1 Rapajko 3:12 - সান্তালী বাইবেল

¹² Onate am okaṭakʼem khojakatʼ onageń emama. Iń do amakʼ ontorre nonkan ạkil ar bud bicạr reakʼ daṛeń emama ńelme noa lahare nonka do celege bako tahẽkana ar tayomte hõ onka do ar bako hoyokʼa.

1 Rapajko 3:12 Referans Kwoze

Sosolhayic̕ 1:16

Iń do mone moneteń menkeda, “Iń lahate okoe Jerusalemreko rajokʼkan tahẽkan onko khon iń do ạkilteń sorosgea; ińakʼ bud ar ạkil do ḍhergetińạ.”

Mathae 12:42

Bicạr dinre dạkhin disạmren rạni do beretʼkate noa piṛhiren hoṛko doskoe udukʼakoa, ente Solomon rajakʼ ạkilanakʼ kathako ańjom lạgitʼ dhạrti reakʼ mitʼ mucạtʼ khon uni doe hecʼlena. Ar ńelpe, nonḍe do Solomon khon hõ maraṅicʼge menaea.

1 Rapajko 5:12

Probhu Isor do acʼakʼ gokʼakʼ leka Solomon ạkile emadea. Solomon ar Hiram talare do suluk tahẽkana ar unkin do mitʼṭecʼ bondoboskin bandhaoana.

1 Rapajko 3:28

Rajakʼ bicạr ańjomkate Israelren sanamkoakʼ monre raj cetanre botor caṛhaoena, ente onkoko ńelkeda, bicạr chinḍạu lạgitʼ Isor do monre ạkile emakawadea.

Luk 21:15

ente iń do nonkan katha ar nonkan akeliń emapea, onape roṛ ruạṛakore aperen bạiriko do cetʼhõ bako roṛ daṛeakʼa, ar onahõ bako baṅ daṛeakʼa.

Jesaea 65:24

Ar iń ạuriko hohoạńrege onkoakʼ iń ańjomtakoa, hẽ, katha roroṛkan tulucʼgeń ańjomtakoa.

2 Bõsbudạ 2:12

Hirạm do arhõe olkeda, “Israelren Probhu Isor doe bhạgangea, one okoe do ot ar sermae sirjạu akatʼ. Uni do Dạud raj nonkan mitʼṭen akelan hopone em akawadea uniyakʼ bud ar bujhạu reakʼ daṛe menakʼtae ar okoe do Probhu Isor lạgitʼ mitʼṭecʼ oṛakʼ ar apnar lạgitʼ mitʼṭecʼ raj oṛakʼe benao lạgidokʼkan.

Kolossiko lạgitʼ Pạul Apostolakʼ ciṭhi 2:3

Mạsirege sanam lekan bud ar akelko do oko menakʼa.

1 Rapajko 2:9

Menkhan ńitokʼ do bin dusi mente alom hudisea. Am dom ạkilanicʼ kana; unire cetʼem cekaea ona do amge bhagem bujhạu daṛeakʼa. Uniyakʼ haṛam umerre mãyãmem joro ocoytaea ar patal puritem kolkaea.”

Sosolhayic̕ 1:13

Serma latarre okako cekae hoyokʼ ona do ạkil hotete biḍạu ar ḍunḍhạu lạgitʼ iń mone murukleda. Ariń ńelkeda, Isor do manwako cetanre tinạkʼ duke lade akatʼkoa!

Sereńko 10:17

E Probhu Isor, am do mạ̃hirkoakʼ ontor reakʼ katham ańjomeda; ar amge dilem emakokana, ar onkoakʼ rakʼem ańjometʼtakoa.

1 Rapajko 2:6

Am do ạkil salakʼ kạmime, ar haṛam umerre uni do sulukte patal purite alom sen ocoaea.

Kạhtukko 2:6

ente Probhu Isorge ạkil doe emokʼ kana, uniyakʼ moca khonge bud ar ạkil do oḍokokʼ kana.

Daniel 1:17

Ar Isor do ạkilte, bidiạte, sahittote ar joto lekan bujteye perecʼketʼkoa ar bujhạu reakʼ daṛe hõe danatʼkoa; ar Daniel do sanam lekan dorson ar kukmũ reakʼ bhedko hõe bhaṅgao daṛeakʼkan tahẽkana.

Dosar Biboron 34:9

Nunren hopon Josua cetanre Mose do tiye capoade tahẽkante uni do ạkilte ar Jiuteye perecʼena. Onate Israelko do uniyakʼ katha leka calakʼko ehopʼena ar Probhu Isor Mose hotete okae hukumletʼ ona dokʼhoko ehopʼena.

1 Rapajko 5:9

Ińren hoṛko do Lebanon khon jalapurite onako pheḍ ạguya. Ar ona tayom do onakote bhora benaokate jalapuri cetante amakʼ nirik akatʼ ṭhạ̃iteko idi seṭergotʼama. Onko do onḍeko raṛa pheḍa ar am do onakom idijoṅa. Ar ińakʼ khojogokʼakʼ do noage ińren kạmiyạko jemon jomakʼem bebostawako.

1 Bõsbudạ 29:25

Probhu Isor do sanam Israelkoakʼ mẽtʼre Solomone maraṅkedea ar nonkan ṭhonoke danadea noa lahare Israelren cele rajge bako ńamleda.

Nehemiạ 13:26

Ona tayom iń do onkoń metatʼkoa, “Israelren raj Solomon do nonkan bapla iạtegeye kạileda. Eṭakʼ jãhãn jạtrenko modre uni lekan raj do ar celege bako tahẽkana ar Isor do uniye dulạṛede tahẽkana ar uni do sanam Israelko cetanreye rajledea, menkhan enhõ uni do porjạtren maejiuko hotete ạḍiye kạileda.