Tito 1:15 - Buglere

¹⁵ Kwian bai ta no trate molen, diali ama tañachuge no ama age no Chube gwa giti. Kwian bai me Chube gerua gai ulia, ama ta me no, diali ama tañachuge me no ama age me no, amage me suge kle age ulita me no, ama tañachuge kle age no.

Tito 1:15 Referans Kwoze

Romanos 14:14

Cha che Chugagwalla Jesu gaba ulia, chage mo tale suge trate trate bligda ulita no cha alin gutadale, chage suge ni bligda gdaite me no cha alin gute Chube gwa giti. Agwa daba gweale Chubenuge suge mo tale bligda gweale me no ama alin gutadale, suge amage ene agwa ama bligda e gute ama kle age me no Chube dollale, ulia daba e alin e me no gutadale.

Romanos 14:20

Daba na me lle gute ulita, ama tañachuge lle gweale me no ama alin gutadale agwa bage suge lle ene no gutadale, ba me daba ene ta gbe joge siere geru Cristo gitige me blire salengwli giti, daba e Chubenu, bedre bedre Chube kle ama ta gbe suge ma trate agwa daba bebi geru ulita uñe trate, me no daba ene ta gbe joge siere geruge ba kle blire giti, ba tachkedale daba na giti ba kle lle ulita gute giti, ulia lle ulita no gutadale agwa bage suge daba me no lle ene ole ma no me lle ene gute daba bai me kle lle gute gwa giti.

1 Corintios 10:23

Che ulita Chubenu mo ta gbadale age Chube alin Chube takalin kare diali, ene che be ñage mo ta gbe ma no Chube ole diali, kaire che be ñage daba na Chubenu chudaboi mo ta gbe ma no Chube ole. Che ulita ñage gerule mo alin: “Cha ñage age ulita cha takalin kare me tañachuge daba na giti.” Che ñage gerule ene agwa age ulita me no che alin, ulita me che ta gbe no Chube ole, kaire ulita me daba na chudaboi mo ta gbe Chube gai ma no Chube takalin kare.

Mateo 15:18

Agwa kwian kle tañachuge me no mo tale, talla e giti kwian kle age me no kle gerule me no ama kle tañachuge kare, talla e kle kwian gbe chege jiske Chube gwa giti.

Romanos 14:23

Kwian Chubenu gwealege me suge trate mo tale Chube gwa giti ama ñage lle gweale gute o me lle gweale gute, ma no me gute, kwian ta suge ene ma no me gute, kwian lle gute ta ene ole me kle lle gute Chube talla giti. Me lle gute Chube talla giti, ta ene me no Chube gwage. Kwian me age ulita Chube talla giti, kwian ene kle age me no mo ole Chube gwage.

1 Corintios 10:31

Ba ulita tachkedale ai giti: Ba kle age ulita giti kaire blire giti chi jai giti mo ta gbale age no diali kwianske me tañachuge mo alin giti age ba takalin kare, ma no mo ta gbale age no ulita Chube takalin kare kwian ulitaske, ene kwian gwage badi suge amage Chube kle age no ba tale kle ba ta gbe age, ene kwian gwage badi gerule no no Chube giti.

Hechos 10:15

Pedro geru keruchugu nabitaite gerule: —Chube bda e ulita gbu trate ba alin gutadale, Chube gwage bda e me sugaska ba ñage bda e gute.

1 Corintios 8:7

Chege suge trate Chube gdaitre alin kle, uñale chege lle oña ulita kwian kle gai chubere lle oña e ulita ngwale me kle gwade me ñage age. Agwa che bitalla Chubenu ulitage me suge ene trate, daba gweale me Chube ulia gaba sbali, ama me Chube gerua uñe trate. Daba ene bebi Chube ulia uñe ama lle oña e gau mo chubeale, nege ama kle Chube ulia gai mo Chubeale agwa suge amage lle oña e kiraske ñage age bligda ole, malen ama tale suge me no bligda kaitaba lle oña ege gute, ama bligda ene gute ama agali tañachuge chege me no Chube gwage.

Hebreos 10:22

Chkedale uñale chege che Jesucristo gau ulia giti che ta kle no trate Chube gwa giti, Jesucristo che ta blitu Chube ole ene che suge moge me jiske Chube gwage che agedu me no giti salengwli che suge moge trate che mo glige no trate gire. Ta no trate ene ole che ñage gerule agali Chube ole, Jesucristo giti che ta suge moge Chube kle che keruchuge ama be age che alin che gerule ama ole giti.

1 Corintios 10:25

Ba ulita joge samla gige samla chbadakle ngwadi, ba samla gige ba me geru kadadale samla e jo kaitaba o me jo kaitaba lle oña kwian kle gai chuberege, ene ba ñage samla e ulita gute me tañachuge samla giti.

1 Timoteo 6:5

Kwian ene ta me no, ama me ñage tañachuge no trate malen diali ama kira bate geru ngwale giti, ama me Chube gerua Jesucristo giti gai ulia. Kaire ama gerule kle kwian tke tangle ulia Chube geruage, agwa ulia me ene, ama tañachuge nganake, ama tañachuge mo tale: “Noare cha kwian tke tangle Chube giti, kwian tke tangle ñanale cha igi gai no.” Kwian ta enege ba jogedale siere.

Hebreos 9:14

Agwa ulia bda bea kledu kwian gbe trate sugetidale alin e suiale, gire ene ulia che mo ta gbadale suge Jesucristo jokeda giti e ma no bda beage, Jesucristo giti che ta chege trate no ulita Chube gwa giti diali chui tangle. Jesucristo noare trate ni ama agedu me no sidri, Chube Oña Jesucristo kira gbu mo kete gwaleda boi daga ngwale Chube gwa giti kwian ulita alin salengwli unsuialin tangle kwian gerunga Chube ole daba alin bda gweale no no trate guda Chube gwa giti daba na kle age me no giti kare. Jesucristo jokeda che agedu me no giti, che ama gerua gai ulia gire Jesucristo che ta lite no trate che ta chege trate Chube gwa giti che me age me no che agedu ngeru kare. Ene che ñage lle no boi Chube alin toi diali Chube takalin kare, Chube ulia no trate ama ulia Chube gwade kiraske.

Hebreos 12:15

Ba ulita mo talladale ongoru ongoru mo chudaboi toi ulita Chube takalin kare. Ulia me no ba gweale mo ta bliteni age me no Chube dollale gire ene Chube me ñage ba chudaboi, Chube me ñage age no ba alin ama takalin kare. Chube ta ba ulita chudaboakalin, ama takalin ba ulita toi no ule daba ole, malen ba me ñage ni kwian gdaite kle baske chuge ngwadi ba ulita gbe toi me nga suga no ole age gweale me no. Ulia kwian gdaitre alin allabi age me no giti ba ulita ñage chege toi ta me no ole daba na ole kwian e kle toi kare. E chege salengwli gliga gaite gage mliakle chiske kare gire chi e ulita chege gage ulita sugaska kwian tanre ñage oga chi edi.