1 Corintios 3:8 - Buglere

⁸ Cha Pablo kaire Apolos cha boke salengwli, gdaite me ma no nage Chube gwage, cha boke Chube gerua dbe giti Chube be e ñanalla kete cha bokege lle boi no mo kaire kaire ñanale.

1 Corintios 3:8 Referans Kwoze

Romanos 2:6

Chui bdagli ege Chube be kwian gdaite gdaite gbe jiske agedu kaire kaire giti. Chubege uñale kwian ulita ta mine, Chube be gerule trate ulia bai mo ta gbu age no Chube takalin kare bai me mo ta gbu age no Chube takalin kare.

2 Juan 1:8

Malen cha gerule ba ulita Chubenu ole, ba mo ta gbadale toi ta giti kwian e karege, Chube be age no ba alin ba toidu no ngeru ñanale, agwa ba kwian e kare gerua gai ulia, Chube mi age no ene ba alin. Agwa ba toi no ta giti Chube takalin kare me geru ngwale gai ngwange, gire Chube be age no ulita ba alin ba toidu no ñanale.

Mateo 16:27

Chube cha kagu nga dba ai giti kwian kare, chui bdaglige cha be chieni nakwaite cha Ñenua Chube kirallaske, cha be chieni ule lle boanga Chube alin nga ngaña giti ngle ole. Chui ege cha be gerule kwian bai jiske Chube gwa giti kwian bai me jiske Chube gwa giti. Kwian bai agedu me no Chube dollale, kwian ene jiske Chube gwa giti, cha be kwian ene ulita gbe ji chuge agedu me no kbiale. Kwian bai agedu no Chube takalin kare cha mi kwian ene gbe jiske Chube gwa giti, cha be age no ama ulita alin ama agedu no trate Chube takalin kare ñanale.

Apocalipsis 22:12

Gire Jesucristo gerule nakwaite: “Ulia cha be chieni sugeti, cha be chieni lle no dbe kwian ulita alin kwian agedu no ñanale bai kaire cha gau ulia agedu no cha tadukalin kare, kaire cha be ji gbe kwian ulita giti bai kaire me cha gau ulia agedu me no cha dollale ulita giti.

1 Corintios 15:58

Cha daballa cha ibotea Jesucristo giti, cha no no ba ulita ole. Uñale ba ulitage bdagli ba be chkeni gwade toi diali chui tangle ule Chube ole, malen cha gerule ba ole, ba ulita mo ta gbadale diali gwangerugu Chube ole me mo chuge ngwadi ta gbe joge siere sidri Chubege. Ba ulita mo ta gbadale ma no dare lle boi Chube alin che Chugagwalla Jesucristo gerua kete kwiange, uñale ba ulitage ba mo ta gbe Jesucristo gerua dbe kwiange, lle ene boi Chube alin Chube takalin kare ba me kle lle boi ngwale.

1 Pedro 5:4

Ba ulita daba Chubenu chugagwalla mo ta gbe daba Chubenu manade Chube geruadi ta no ene ole, ene Cristo daba Chubenu ulita mananga ma kweri chkeni chuiage ama be lle no no kete ba ulita daba Chubenu chugagwallage ba daba Chubenu manadu no ñanale, lle e me boi ni jogenga, lle e chege diali chui tangle.

Hebreos 6:10

Ulia Chube noare, Chube ta no trate molen, diali ama kle age no kwian alin kwian bai kaire kle ama gai ulia age ama takalin kare. Kaire Chube me ta jogenga ba agedu giti ta no ole daba Chubenu na chudaboi daba ta gbe kiraske Jesucristo giti ba kle age diali kare, gire ene suge Chubege ba noare Chube ole.

Gálatas 6:4

Ma no kwian ulita mo ta gbe tañachuge trate ulia mo giti, ene chke uñale kle mo ta gbe age no o me kle mo ta gbe age no, me tañachugale ama kle age ma no daba nage o me. Suge amage ulia ama kle age no ulita gire nga be suga no amadi mo tale e giti.

1 Corintios 3:14

Kwian Chube gerua dbanga bai kaire Chube gerua du no Chube alin nga dba ai giti daba na ta gbe suge Jesucristo giti, geru dbanga ene giti daba na geru Jesucristo giti gau ulia, daba ene chege Chubenu diali chui tangle, chui bdaglige geru dbanga no ene be geru Jesucristo giti du no ñanalla gai.

1 Corintios 3:9

Cha gdabonate lle boanga Chube alin Chube gerua amaña dbanga baske, ene cha boke giti Chube gerua jo chke ba ulita tale. Ba ulita Chubenu ba ta dbi kare, Chube gerua chude kare, Chube gerua jo chke ba tale salengwli chude joge chke dbiske kare. Kwian chude ngama mananga chude manade no ama chude juge nate, ene chude ñage tige ma no. Ene kaire cha boke kle ba ulita chudaboi Chube geruage ene Chube age no ba tale, ene bedre bedre Chube ba ta gbe ma trate ama geruadi. Kaire ba ulita Chubenu ba ta u kare.

1 Corintios 3:7

Cha Chube gerua dbanga ngeru baske, Apolos ba ta gbanga geru e uñe ma trate. Ni cha boke gdaite ma kweri dabage ba ta gbanga, agwa Chube alin ba ta gbanga suge trate trate ulita geru giti ene ba mo ta blitu gerudi geru gai ulia.

1 Corintios 4:15

Kwian ngle ngle kle ba tke tangle Cristo giti, agwa cha geru Jesucristo giti du baske ma ngeru kwian daba tkanga tangle ulitage, malen cha alin allabi ba ñenua kare ba ulita ta gbanga geru Jesucristo giti gai ulia.

1 Corintios 9:7

Guardia donga lle boi mo chugagwalla alin chui gdale, ¿ama kle lle boi ngwale? Me ene, guardia donga igi gai lle boi ñanale, ene ama ñage lle gige mo alin toigda. Kwian chude ngama gbe, bligda suiage kwian chude ngama gbanga ñage bligda e gai ama takalin kare, ama bligda mauña. Ni kwian gdaite ñage gerule bligda mauña me ñage bligda gai mo alin. ¿Kwian gweale ñage gerule bda oveja mananga me ñage oveja jusulia jai? Me ene, ama oveja mananga, ama ñage oveja jusulia gai mo alin jadale.

Gálatas 6:5

Uñale Chubege kwian ulita talla mine, malen kwian ulita gdaite gdaite mo ta gbadale chage age no Chube takalin kare.

Lucas 19:19

Chugagwalla gerudu ama ole: “Ba kwian lle boanga no, nege cha be ba gbe kwian una gdatigamu chugagwallale.”