JEREMI 14:19 - Bibəl ta Sar̄

¹⁹ Ḭ̄ ī-mbātə́ Juda kə̄ noí tə́ a? Nelī kə Siyo̰ to̰ aĺ a? I tām̄ rí tə́ á ə́ndájí kə yá̰á̰ kə́ majaĺ kə́ dum̄ təgā beé? Jə-rāā kemjí tə́ kadə̄ rɔ̄jí a ngan̄g ba yá̰á̰ kógə̄ḿ kə́ ngáā gətóo i ɓōĺ n teē kə̄ róbó.

Bible sar

¹⁹ Ḭ̄ ī-mbātə́ *Juda kə̄ noí tə́ a? Nelī kə *Siyo̰ to̰ aĺ a? I tām̄ rí tə́ á ə́ndájí kə yá̰á̰ kə́ majaĺ kə́ dum̄ təgā beé? Jə-rāā kemjí tə́ kadə̄ rɔ̄jí a ngan̄g ba yá̰á̰ kógə̄ḿ kə́ ngáā gətóo i ɓōĺ n teē kə̄ róbó.

JEREMI 14:19 Referans Kwoze

NŌŌ RƆ̄ 5:22

Ā ī-mbātə́jí kɔ̄ɔ́ i kə́ njɔ́ḿ gə̄ tə́ a? Wōn̄g rāāī sejí adə̄ al̄ naā!

JEREMI 8:15

Jə-ngóōī kadə̄ rɔ̄jí ngan̄g, ba yá̰á̰ kə́ to ngáā gətóo. Jə-ngóōī kum mbang kə́ kadə̄ rɔ̄jí ngangə̄ń, ba i ɓōĺ n rāājí ní.

1 TESALONIK 5:3

Dan ń de gə̄ a ədan̄ na loo na to lɔm kɔ̄ɔ́ ō, yá̰á̰ kə́ yā rāā yá̰a̰ na gətóo ō anī, yá̰á̰ kə́ nujə sák sák a teē dɔdə́ tə́ gidə kógə̄ḿ, tītə̄ kem kə́ ɔsə kə dəyá̰ beē, adə̄ nin̄ a teēn̄ kum tə́ alé.

JEREMI 6:30

Ɓārə́n̄də́ na i gində̄ arjā̰a̰ kə́ yā kídə̄, tɔdɔ̄ Kɔ́ɔ̄ɓē kídə̄də́.

JEREMI 30:13

De kə́ yā kəndā rɔ̄n ta najə̄ yāí tə́ gətóo. Kḭ̄ḭ̄ kə́ yā do̰ō̰ń do səya̰ yāí kadə̄ edə̄ gətóo.

JEREMI 15:18

I tām̄ rí tə́ á tápə̄ yāḿ i kə́ dum̄ təgā ō, do yāḿ i kə́ dum̄ kedə̄ ō, dum̄ ta kəga gə̄ malang ō ní. Kə́ rɔ̄kum tə́ ní ḭ̄ ī-tél ī-to i tītə̄ kəɓa man̄ kə́ a gól̄ loo beé ō, kə́ deē asə kəndā kemən dɔ tə́ aĺ beé ō tām̄ yāḿ tə́.

JEREMI 12:8

Yá̰a̰ kənge yāḿ tél to tītə̄ ɓɔl kə́ ku kāgə̄ tə́ kə̄ dɔḿ tə́. Ni tṵ́ṵ̄m̄ rɔ̄ɔ̄, adə̄ mā gə̄gē a m̄-gḛyn to̰ alé.

PĀ GƏ̄ 78:59

Dan ń Nə́ɓā a̰a̰ yá̰á̰ ní anī, wōn̄g rāān ngá̰ý, adə̄ əya̰ Israel gə̄ kɔ̄ɔ́.

Makətūbə̄ yā Job 30:26

M-ə̄ndā kemḿ dɔ ndi majə tə́ anī, i yá̰á̰ kə́ tōr̄ n teē kə̄ ta róbə́ tə́ ní. m̄-ndi m-ā m̄-ngóō i loo kə́ unjə̄ kow, anī i loo kə́ risə til n reē ugə̄.

NŌŌ RƆ̄ 4:17

Jḭḭ tā anī, kumjí roō kɔ̄ɔ́ loo ngóō ta de kə́ yā kadə̄ reē dḭḭ̄jí tə́. Jə-nda loo ngɔ̄m̄ loo yājí gə̄ tə́ jə-ngóoń ta reē nápar de kə́ tɔ́gə́də́ asə kajəjí aĺ gə̄.

NŌŌ RƆ̄ 2:13

Jerusalem ngōmandə yāḿ, kə m-ə́daī na i rí ɓáý to̰? I náā n to tītīí ta kumḿ mā tə́ ní? ngōn̄ kə́ madə̄ yāḿ, ngōmandə kə́ Siyo̰, i rí n kə m̄-sɔlə̄ń kemií ní? Tɔdɔ̄ ī-nujə i nujə kə́ to ɓōĺ ngá̰ý tītə̄ man̄ bā bo ń i yá̰á̰ kə́ laa to ɓōĺ ngá̰ý ní beē. I náā n a ajiī ní?

JEREMI 15:1

Kɔ́ɔ̄ɓē ədam̄ na: Ká ré Moijə nin̄ kə Samuel reē ran̄neé ta kumḿ tə́ gə̄gē anī, m-ā m-ōō ndɔ̄ȳ yādə́ kə́ tām̄ yā de gə̄ ń noō tə́ alé. Ī-tə́ɓādə́ kɔ̄ɔ́ ta kumḿ tə́, ādə̄ aw̄n̄.

JEREMI 8:22

Bəto kə kāgə̄ kə́ yā rāā ta do tə́ gətóo Galaad i mbée a? Nge rāā de gə̄ mo̰y gətóo noó a? I tām̄ rí tə́ á rɔ̄ gír deē yāḿ gə̄ əsō naā tə́ aĺ ní?

JEREMI 7:29

Ə́ja nənga dɔí ń ɔjə kadə̄ ɔ̄r̄ kamí tām̄ yā Nə́ɓā tə́ ní ba ī-ɓōkə́ kɔ̄ɔ́. Ə̄nī pā nōō rɔ̄ kum róbə gə̄ tə́, tɔdɔ̄ Kɔ́ɔ̄ɓē kídə̄ de gə̄ ń rāānən̄ adə̄ ənge wōn̄g ní ō, əya̰də́ kɔ̄ɔ́ ō.

PĀ GƏ̄ 89:38

tītə̄ nāā ń i yá̰á̰ kə́ kum tə́ kə́ ra dɔ ndūn tə́ ɓōdə̄ loo tə́ dɔɔ́ ní ō.

2 YÁ̰A̰ GƏ̄ 36:16

Banī nin̄ mbóon̄ kə ngámbang kəla yā Nə́ɓā gēé ō, kídə̄n̄ najə̄ gə̄ ń Nə́ɓā ɔr̄ sedə́ ní ō, ɓōlə́n̄ ngé koō ta yān gə̄ aĺ ō, adə̄ wōn̄g ń rāā Kɔ́ɔ̄ɓē kə gír deē yān gēé ní dáwán gətóo.

JEREMI 12:7

M-ə́yá̰ kújə yāḿ kɔ̄ɔ́, m̄-mbātə́ yá̰a̰ kənge yāḿ kɔ̄ɔ́, m-ə́la nge ń m̄-tárən ngá̰ý ní jī madə̄ ba̰ā̰n gə̄ tə́.

MISE 1:12

Ɓōĺ rāā de kə́ Marot gə̄ adə̄ ndewn̄ najə̄ yá̰a̰ kənge yādə́ tə́. Tɔdɔ̄ yá̰á̰ kə́ to kum kaȳ aĺ ń Kɔ́ɔ̄ɓē əlań ní, reē ugə̄ ta róbə́ kə́ Jerusalem tə́.

Gōsə̄ najə̄ gə̄ 29:1

Deē ń ndán̄gnən̄ ba dum̄ naā ní, a tétə̄n̄ kə̄ngōn̄ rárák gidə kógə̄ḿ ō, a gətóo ō!

JEREMI 30:12

Kɔ́ɔ̄ɓē ɔr̄ najə̄ i tītə̄ ń toō beé: Ī-nujə i nujə kə́ al̄ naā ngá̰ý adə̄ dum̄ kəndaī ta naā tə́. Do gə̄ kə́ rɔ̄í tə́ i kə́ dum̄ kedə̄.

JEREMI 51:5

Tɔdɔ̄ kem ɓē yādə́ tə́ ní, nin̄ rāān̄ yá̰á̰ kə́ gōtə́ aĺ ngá̰ý kə kə́ táĺ yā Israel. Banī Nə́ɓā yā Israel ō, yā Juda ō ń i Kɔ́ɔ̄ɓē kə́ bo kə́ tɔ́gən i ngá̰ý ní, oy tadə́ tə́ alé.

NŌŌ RƆ̄ 2:22

Ī-rāā ādə̄ ɓōĺ kə́ ngá̰ý teē kə̄ ta loo gə̄ tə́ reē dɔḿ tə́, tītə̄ ń de gə̄ a teēn̄neé kə̄ loo gə̄ tə́ yā reē rāā nāā tə́ noó beé. Ndɔ̄ rāā wōn̄g yā Kɔ́ɔ̄ɓē tə́ ní, de kə́ teē ta yo tə́, aláa ndi kə kumneé gətóo. Madə̄ ba̰ā̰ḿ tɔ̄l̄ ngánə́ḿ gə̄ ń m-ə̄tōdə́ kə tárá ngá̰ý ní kɔ̄ɔ́.