanicʼ reakʼ dorsone ńeletʼkan, ar okoe do otreye ombakʼ hape akan ar okoe do mẽtʼ jhicʼ akantae,

1 Samuel 10:6

Unre Probhu Isor do acʼren jiuteye sarbharaomea, ar onate amhõ onko sãote nạbi leka katham roṛa. Ar eṭakʼ lekan hoṛem hoyokʼa.

1 Samuel 15:35

Sạmuel tinạkʼ din jiwetʼe tahẽkan unạkʼ din uni do Sạul sãote ar bae ńapamlena. Israelko cetanre Sạule rajkedete Probhu Isorakʼ duk reakʼe hoylente Sạmuel do uni lạgitʼe dukokʼ kan tahẽkana.

1 Samuel 18:10

Dosar hilokʼ Isor ṭhen khon mitʼṭen bạṛicʼ jiu do hecʼkate Sạul cetanreye jãpaṛena. Onate uni do acʼakʼ oṛakʼre bhitrireye chaṭ paṭao baṛaekan tahẽkana. Ar Dạud do eṭakʼ dinko leka uni samaṅre peṛesaṅ baname ehopʼena. Unre Sạulakʼ tire mitʼṭecʼ borlom tahẽkana.