1 Samuel 12:22 - সান্তালী বাইবেল

²² Probhu Isor do acʼakʼ maraṅ ńutum iạte acʼren hoṛko tisge bae bạgi daṛeakoa, ente uni do acʼakʼ sanatege acʼren hoṛe hoyocoakatʼpea.

1 Samuel 12:22 Referans Kwoze

Philipiko lạgitʼ Pạul apostolakʼ ciṭhi 1:6

Noa pạtiạu menakʼtińạ, apeakʼ ontorre okoe bhage kạmiye ehopʼakatʼ uni do Mạsi Jisuakʼ hijukʼ din hạbicʼ onae calao iditeye mucạda.

Sereńko 106:8

Enhõ uni do acʼakʼ ńutum khạtirte acʼakʼ maraṅ daṛe sodor lạgitʼe bańcaoketʼkoa.

Dosar Biboron 14:2

Ape do Probhu Isor ńutumte mitʼṭen begar akan jạtrenko kanape. Dhạrtiren sanam jạtrenko mod khon Probhu Isor do apegeye bachao akatʼpea jemon uniren ạidạri porjakope hoyokʼ.

1 Rapajko 6:13

Ar Israelko talareń girobasokʼa ar ińren hoṛ Israelko do bạń bạgi giḍikoa.”

Romiko lạgitʼ Pạul Apostolakʼ ciṭhi 11:29

Isor okae dan ar okoeye hohowae ona babotre acʼakʼ mon do bae bodoltaea.

Jirimiạ 14:21

Amakʼ ńutum rukhiyạitam lạgitʼ ale secʼ khon mẽtʼãhã do alom ạcurtama; amakʼ ṭhonokanakʼ siṅghạson reakʼ ṭhạ̃i do alom bemanot ocoya. Ale lạgitʼem bondobos akatʼ katha reakʼ baṛe disạime; ona do alogem bạtil giḍikakʼa.

Josuạ 7:9

Kananiko ar niạ disạmren eṭakʼ hoṛko niạ katha ańjomkate aleko gherao esetʼlea ar dhạrti khon aleakʼ ńutumko meṭao utạrtalea. Ar inạ tayom do cekate amakʼ ńutumem rukhiyại tama?”

Ephesiko lạgitʼ Pạul Apostolakʼ ciṭhi 1:12

Okoe laha khon Mạsirele asakan, ale hotetege jemon Isorakʼ mạhima sodorokʼ ona lạgitʼge uni doe bachao akatʼlea.

Jeheskel 20:14

Menkhan ińakʼ ńutum rukhiyại tiń lạgitʼ iń do ona bạń onkaleda, jemon okoe jạtrenko samaṅre onkoń oḍok giḍiletʼko onko ṭhen ińakʼ ńutum besonotakʼ alo hoyokʼtiń.

Jeheskel 20:9

Menkhan ińakʼ ńutum rukhiyại tiń lạgitʼ ona do bạń onka akada, jemon okoe jạtrenko talareko girobasokʼ kan tahẽkan onko ṭhen ińakʼ ńutum besonotakʼ alo hoyokʼ. Misor disạm khon Israelko oḍok ạgukate onko jạtrenkoakʼ mẽtʼ samaṅre Israelko ṭhen ińtetʼ geń sodorena.

Jesaea 43:25

“Ińge amakʼ ghạṭkoń meṭao akada; iń do amakʼ kạiko bạń disạ dohoytama.

Sereńko 94:14

Probhu Isor do tishõ acʼren hoṛko bae bạgi giḍiakoa; okoe doko acʼren bachaoko kan onko do bae giḍi sạṅgińkoa.

1 Patras 2:9

Menkhan ape do “Bachao akan bõsko kanpe; ape hotete naekekoakʼ rajosṭi do benao akana; ape do Isorakʼ monsubạ lạgitʼ begar dohoakan jạtrenko kanape ar uniren hoṛpe hoyakana,” Ńut khon acʼakʼ hahaṛa marsalte okoeye hoho ạguketʼpe unige sarhao sereńaepe.

Mathae 11:26

Hẽ Baba, amakʼ sana lekage noa do hoyakana.

1 Korinthiko 4:7

Am do eṭakʼko khonem begargea mente okoe hõ bako monejoṅ kana. Nonkanakʼ cetʼ menakʼtama one okaṭakʼ do dan lekate bam ńamakatʼ? Arem ńamakatʼ khan cedakʼ begor ńamicʼ leka dom sarhaokʼ kana?

2 Bõsbudạ 15:2

Unre Asariạ do Asa tulucʼ ńapamokʼ lạgitʼe oḍok senenteye menkeda, “E Asa, E Jihudạ ar Benjạminren sanam hoṛko, ińakʼ katha ańjompe. Ape tinạkʼ din Probhu samaṅrepe tahen unạkʼ din uni hõ ape sãoteye tahẽna. Uniyakʼ monejoṅakʼ baḍaeteakʼ menakʼtape khan ona dope daṛeakʼa, menkhan unipe bạgiyae enḍekhan uni hõ apeye bạgi giḍipea.

Exodus 32:12

Ar Misorrenko do niạ katha roṛ reakʼ cedakʼ ạtko ńama, dhạrti khon meṭaoko lạgitʼ am do noa buru ṭoṭha talarem oḍok ạgu akatʼkoa? Amakʼ noa botoranakʼ edre do thirtam. Dayakʼme, amren hoṛko cetanre noa muhin do alom ạguiya.

Ephesiko lạgitʼ Pạul Apostolakʼ ciṭhi 1:6

Uni doe nonkaleda jemon acʼren dulạṛiạ Hopon hotete begor damte oka mạhimate perecʼ dayae dan akatʼbon uniyakʼ sarhao hoyokʼtae.

Johan 15:16

Ape do bape bachao akadińạ, menkhan ińgeń bachao akatʼpete kạmireń dhurạu akatʼpea jemon apeakʼ jionrepe jokʼ ar ona jo do jemon tahẽ akae tahentape. Enḍekhan iń ńutumte Baba ṭhen jãhãnakʼgepe koe uni do onageye emapea.

Malaki 1:2

Probhu Isore meneda, “Iń do apeń dulạṛ akatʼpea, ” Menkhan apepe meneda, “Am do oka lekam dulạṛketʼlea” Probhu Isor doe roṛ ruạṛakeda, “Esao do cetʼ Jakobren boeha bae tahẽkana? Enhõ Jakob iń dulạṛkedea menkhan Esao do bạń moneyadea. Ińge uniyakʼ burukoń jarkharketʼtaea ar uniyakʼ ṭhạ̃i do hahaṅkarren toyokoakʼ iń hoyoco akada.”

Rak̕joṅ 5:20

Am do cetʼ jaejug lạgitʼem hiṛiń akatʼlea? Nunạkʼ din khon cedakʼem bạgi giḍiakatʼlea?

Jirimiạ 14:7

E Probhu Isor, aleakʼ kại do ale upạrteye gohayetʼre hõ enhõ amakʼ ńutum iạte jãhãnakʼ baṛe cekawaleme. Ale do ḍher dhao bạṛicʼ hortele sen akana; ar am upạrtele kại akada.

Jesaea 48:11

Iń okakoń cekae ona do iń lạgitʼge, eken iń lạgitʼgeń kạmiyeda. Iń do cetʼ ińakʼ ńutumiń besonot ocoytińạ? Ińakʼ sarhao eṭagicʼ do ohoń emlea.

Jesaea 42:16

Kãṛãkoń ạyurkoa, ar bako baḍaekan ar ona suṛucʼ horteń idikoa. Ar ńut do onko laha lahateń marsal ocoya ar harcatʼ hurcutʼ hor doń mitʼsão utạra. Iń do niạkoń nonkaea, ar khạṭigeń nonkaea.

Jesaea 41:17

“Reṅgecʼ ar nacarko do dakʼ reakʼko ńam baṛayeda, menkhan bako ńameda; tetaṅte alaṅ do sạkitʼ caba akantakoa. Menkhan iń Probhu Isorge onkoń roṛ ruạṛakoa; iń Israelren Isor do onko bạń bạgi giḍikoa.

Jesaea 37:35

Ar ińge ińren guti Dạud lạgitʼ niạ nagrahań esetʼ ạcurkakʼa ariń rukhiyạya.’ ”

1 Bõsbudạ 28:9

“Ar ińren hopon Solomon, am do am apatren Isor samaṅrem taṛam ar amakʼ mon ar ontorte unim sewawaea, ente Probhu Isor do sanamkoakʼ ontore baḍaekana ar ganḍonjoṅakʼ hõe baḍaegea. Uniyakʼ monsubạ baḍae reakʼem kurumuṭule khanem baḍae daṛeakʼ, menkhan unim bạgiye enḍekhan uni hõ jaejug lạgitʼe nihạ̃tmea.

2 Rapajko 21:14

Ińren hoṛkoren sarecʼ hĩsko doń bạgi oṭoakoa ar bạirikoakʼ tireń jimạkoa. Onkoren sanam bạiriko do onkoakʼko luṭtakoa ar jotowakʼ jor julumkateko idiy takoa,

Dosar Biboron 31:17

Ar unre onko upạrte ińakʼ edre jolokʼtińa ariń bạgi giḍiyakoa ar onko khon ińakʼ mẽtʼãhãń danaṅtińạ; arko marao utạrokʼa. Unre onko cetanre duk-kosṭo ar muhinko hecʼ paṛaokʼa. Ar enhilokʼko mena, ‘aleren Probhu Isor ale sãore bạnuite alere noa muhin do paṛao akana.’

Dosar Biboron 9:5

Ar bindusạn se dhorom iạte onkoakʼ disạm ạidạri lạgitʼpe calakʼ kana ona do baṅa bickom aperen Probhu Isorge aperen hapṛam Abraham, Isahak ar Jakob ṭhen kiriạkate okaṭakʼe menletʼ ona purạu lạgitʼge uni do noko jạtrenkoakʼ dusṭạmi iạte ape samaṅ khone laga ńirkoa.

Ibriko 13:5

Ṭaka-poesa reakʼ laloc khon sahaṛakae tahenpe. Apeakʼ oka menakʼtape onatege dhirpur akae tahenpe. Isore meneda, “Iń do tishõ bạń alae mea ar tishõ bạń bạgi giḍimea.”

Romiko lạgitʼ Pạul Apostolakʼ ciṭhi 11:1

Adoń meneda, Isor do cetʼ acʼren hoṛkoe giḍisaeketʼ koa? Tisge baṅa. Ente iń hõ mitʼṭen Israel hoṛ kangeạń, Abraham bõsren ar Benjamin gusṭirenge.

Dosar Biboron 7:6

Ente ape do nonkan mitʼṭen jạtrenko kanape aperen Isor ńutumtepe begar doho ocoakana. Ape do jemon Probhu Isorren hoṛ ar uniren sompottipe hoyokʼtae onate dhạrtiren sanam jạtrenko tala khone bachao akatʼpea.

Dosar Biboron 31:6

Daṛeanko hoyokʼpe ar monre dil dohoype. Onko ńelte alope botorokʼa se alope thar tharaokʼa, ente Probhu Isorge ape sãoteye tahena. Uni do tishõ bae bạgiyapea.”

1 Rapajko 8:57

Aboren Probhu Isor do cetʼleka aboren hapṛamko sãoteye tahẽkan onkage uni do abo sãote hõe tahenma. Uni do tishõ alo jemone bạgi giḍiyabon se alo jemone aṛakʼ giḍikabon.

Dosar Biboron 31:8

Probhu Isor do acʼge am laha lahateye senokʼa ar am sãoteye tahena. Uni do tishõ bae bạgi giḍimea. Alom botorokʼa, ar alom torasokʼa.”

2 Rapajko 14:27

Probhu Isorakʼ sana do baṅ tahẽkana, serma latar khon Israelakʼ ńutum marao giḍikakʼ do. Ona iạte uni do Jehoasren hopon Jerobiam hotete onkoe bańcaoketʼkoa.

Nehemiạ 9:17

Onko do am tabere tahen do bako aṅgocleda, ar okako hahaṛa kạmi onko talarem kạmiletʼ ona hõ bako disạ doholeda. Onko do hoṭokʼko keṭecʼketʼtakoa ar golam leka Misorte arhõ ruạṛ calakʼ lạgitʼ mitʼṭen mukhiyạko bahalkedea. Menkhan am do ikạyicʼ Isor kanam, am do daya ar mãyãtem perecʼgea; am do thoṛategem tirpitokʼ kana ar amakʼ dulạṛ do asambheṛgea. Onate onko do bam bạgi giḍiakatʼkoa.

Jesaea 43:7

Ińakʼ ńutumte okoeko hoho ocokʼ, okoe do ińakʼ ṭhonok lạgitʼ iń sirjạu akatʼko, okoe doń gaṛhao akatʼko ariń benao akatʼko, onko mimitʼko ạgukope.’ ”

Jesaea 49:15

Ona iạte Probhu Isore meneda, “Gogo do cetʼ acʼren nunu gidrại hiṛiń daṛekea? Gidrạ janam akadiyicʼ do cetʼ gidrạ cetanre bae mãyãkʼa? Hẽ, Eṅgat do acʼren gidrại hiṛiń daṛekea menkhan iń do tishõ bạń hiṛińmea.

Jesaea 63:8

Uni doe men akada, “Khạṭige onko do ińren hoṛ kanako, ar nonkan hopon kanako onko do tishõ bako bepạtiạu ocokʼa,” Ar ona iạtege onkoren babańcaoicʼe hoyena.

Jirimiạ 14:9

Cetʼ iạte am do andesale akan hoṛ lekam hoyakana, ar cetʼ iạte baṅ rurukhiyạ daṛe lạṛhại bir leka dom hoyakana? E Probhu Isor, ale talarege menama ar amren kangeale; am do alom bạgi giḍilea.