IJAI 40:1 - Bibəl ta Sar̄

¹ Ī-téliī kə kəndā kem dɔ tə́ ādī gír deē yāḿ gə̄ gogə́. A̰á̰ā̰, ī-tél ādīin̄ kəndā kem dɔ tə́ gogə́. Nə́ɓā yāsí əda i beé.

Bible sar

¹ Ī-téliī kə kəndā kem dɔ tə́ ādī gír deē yāḿ gə̄ gogə́. A̰á̰ā̰, ī-tél ādīin̄ kəndā kem dɔ tə́ gogə́. Nə́ɓā yāsí əda i beé.

IJAI 40:1 Referans Kwoze

2 KORḚNTƏ 1:4

Ni-sɔl̄ kemjí dan wur kɔl gə̄ tə́ malang, i yā kadə̄ j-asiīneé sɔl̄ kem ngé gə̄ ń ndin̄ dan yá̰á̰ kə́ tōr̄ gə̄ tə́ ní ō. Ba j-a jə-sɔlī kemdə́ i kə kem sɔl̄ ń jḭḭ̄ kɔ́ gə̄ j-ə́ngeī jī Nə́ɓā tə́ ní.

IJAI 51:12

Kɔ́ɔ̄ɓē əda na: I mā n i ngé tél kadə̄sí kəndā kem dɔ tə́ gogə́ ní. A̰á̰ā̰, i mā. Ḭ̄ gír deē yāḿ, ī-ɓōĺ deē ndul gə̄ i tām̄ rí tə́? Nin̄ malang i ngé koy gə̄, ta tɔ̄l̄ tadə́ i tītə̄ ta tɔ̄l̄ ta mu beé.

IJAI 51:3

Kum Kɔ́ɔ̄ɓē o̰o̰n tām̄ yā Siyo̰ tə́, kumən o̰o̰n tām̄ yā gájə́ kújə yān gə̄ tə́. Ɓē ń toō ń de kə́ kemeé gə̄ gətóon̄ ní, ni a tūrə̄n kadə̄ tél loo kə́ majə ngá̰ý. Ni a rāā dɔ nang kə́ tutə ń toō kadə̄ tél ndɔr̄ kə́ Eden. Rɔ̄nel̄ kə́ ngá̰ý ō, pā tɔ̄ȳ ō, yá̰á̰ kə́ ɓār̄ gōsə̄ ō, a to loo ń noō tə́.

1 TESALONIK 4:18

Ī-sɔlī kem naā kə najə̄ ń noō.

JAKARI 1:13

Loo ń noō tə́ nge kaw̄ kəla ń a ɔr̄ najə̄ seḿ ní, Kɔ́ɔ̄ɓē tūr̄ ədan najə̄ kə míndə́ kə́ majaá. Najə̄ ń ni-ɔr̄ seneé ní, i najə̄ kə́ a əla go̰ kem deē tə́.

JAKARI 9:9

Ɓē kə́ Siyo̰, ī-ndām̄ kə tɔ́gí gēé malang! A̰á̰ā̰, ɓē kə́ Jerusalem, ə́ga kɔŕ rɔ̄nel̄! Á̰a̰ā̰, mban̄g yāí a reē kə́ rɔ̄í tə́. Ni i de kə́ nge rāā yá̰á̰ kə́ gōtə́ ō, nge tetə rɔ̄ɔ̄ ō, ni i de kə́ najə̄n gətóo ō. Ni-ndi i gidə kərō kógə̄ḿ tə́, adə̄ i gidə ngōn̄ kərōó kógə̄ḿ kə́ kó̰o̰n i noó tə́.

IJAI 60:1

Jerusalem, ḭ́ḭ dɔɔ́! Ādə̄ hor gə̄ rāān̄ adə̄ loo unjə̄ kow dɔí tə́, tɔdɔ̄ loo kə́ unjə̄ kow ḭḭ nang tə́ kum kə̄ dɔɔ́ tām̄ yāí tə́: Kɔsə gɔn yā Kɔ́ɔ̄ɓē unjə̄ dɔí tə́ tītə̄ mbang kə́ əɓa beé.

IJAI 12:1

Gír de gə̄ kə́ ɔrə̄n̄də́ ɓəloó, ndɔ̄ ngeé ń noō tə́ ní ā ə́da na: Kɔ́ɔ̄ɓē, m̄-rāāī kə́ra. Kété ní wōn̄g rāāī seḿ, banī wōn̄g yāí ní tetə kɔ̄ɔ́ ō, ḭ̄ ī-rāā ādə̄ kemḿ tetə kə̄ nang tə́ ō.

IJAI 52:9

Ndəbā ɓē gə̄ kə́ Jerusalem, ī-túrī kɔĺ rɔ̄nel̄. Kɔ́ɔ̄ɓē tél kə kəndā kem dɔ tə́ adə̄ gír deē yān gə̄ gogə́, ni-ɔr̄ Jerusalem ɓəloó.

IJAI 41:27

De kə́ ta kəga dɔ ń əda yá̰á̰ ń noō kem ɓē kə́ Jerusalem tə́ ní, i mā Kɔ́ɔ̄ɓē. Tām̄ m-ə́la deē kógə̄ḿ Siyo̰, kadə̄ aw̄ əda najə̄ kə́ majə.

IJAI 50:10

I náā kə́ dansí tə́ n ɓōĺ ndíĺ Kɔ́ɔ̄ɓē ní? Deē ń noō ní majə kadə̄ oō najə̄ yā nge kəla yān. I náā n njə̄rā dan ndɔ̄ɔ́ ba a̰a̰ loo kógə̄ḿ kə́ unjə̄ kow aĺ bátə́ ní? Majə kadə̄ deē ń noō ənī kemən mámák adə̄ Kɔ́ɔ̄ɓē ō, ra dɔ Nə́ɓā yān tə́ ō.

IJAI 3:10

Ngé gə̄ ń oōn̄ ta Nə́ɓā ní, ásiī kəda na nin̄ i ngé rɔ̄nel̄ gə̄. Yá̰á̰ ń nin̄ rāān̄ ní, a əngen̄ yá̰á̰ kə́ majə tām̄ yādə́ tə́ gírí.

PĀ GƏ̄ 85:8

Kɔ́ɔ̄ɓē, ɔ́jə́jí kem majə yāí ō, ájə́jí ō.

NEHEMI 8:10

Esdras əda ɓáý to̰ na: Ī-tél āwī kə̄ ɓē yāsí gə̄ tə́, āw̄ ə́saī dā̰ kə́ yḛmbə gə̄ ō, ā̰yī kasə kə́ nel̄ gə̄ ō, ī-kēgī ə́laīneé ādī de gə̄ ń ndīrə̄n̄ yá̰a̰ aĺ ní tə́ ō. Tɔdɔ̄ ndɔ̄ kə́ ɓōólaā i ndɔ̄ kə́ kɔr̄ kam̄ tay ā tām̄ yā Kɔ́ɔ̄ɓē yājí tə́. Ī-lōōī kəhɔ ndoō. Tɔdɔ̄ rɔ̄nel̄ yā Kɔ́ɔ̄ɓē i tɔ́gə́sí!

IJAI 61:2

Ni əlam̄ kadə̄ m-ə́da najə̄ ń toō: I ɓāl̄ ń kadə̄ ā á̰a̰īń kem majə yā Kɔ́ɔ̄ɓē ní, i ndɔ̄ ń Nə́ɓā yājí a daləń ba̰ā̰ dɔ madə̄ ba̰ā̰n gə̄ tə́ ní! Ngé gə̄ ń əhɔn̄ ndoō ní, ni əlam̄ kadə̄ m̄-tél m-ādə̄də́ kəndā kem dɔ tə́ gogə́.

EJEKIEL 16:42

M-ā m̄-bə̄gā wōn̄g yāḿ kə́ ngá̰ý dɔí tə́ bátə́ ta tɔ̄l̄ ta tə́. Ba dan ń kum rāā jang yāḿ a gətóo anī, m-ā m̄-tél yā ndi jəke gogə́, wōn̄g a rāām̄ to̰ alé.

PĀ GƏ̄ 85:3

Yá̰á̰ kə́ gōtə́ aĺ ń gír deē yāí gə̄ rāān̄ ní, ḭ̄ ún dɔdə́ tə́ kɔ̄ɔ́. Yá̰á̰ kə́ majaĺ gə̄ malang ń nin̄ rāān̄ ní, ḭ̄ ī-mā̰ȳ rɔ̄í dɔ tə́.

KOHELET 3:4

Kum mbang kə́ yā kadə̄ deē nōoń i noó ō, ni kə́ yā kadə̄ deē əgōń i noó ō. Kum mbang kə́ yā kadə̄ deē nōoń rɔ̄n i noó ō, ni kə́ yā kadə̄ deē ndāməń i noó ō.

JAKARI 1:17

Gō tə́ anī, de kə́ dɔ rā̰ tə́ ní mērə̄m̄ kəda najə̄ kə́ rang yā Kɔ́ɔ̄ɓē kə́ bo kə́ tɔ́gən i ngá̰ý ń toō: Yá̰á̰ kə́ majə gə̄ a télən̄ yā taā loo gogə́ kem ɓē yāḿ gə̄ tə́ ɓáý to̰ ō. M-ā m̄-tél yā gə̄rā ɓē kə́ Jerusalem gogə́ ɓáý to̰ ō, m-ā m̄-tél kə kəhɔ rɔ̄ tɔgɔɔ́ yā kadə̄n gogə́ ō.