1 Rapajko 1:39 - সান্তালী বাইবেল

³⁹ Unre naeke Sadok do sonot tạmbu khon dereńte sunume ạgukeda ar Solomone ojokʼ bahalkedea. Ona tayom onko do sakwako oroṅkeda ar Israelko do ãṭ aṛaṅte hohoateko menkeda, “Solomon raj do jaejug baṛe jiwetʼe tahenma.”

1 Rapajko 1:39 Referans Kwoze

Sereńko 89:20

Ińren golam Dạud doń sendra ńam akadea; ar ińakʼ sonot sunumteń ojokʼ bahalkedea.

1 Bõsbudạ 29:22

Enhilokʼ onko do Probhu Isor samaṅre rạskạ salakʼko jom ńũkeda. Onko do Dạudren hopon Solomon do dosar raj menteko aṅgockedea ar Sadok do naeke menkate Probhu Isor ńutumteko ojokʼ bahalkedea.

1 Rapajko 1:34

Sadok naeke ar Nathan nạbi do onḍe Israelkoren raj mente uni kin ojokʼ bahalea. Ar ona tayom do sakwa oroṅkate ãṭ aṛaṅtepe mena, ‘Solomon raj do jaejug hạbicʼ jiwetʼ baṛeye tahenma.’

1 Samuel 10:24

Unre Samuel do sanamkoe metatʼkoa, “Ape do cetʼ Probhu Isore bachao akade hoṛpe ńelńame kana?” Sanam hoṛko modre uni lekanko do ar okoege bạnukʼkoa. Unre hoṛkoko menkeda, “Raj do jiwetʼ baṛeye tahenma.”

2 Bõsbudạ 23:13

Uni doe ńelkeda, Probhu Isorakʼ oṛakʼte bolokʼ reakʼ horre raj do acʼakʼ khunṭi ṭhene teṅgo akana ar subedarko ar sakwa okʼroṅko do raj beṛhaeteko teṅgoakana. Ar disạmren sanam hoṛ doko rạskạkʼ kana ar sakwako oroṅeda ar sekʼreńko do bajnawateko sereńeda. Noa ńelte Athaliạ do acʼakʼ kicricʼe oṛecʼketʼte ãṭ aṛaṅteye menkeda, “Hul! hul!”

2 Bõsbudạ 23:11

Ona tayom Jehoyada ar uniren hoponko do rajren hoponko oḍok ạgukedete uniyakʼ bohokʼre mukuṭko horokʼadea. Onko do uniyakʼ tire bondobos reakʼ puthiko caladea ar raj menteko ojokʼ bahalkedea. Unre hoṛko do ãṭ aṛaṅte hohoateko menkeda, “Maharaj do jiwetʼe tahenma.”

2 Rapajko 11:12

Unre Jehoyada do rajren hopone oḍok ạgukedete uniyakʼ bohokʼre mukuṭe horokʼadea ar uniyakʼ tire bondobos reakʼ puthiko caladea. Onko do raj menteko ojokʼ bahalkedea ar disạm hoṛko do ti thayoate ar ãṭ aṛaṅte hohoateko menkeda, “Moharaj do jiwetʼ baṛeye tahenma.”

1 Rapajko 1:25

Ente uni do teheń senkate ạḍi utạr ḍaṅgra, lodgopʼ lodgopʼ bạchurko ar bheḍakoe samaṅ akatʼkoa ar rajren hoponko, senaputiko ar naeke Ạbiạthar hõe neota akadea. Onko do ńitokʼ uni sãoteko jom-ńũiyeda arko meneda, ‘Adoniạ raj do jaejug hạbicʼ jiwetʼe tahenma.’

1 Samuel 16:13

Unre Sạmuel do dereń reakʼ sunumante uniren boehako talareye ojokʼkedea. Ar enhilokʼ khon Probhu Isorren Jiu do Dạud cetanreye hecʼena. Inạ tayom Sạmuel do Ramoteye ruạṛ senena.

1 Rapajko 1:40

Ona tayom hoṛko do tiriyạ oroṅ oroṅte ar ạḍi rạskạ salakʼ Solomon tayom tayomteko ruạṛ hecʼena. Onko do nunạkʼko rạskạyena, onkoakʼ andoṛte ot hõ dal dalaoena.

2 Rapajko 9:1

Elisae do cela-nạbiko mod khon mitʼ hoṛ hohoadeteye metadea, “Ḍanḍa paṭhe keṭejme ar niạ sunum cukạkʼ hataokate am do Ramot-Gileadte calakʼme.

2 Rapajko 9:13

Unre onko subedarko do usạrate akoakʼ hoṛmo reakʼ kicricʼko bocʼketʼte siṛhi cetanre Jihuakʼ jaṅga latarreko aṭetʼkeda. Ar ona tayom do sakwa oroṅkate ãṭ aṛaṅateko menkeda, “Jihu kangeae raj do.”

2 Rapajko 11:14

Uni doe ńelkeda raj do tham khunṭi aṛereye teṅgo akana. Ar Subedarko ar sakwa okʼroṅko do raj beṛhaeteko teṅgo akana ar disạmren sanam hoṛ doko rạskạkʼ kana ar sakwako oroṅeda. Niạ ńelte Athaliạ do acʼakʼ kicricʼe oṛecʼketʼte ãṭ aṛaṅteye menkeda, “Hul! Hul!”

1 Rapajko 2:15

Unre uniye menkeda, “Am dom baḍaegea rajosṭi do ińakʼge tahẽkana. Ar Israelren sanamkogeko hudisetʼ tahẽkana ińge rajiń hoyokʼa mente. Menkhan bhạg bodolente rajosṭi do ińren boehawakʼ tire calaoena, ente ona do Probhu Isor ṭhen khongeye ńam akada.