Osija 9:8 - Библия - Пэ Балтитко Романи чиб (Романэс) 2019

⁸ Ци исын Ефремостэ ракхибнаскиро (стражо) тэ дыкхэ́л пал явирэндэ пала́л мирэ́ Дэвлэ́стэ? Нэ лэ́скиро проро́ко исын сы́рбы фэлы́ чириклэ-ухтылыбнаскирэстэ (птицэловстэ) пэ сарэ́ лэ́скирэ дрома́, и исын сы́рбы кхуды́ (сетка) дро кхэр лэ́скиро Дэвлэ́скиро.

Biblija - Pe Baltitko Romani čib (Romanes) 2019

⁸ Ci isyn Jefriemoste rakhibnaskiro (stražo) te dykhél pal javirende palál miré Devléste? Ne léskiro proróko isyn sýrby felý čirikle-uhtylybnaskireste (pticelovste) pe saré léskire dromá, i isyn sýrby khudý (sietka) dro kher léskiro Devléskiro.

Osija 9:8 Referans Kwoze

Osija 5:1

‘Шунэ́н дава́, рашая́лэ! Причхувэ́н кан, кхэр Израилёскиро! Рикирэнпэ кэ дова́, со шунэ́на, о кхэр крали́скиро! Пал-дова́ со сэ́ндо явэ́ла проти тумэ́ндэ, пир-дова́ со тумэ́ са́нас сы́рбы фэлы́ (петля) дрэ Маси́фа (Мицпа) и сы́рбы кхуды́ (сеть) пэ Фаворо.

Езэкилё 3:17

“Манушэ́скиро чхава! Мэ чхудём тут ракхибнариса Израилёскирэ кхэрэ́скэ. Ту явэ́са тэ шунэ́с лав Мирэ́ уштэндыр, а тэ́ньчи ту явэ́са тэ сыклякирэс лэн Ма́ндыр.

Mihiejo 7:4

Най фэдэды́р ману́ш лэ́ндыр исын сы́рбы канрало хру́сто, а най чачунэдыр ману́ш исын вострэдыр (чолалэдыр) тыностыр пхусадытконэ хрустэндыр; явдя́ дывэ́с Тырэ́-ракхибнарьенгиро, со Ту явэ́са тэ сэндинэс, акана́ явэ́ла лэ́нгиро конфузо (бу́нто).

Isajos 62:6

Ерусалимо! Мэ чхудём пэ тырэ́ ва́нты ракхибнарьен, савэ́ ни дывэсэ́ ни раты́ на пириячэна тэ пхэнэ́н лав. Тумэ́, кон пхэнэ́ла пал Дэвлэ́стэ, на пириячэн тэ ракирэ́н!

Юдэ́нгэ 13:17

Кандэ́н пэ́скирэ сыклякирибнарьен, савэ́ лыджа́на тумэн, кэрэ́н саро́, со ёнэ пхэнэ́на тумэ́нгэ; пал-дова́ со ёнэ саро́ часо пэкэнапэ (заботисона) пал тумаро́ ду́хо (фа́но), ёнэ исын сы́рбы мануша́, савэ́ явэ́на тэ отпхэнэн анги́л Лэ́стэ, соб (кай) ёнэ тэ кэрэ́н радыма́са дава́, а на тэ дэн ґондя́ (на тэ ўздыхинэн), тэды на явэ́ла фэдэды́р тумэ́нгэ.

Joannostir 15:24

Ко́ли Мэ тэ на кэра́в анги́л лэ́ндэ рэ́нды, савэ́ яви́р нико́н на кэрдя́, тэды лэ́ндэ на явэ́лас грэ́хо; нэ какана́ ж ёнэ дыкхнэ́ лэн и усае́кх бидыкхэна (на дэ́на паты́в) Ман и Мирэ́ Дадэ́с.

Езэкилё 33:7

Тут, манушэ́скиро чхава, Мэ чхудём ракхибнаскирэса Израилёскирэ кхэрэ́скэ, ту явэ́са тэ шунэ́с лав Мирэ́ уштэндыр, тэ явэ́са тэ сыклякирэс лэн Ма́ндыр.

Roiben 4:13

саро́ дава́ пал форо́скирэ пророкэ́ндэ и пал лэ́нгиро – раша́нгиро чорипэ́н, кон прочхудэ чачунэ́ – манушэ́нгиро рат машки́р дава́ фо́ро.

Roiben 2:14

Тырэ́ проро́ки дыкхнэ́ ваш ту́кэ чхучэ́ и нагодьварэ сунэ́; ёнэ на сыкадэ тыро́ чорипэ́н, соб (кай) тэ рискирэ́н палэ тумэн плено́стыр, нэ ёнэ дыкхнэ́ ваш ту́кэ хоханэ́ ангилпхэныбэна; палдова́ и выбичхадэ тумэн.

Ереме́ё 31:6

И явэ́ла дывэ́с, ке́ли э ракхибнаскирэ (стражы) пэ бэ́рга Ефре́мо, явэ́на тэ дэн го́дла: ‘Уштэ́н, джа́са пэ Сио́но кэ Рай Дэвэ́л, амаро́ Дэвэ́л’”

Ереме́ё 14:13

Нэ мэ пхэндём: “О, Раё Дэ́вла, Дэвлалэ! Ѓа́да, проро́ки ракирэ́на лэ́нгэ: ‘Тумэ́ на дыкхэ́на курта́ла, ни бари бокх, пал-дова́ со Ту дэ́са чачуно́ рама́нё пэ дава́ штэ́то.

Ереме́ё 6:17

Рай Дэвэ́л адя́кэ-паць чхудя́ стрэгарьен (ракхибнарьен) ваш адалэ́ манушэ́нгэ: “Шунэ́н рогоскири зан!” Нэ ёнэ пхэндлэ́: “Амэ на ява́са тэ шунас.”

Ереме́ё 6:14

Ёнэ састякирдэ [састякирэна-р.с.] чхиндло́ фра́нсо (рана) мирэ́-манушэ́нгири вари-сыр, пхэни́: “Рама́нё, рама́нё (миро)!” Ке́ли нанэ рама́нё.

Гиленгири (Соломоно́скири) Гилы́ 3:3

Ракхибнаскирэ (стражы), савэ́ псирэ́на пир фо́ро, латхнэ́ ман – мэ пхуцёмпэ: “Ци дыкхнэ́ тумэ́ кодолэ́с, кэ саво́ миро ди тырдэлапэ.”

4 Kralip 13:21

И сыс адя́кэ, со, ке́ли гарадэ́ екхэ́с манушэ́с, тэды дыкхи́ дава́ баро́ кэ дар халадыбэ́н, мануша́, савэ́ гарадэ́, чхурдынэ́ одолэ́ манушэ́с дрэ Елисеёскири копли́ца; и ёв сыр пыя́, чиладяпэ кэ Елисеёскирэ кокалы́ и отджидыя́, и уштыя́ пэ пэ́скирэ ґэра́.

4 Kralip 7:19

Тэды и отпхэндя́ дава́ тхагарискиро-помогибнаскиро (сановнико) Дэвлэ́скирэ манушэ́скэ и пхэндя́: “Ко́ли бы Дэвэ́л и отчхакирдя́ фэнштры пэ болыбэ́н, и тэды ци могинэлас дава́ тэ явэ́л?” А ёв пхэндя́: “Дыкхэ́са тырэ́ якхэ́нца, нэ тэ хас дава́ на явэ́са.”

4 Kralip 7:2

И отпхэндя́ тхагарискиро-ману́ш, пэ васт савэскиро кра́ли чхудя́ кунь, Дэвлэ́скирэ манушэ́скэ, и пхэндя́: “Ко́ли бы Дэвэ́л и тэ отчхакирэл фэнштры пэ болыбэ́н, и тэды, ци могинэ́ла дава́ тэ явэ́л?” И пхэндя́ одова́: “Ѓа́да, дыкхэ́са тырэ́ якхэ́нца, нэ тэ хас дава́ на явэ́са.”

4 Kralip 5:27

Мэк Нееманоскири прока́за тэ пириячэл кэ ту и кэ тыро́ ро́до пэ ве́ко.” И выгия́ ёв лэ́стыр парно́ проказатыр, сыр ив.

4 Kralip 5:14

И гия́ ёв, и обмордяпэ дро Иорда́но эфта́ мо́лы, пир Дэвлэ́скирэ-манушэ́скиро лав, и ячнэ́ нэвэ лэ́скирэ маса́, сыр маса́ тыкнэ́-чхаворэскирэ, и выжужакирдяпэ.

4 Kralip 4:43

И пхэндя́ лэ́скиро дына́ри: “Со датэ мэ тэ дав шэлэ манушэ́нгэ?” И пхэндя́ ёв: “Отдэ́ манушэ́нгэ, мэк тэ хан; пал-дова́ со адя́кэ ракирэ́ла Рай Дэвэ́л: “Чалёна и ячэ́лапэ.’”

4 Kralip 4:41

И пхэндя́ ёв: “Дэн яржо́.” И чхудя́ лэс дрэ кака́ви, и пхэндя́ Гиезиёскэ: “Чхув манушэ́нгэ, мэк тэ хан.” И на яця́ ничы́ фуипэ́н дрэ кака́ви.

4 Kralip 2:21

И выгия́ ёв кэ пане́скири ґанынгори, и чхурдыя́ одори́к лонд, и пхэндя́: “Адя́кэ ракирэ́ла Рай Дэвэ́л: ‘Мэ кэрдём дава́ пани́ зоралэса, на явэ́ла лэ́стыр буты́р ни мэрибэ́н, ни набияныпэн.’”

4 Kralip 2:14

И лыя́ плашчо Илияскиро, саво́ пыя́ тэлэ́ лэ́стыр, и пэкадя́ лэ́са пир пани́, и пхэндя́: “Кай исын Рай, Дэвэ́л Илияскиро, – Ёв Кокоро́?” И пэкадя́ пир пани́, и ёв розгия́пэ одори́к и адари́к, и пиригия Елисе́ё.

3 Kralip 22:28

И пхэндя́ Михеё: “Ко́ли ту рисёса дро рама́нё, то дава́ на Рай Дэвэ́л ракирдя́ дрэ ма́ндэ.” И ишчо (инкэ́) пхэндя́ ёв: “Шунэ́н ман, сарэ́ мануша́лэ!”

3 Kralip 22:22

Ёв отпхэндя́: “Мэ выджава и ячавапэ хоханэ́ духо́са пэ ушта́ сарэ́ пророкэ́ндэ.” О Рай Дэвэ́л пхэндя́: “Ту уракирэса лэс и лэ́са упралыпэ́н пэ дава́; джа́ и кэр адя́кэ.”

Римлянэнгэ 3:7

Ко́ли миро начачипэ́н кэрэ́ла бицялэдыр Дэвлэ́скиро чачипэ́н и далэ́са кэрэ́ла барэды́р Лэ́скири сла́ва, тэды пал со ишчо (инкэ́) ман тэ сэндинэ́н, сыр грэхитконэ́ манушэ́с?

3 Kralip 22:11

И кэрдя́ пэ́скэ о Сэдэки́я, Хенаанаскиро чхаво́, саструнэ́ шынга́ (ро́ги), и пхэндя́: “Лэ́нца выпихинэса (вышпулэса) Сириянэн (Арамейцэн) пака ту хасякирэса лэн.”

3 Kralip 22:6

И кэдыя кэ пэ кра́ли Израилёскиро пророкэ́н, пашы́л штаршэла́ манушэ́н, и пхэндя́ лэ́нгэ: “Ци тэ джав ма́нгэ марибна́са пэ Рамо́фо Галаадостыр, ци тэ обрикирав пэс?” Ёнэ пхэндлэ́: “Джа́, Рай Дэвэ́л отдэ́ла лэс дрэ васта́ крали́скирэ.”

3 Kralip 18:19

Акана́, бичха́в, и кэдэ кхэтанэ́ пэ бэ́рга Кармило саро́ Израилё, и штаршэла́ пандждэша́ пророкэ́н Ваалоскирэн, и штаршэла́ пророкэ́н, савэ́ чалякирэнапэ Езавелякирэ скаминдэстыр.”

3 Kralip 18:1

И сыс адя́кэ: сыр накхлэ (прогинэ́) бут дывэса́, то сыс лав Ра́скирэ-Дэвлэ́скиро Илияскэ пэ три́то бэрш: “Джа́, сыкадёв Ахавоскэ, и Мэ да́ва брышы́нд пэ пхув.”

3 Kralip 17:1

И пхэндя́ Или́я Фесвитянино, екх манушэ́ндыр, савэ́ дживдэ́ кэ Галаа́до, Ахавоскэ: “Тэ явэ́л джидо́ Рай Дэвэ́л, Дэвэ́л Изра-илёскиро, анги́л Савэ́стэ мэ сом тэрдо́! Дрэ далэ́ бэрша́ на явэ́ла ни пахлын (роса), ни брышы́нд, ко́ли фэ́ни (то́ка) явэ́ла пир миро лав”

Psalmy 124:7

Амаро́ ди насця сыр чириклы фэлятыр, со мануша́ чхувэ́нас тэ ухтылэ́н: фэлы́ исын пхагирды и амэ насцям.

Ekliesiastos 9:12

Пал-дова́ со ману́ш адя́кэ-паць на джинэ́ла пэ́скиро часо: ёв попэрэлапэ сыр мачхэ́ дрэ бибахталы кхуды́ (сеть), сыр чирикля́ дрэ фэлы́, адя́кэ-паць и манушэ́нгирэ чхавэ́ исын дрэ фэля́ дро бибахтало́ часо, ке́ли екха́тыр бари би́да пэрэ́ла пэ лэ́ндэ.

Ереме́ё 23:13

“Машкир пророкэ́ндэ дрэ Сама́рия Мэ дыкхцём дасаво бигодыпэн (дылныпэ́н): ёнэ ангилпхэнас Ваалоскирэ лавэ́са, и ёнэ кэрэ́нас адя́кэ, со Мирэ́ мануша́ Израилёскирэ, дынэпэ дукха́.

Osija 9:7

Явнэ́ дывэса́ тэ дыкхэ́н лэн, явнэ́ дывэса́ ваш сэ́ндо: ту, Израиле, явэ́са тэ джинэ́с пал дава́! О магико исын на барэ-годя́киро; а ману́ш, саво́ россэндякирэлас дро ду́хо (фа́но), исын бигодякиро, пир дова́, со древа́н хор исын тыро́ чорипэ́н, и древа́н зорало́ исын тыро́ намалыпэн (врогима).

Osija 9:9

Ёнэ хор пынэ́ дро биладжаипэ́н, сыр дрэ дывэса́ Гивакирэ. О Дэвэ́л явэ́ла тэ рипирэл лэ́нгиро чорипэ́н, Ёв явэ́ла пхарэ́с тэ сэндякирэ́л пал лэ́нгирэ грэ́хи.

Ереме́ё 11:19

Нэ мэ со́мас сыр рахмано бакроро́, савэ́с лыджинэ́ тэ чхинэн; и мэ на джиндём, со ёнэ придуминдлэ фуипэ́н (биба́хт) пэ ма́ндэ, ракири́: “Явэ́н, хасякираса кашт лэ́скирэ пхабэнца, и явэ́н, чингираса дава́ кашт криг джидэ́ пхувья́тыр, соб (кай) буты́р тэ на рипирэ́н лэ́скиро лав.”