Osija 9:10 - Библия - Пэ Балтитко Романи чиб (Романэс) 2019

¹⁰ Мэ латхём тут, о Израиле, сы́рбы винаграды́тко (дракхитко) мура пэ чхучи́ (пусто) фэ́лда; Мэ дыкхцём тумарэ́ дадэн сы́рбы пэ́рва баритка (пло́ды) пэ инжыритко дрэ́во дро пэ́скиро пэ́рво сезоно. Нэ ке́ли ёнэ гинэ́ кэ Ваалфегоро, тэды ёнэ отдынэ́ пэс ладжаипнаскэ; ёнэ ячнэ́ джунгалэ́ сы́рбы и́долы, со ёнэ камлэ́.

Biblija - Pe Baltitko Romani čib (Romanes) 2019

¹⁰ Me lathjom tut, o Izrailie, sýrby vinagradýtko (drakhitko) mura pe čhučí (pusto) félda; Me dykhcjom tumaré daden sýrby pérva baritka (plódy) pe inžyritko drévo dro péskiro pérvo siezono. Ne kiéli jone giné ke Vaalfiegoro, tedy jone otdyné pes ladžaipnaske; jone jačné džungalé sýrby ídoly, so jone kamlé.

Osija 9:10 Referans Kwoze

Osija 4:14

Мэ на ява́ва пхарэ́с тэ сэндякирав лэ́нгирэ чхае́н, ко́ли ёнэ кэрэ́на биладжаипэ́н и лэ́нгирэ борьен, ко́ли ёнэ камэ́на явирэ муршэ́н, пал-дова́ со лэ́нгирэ мурша́ кокорэ́ кхэтанякирэнапэ налачхэ́ джувле́нца, и ёнэ янэ́на свэ́нта дыибэна́ биладжакунэ́ джувле́нца, а мануша́, савэ́ на джинэ́на бут, хасёна.

Ереме́ё 11:13

Пал-дова́ со кицы́ исын ту́тэ тырэ́ фо́рья, Юдэ́я, ада́кицы ту́тэ исын тырэ́ дэвлорэ́; кицы́ исын вули́цы (га́сы) дро Ерусалимо, ада́кицы тумэ́ чхудэ́ алта́ри пэ ладж, алта́ри, соб (кай) тэ хачкирэ́н дро́га смо́лы Ваалоскэ.

Mihiejo 7:1

Бида ма́ндэ! Пал-дова́ со мэ, сом сы́рбы ману́ш, кон кэдэла лынаитка му́ри, сы́рбы кодолэ́, кон подкэдэла винаградо (дракх), нанэ ние́кх грозно (вэтка му́ри) тэ хав, нанэ ние́кх спяло мурина, со миро ди камэ́ла.

Osija 2:15

И Мэ да́ва ла́кэ винаграды́тка барья одотхы́р и до́ло Ахороскиро, сыр вуда́р тэ ужакирэл лачхипэ́н. Одо́й ёй явэ́ла тэ багал, сыр дрэ дывэса́ ла́кирэ тэрныпнаскирэ, и сыр дро дывэ́с, ке́ли ёй гия́ криг Египто́скирэ пхувья́тыр.

Езэкилё 20:8

Нэ ёнэ ґаздынэ́пэ пэ Ма́ндэ, ёнэ на камэнас тэ кандэ́н Ман, нико́н на отчхурдыя джунгалэ́ и́долы пэ́скирэ якхэ́ндыр, ние́кх на мэкця́ Египто́скирэ и́долы. И Мэ пхэндём: “Вычхувава мэ пэ лэ́ндэ Миро холямипэн и Мэ отхава Мири́ холы́ пэ лэ́ндэ пэ пхув.

Amoso 4:5

янэ́н свэ́нта дыибэна́ парикирибнаса пэ рошчына, подэн звесь (зан) и дэн тэ джинэ́н сарэ́нгэ пал во́льно яныбэ́н: дава́ исын пир ило́ тумэ́нгэ, чхавэ́ Израилёскирэ”, – ракирэ́ла Рай Дэвэ́л.

Osija 11:1

Пэ зло́ко (пэ ра́нко) кра́ли Израилёскиро хасёла! ‘Сыр Израилё сыс бия́то, ёв яця́ дро́го Ма́нгэ, и Мэ кхардём Мирэ́ чхавэ́с Египто́стыр.

Ереме́ё 31:2

Адя́кэ ракирэ́ла Рай Дэвэ́л: “Мануша́, савэ́ ячнэ́пэ джидэ́ куртала́тыр, латхнэ́ тангипэ́н (ла́ска) Ма́ндыр пэ чхучи́ пхув, Мэ джа́ва тэ дав рама́нё Израилёскэ’”

Ереме́ё 5:31

проро́ки ангилпхэнэна хохаибэ́н, рашая́ хулаинэна лэ́нгирэ лавэ́нца, и Мирэ́ мануша́ камэ́на дава́. Нэ со ёнэ явэ́на тэ кэрэ́н дро ко́нцо (дро яго́ро)?”

Isajos 28:4

И зашутинэ лулудяса лэ́скирэ гожонэ урибнастыр, сави́ исын пэ лачхи́ фэ́лда, кэрэ́на адя́кэ, сыр смокваса, сави́ сы́гэс выбария анги́л сроко, и палдава́, кон дыкхэ́ла ла, екха́тыр (сра́зу) лэ́ла вастэ́са и ха́ла екхэ ґлытанкоса.

Psalmy 81:12

Нэ мирэ́ мануша́ на шундлэ́ Мири́ зан (глос), и Израилё на кандыя́ ман.

3 Kralip 16:31

Лэ́скэ на ухтылэлас (сыс на́доси) дова́, со ёв пыя́ дрэ грэ́хи Еровоамоскирэ, кон сыс чхаво́ Наватоскиро, а ёв ишчо (инкэ́) лыя́ Езавель дрэ ромня́тэ, чха Ефваалоскирья, кон сыс кра́ли Сидоноскиро, и ёв лыя́ тэ дынаринэ́л Ваалоскэ и тэ дэл паты́в лэ́скэ.

Сэндарьенгири Лылвари́ 6:32

И лыя́ тэ кхарэл лэс Гедеонос долэ́ дывэсэ́стыр Иероваалоса, пал-дова́ со пхэндя́: “Мэк Ваало кокоро́ тэ сэндинэлпэ лэ́са, пал-дова́, со ёв роспхагирдя́ лэ́скиро алта́рё.”

Яви́р Зако́но 32:17

яндлэ́ свэ́нто дыибэ́н ваш налачхэ́ ду́хи, и на Дэвлэ́скэ, а дэвлорэ́нгэ, савэ́н ёнэ на джиндлэ́, нэвонэнгэ, савэ́ явнэ́ суседендыр, и пал савэ́ на думиндлэ лэ́нгирэ дада́.

Яви́р Зако́но 32:10

Ёв латхя́ лэс пэ чхучи́ пхув, пэ мал (степ), сави́ сыс биманушэнгири и наобживдлы, ракхця́ лэс, дыкхця́ пал лэ́стэ, ракхця́ лэс, сыр Пэ́скири чачи́ (право) якх;

Яви́р Зако́но 4:3

Якха́ тумарэ́ дыкхнэ́ саро́, со кэрдя́ Рай Дэвэ́л Ваал-Фегороса: кажнонэ́ манушэ́с, саво́ кэрдя́ сыр Ваал-Фегоро, традыя́ криг Рай Дэвэ́л, Дэвэ́л тыро́, тырэ́ манушэ́ндыр;

Čysly 15:39

и явэ́на ёнэ дрэ тумарэ́ чиба́ (кисти) ваш дова́, соб (кай) тумэ́, дыкхи́ пэ лэ́ндэ, тэ пририпирэн сарэ́ Ра́скирэ-Дэвлэ́скирэ припхэныбэна́, и тэ кэрэ́н саро́ пир лэ́ндэ, и тэ на псирэ́н пала́л пал тумаро́ ило́ и пал тумарэ́ якха́, савэ́ лыджа́на тумэн кэ кэрэ́н биладжаипэ́н,

Римлянэнгэ 6:21

Савэ лачхэ́ рэ́нды тумэ́ тэды кэрдэ́? Долэ́, савэ́ндыр тумэ́ какана́ кокорэ́ ладжана, пал-дова́ со лэ́нгиро ко́нцо (яго́ро) исыс мэрибэ́н.

Psalmy 115:8

[16] мэк сарэ́, кон кэрдя́ лэн, тэ явэ́н бизорья́кирэ, сыр ёнэ исын; адя́кэ-паць и сарэ́ одолэ́, кон патя́ла дрэ далэ́ и́долы.

Ереме́ё 3:24

Пал-дова́ со ладж, со кэрдэ́ амарэ́ дада́ тэрныпнастыр, похалас лэ́нгирэ-бакрэ́нгирэ ста́ды и тэды, лэ́нгирэ чхавэ́н и чхае́н.

Ереме́ё 24:2

Екх кхудо (корзина) сыс древа́н лачхэ́ инжыроса сыр пэ́рва спе́ла му́ри, и яви́р кхудо сыс древа́н адасавэ́ налачхэ́ инжыроса, со лэ́скирэ му́ри сыс нашты́ тэ хас.

Osija 4:18

Лэ́нгиро матыбэн исын джунгало́ (брыдко), ёнэ дурэды́р кэрэ́на биладжакунэ́ рэ́нды, лэ́нгирэ тхагарьенгэ (князенгэ) трэй илэ́стыр бипатыв.

Čysly 18:13

Саро́ пэ́рво, со дэ́ла лэ́нгири пхув, савэ́ ёнэ янэ́на Ра́скэ-Дэвлэ́скэ, мэк тэ явэ́н тырэ́; кажно жужо́ (чысто) ману́ш дро тыро́ кхэр сашты́ (могинэ́ла) тэ хал дава́.

4 Kralip 17:11

И лынэ́ одо́й тэ хачкирэ́н дро́га смо́лы пэ сарэ́ вучипэна́, сыр Наюды́тка мануша́, савэ́н вытрадыя́ лэ́ндыр Рай Дэвэ́л, и кэрдэ́ налачхэ́ рэ́нды, савэ́ холякирэнас Рас-Дэвлэ́с.

Гиленгири (Соломоно́скири) Гилы́ 3:6

“Кон адава́ исын, саво́ уштэ́ла чхучэ́ прахэндыр, сы́рбы баро́ тхув ґаздэ́лапэ, саво́ исын тхувлякирдо миро́са и гудлэ́ смоласа, и кажнонэ́ лачхэ́-сунгакирэ драбэнца тылгарьендыр (купцэндыр).

Ереме́ё 3:25

Амэ сам паштэ́ дрэ амари́ ладж, и амаро́ биладжаипэ́н чхакирдя амэн: пал-дова́ со амэ кэрдя́м грэ́хо проти Растэ-Дэвлэ́стэ, амарэ́ Дэвлэ́стэ: амэ и амарэ́ дада́, амарэ́ тырныпнастыр кэ ададывэ́с, и амэ на кандыям Ра́скирэ-Дэвлэ́скири, амарэ́-Дэвлэ́скири зан!”

Osija 13:5

Мэ дыкхцём пал ту́тэ пэ чхучи́ пхув, пэ штэ́ты, кай сыс баро́ шукипэн.