1 Samuel 15:3 - সান্তালী বাইবেল

³ Ńitokʼ am do senkate Amalekiko tulucʼ lạṛhạime ar onkoakʼ cetʼko menakʼ ona jotowakʼem marao giḍikatakoa; onko do alom dayawakoa. Onkoren herel ar maejiuko, koṛa ar-kuṛi gidrạko, toa ńuńukan gidrạko, ḍaṅgra-biḍhiko, ũṭko, gadhako jotom gocʼ cabakoa.’ ”

1 Samuel 15:3 Referans Kwoze

Numeri 24:20

Amalekiko ńelte Biliam do Isorakʼ noa katha roroṛe ehopʼena: “Eṭakʼ sanam jạtrenko modre Amalekiko do maraṅko tahẽkana, menkhan onkoakʼ sesokʼ do maraokʼge hoyokʼa.”

1 Samuel 22:19

Ona tayom uni do naekekoakʼ ato Nob do tarwaṛeteye ńẽtʼkeda ar onaren herel hoponko, maejiuko, ńir keṭecʼ gidrạko, bale gidrạko, gadhako, ḍaṅgrako, bhiḍiko sudhạ tarwaṛeteye gocʼ cabaketʼkoa.

Numeri 31:17

Ńitokʼ do noko koṛa gidrạko ar tinạkʼ do herelakʼ mẽtʼãhãko ńelakatʼ nonkan joto maejiu do gocʼ giḍikakope;

Exodus 20:5

Onako do alom ḍobokʼakʼa, ar sewa hõ alom sewawakʼa, ente iń Probhuge amren Isor do. Iń do ińakʼ paona bhoktiń khojkana. Okoeko kurudạń onkoakʼ kại reakʼ sạjại do onkoren hoponko ṭhen pe pon piṛhi hạbicʼ iń pańja halawako kana.

Genesis 36:12

Esauren hopon Eliphasren do Timna ńutuman chuṭki erae tahẽkana. Ar Amalek do uniyakʼ kukhireye janamlena. Noko sanamkoge Esauren bạhu Adaren goṛom gidrạ kanako.

Exodus 17:14

Ona tayom Probhu Isor do Moseye metadea, “Noa lạṛhại reakʼ katha disạ dohoy lạgitʼ mitʼṭecʼ puthire ol dohokakʼme ar Josuạ metaeme, iń do dhạrti khon Amalekikoakʼ ńutumiń mohor meṭaotakoa.”

1 Samuel 14:48

Uni do birbanṭa leka lạṛhạikate Amalekikoe bhagaoketʼkoa ar luluṭkoakʼ ti khon Israelkoe rukhiyạketʼkoa.

1 Samuel 15:9

Menkhan Sạul ar uniren lạṛhại phạdko do Og jiwetʼko dohokedea ar Amalekikoren mońj mońj ḍaṅgrako, bheḍako, bạchurko ar bheḍa hoponko, metakʼme cetʼko bhageakʼ tahẽkan ona joto doko dohoana. Onako marao giḍikakʼ do bako rạjilena, menkhan okạjwạ ar rogako doko marao giḍikatʼkoa.

1 Samuel 15:18

Uni do mitʼṭecʼ kạmi lạgitʼe kolletʼmea are metatʼme tahẽkana, ‘am do senkate kạiyanko, metakʼme Amalekikom marao giḍikakoa. Onko ạuriko ḍahao maraokʼ hạbicʼ onko tulucʼem lạṛhạiya.’

1 Samuel 27:9

Dạud do jãhã ṭoṭharege jhãpe emetʼ tahẽkan uni do onḍenko herel ar maejiu jotogeye gocʼetʼko tahẽkana, ar onkoren bhiḍiko, ḍaṅgrako, gadhako, ũṭko ar onkoakʼ kicricʼ khạnḍwạkʼkoe luṭ ạguiyetʼ tahẽkana. Ar tinre uni do Akis ṭhene ruạṛ hijukʼkan tahẽkana unre Akise kulikan tahẽkana, “Teheń do okare luluṭem senlena?” Unre Dạud doe roṛ ruạṛetʼ tahẽkana, Negeb reakʼ Jihudạ ṭoṭhare, Jiramelikoakʼ ṭoṭha se Kenikoakʼ ṭoṭhateń senlena.

1 Samuel 30:17

Unre Dạud do enhilokʼ ạyupʼ bela khon ehopʼkate dosar hilokʼ ạyupʼ hạbicʼ onko sãoteye lạṛhạiyena. Onkoren cele hõ rukhiyạ do bako ńamleda, eken ponsae juạn koṛa do ũṭre decʼkateko dạṛ pạnḍucʼkeda.

2 Samuel 1:8

Uni doe kulikedińa, ‘am dom okoe kana?’ Unreń metadea iń do mitʼṭen, ‘Amaleki hoṛ kạnạń.’

Josuạ 10:39

Onko do ona nagraha, ar onaren raj ar ona reakʼ atokoko hatketʼte sanam hoṛko gocʼ cabaketʼkoa. Onko do onḍenko sanam jiwiyankoko marao utạrketʼkoa. Josuạ do celege jiwetʼ bae doholetʼkoa; uni do Libna ar onaren raj ar Hebron reakʼ oka dosae hoyocoletʼtae Debir ar onaren rajakʼ dosa hõ onkageye hoyocokeda.