Osija 10:12 - Библия - Пэ Балтитко Романи чиб (Романэс) 2019

¹² Почхувэн дрэ пхув ваш пэ́скэ пир чачипэ́н; счхинэн тэлэ́ пир лачхэ́-илы́ткима, и ґаздэ́н тумари́ напочхуды фэ́лда; пал-дова́ со исын часо тэ родэ́н Рас-Дэвлэ́с анги́л дова́, сыр Ёв явэ́ла и почхувэла чачипна́са сыр брышындэса пэ тумэ́ндэ.

Biblija - Pe Baltitko Romani čib (Romanes) 2019

¹² Počhuven dre phuv vaš péske pir čačipén; sčhinen telé pir lačhé-ilýtkima, i ĥazdén tumarí napočhudy félda; pal-dová so isyn časo te rodén Ras-Devlés angíl dová, syr Jov javéla i počhuvela čačipnása syr bryšyndesa pe tuménde.

Osija 10:12 Referans Kwoze

Jakov 3:18

А чачипэ́н дэ́ла аплодо одолэ́ манушэ́нгэ, савэ́ кокорэ́ кэрэ́на рама́нё (миро) и причхувэна зор ваш дава́.

Isajos 45:8

Мэк болыбэ́н тэ дэл брышы́нд, мэк тэ чхувэлпэ чачипэ́н болыбна́стыр, мэк тэ откэрэлпэ пхув, соб (кай) тэ дэл зракхибэ́н, мэк кхэтанэ́ тэ барьёл чачипэ́н. Мэ, Рай Дэвэ́л, кэра́ва саро́ дава́.

Pritčy 11:18

Фуй ману́ш кэрэ́ла дошвалы буты́, нэ одова́, кон росчхувэла чачипэ́н, дорэсэ́ла мишто́ мазу́ри (награда).

Isajos 55:6

Родэ́н Рас-Дэвлэ́с, ко́ли сашты́ тэ латхэ́н Лэс; кхарэ́н Лэс, ко́ли Ёв исын пашы́л.

Osija 6:3

Амэ́нгэ трэй тэ джинас буты́р, амэ́нгэ трэй тэ причхувас тэ джинас буты́р Рас-Дэвлэ́с, Лэ́скиро явибэн явэ́ла сыр зло́ко, Ёв явэ́ла сыр брышы́нд, сыр ґаратуно брышы́нд (позднё), со панякирэла пхув.’

Isajos 44:3

Мэ вычхувава пани́ пэ одолэ́стэ, кон древа́н камэ́ла пани́, и барэ́ панинга́ пэ дова́, со вышутия; Мэ вычхувава Миро ду́хо (фа́но) пэ тыро́ кхэри́тко ро́до и бахтякирибэ́н Миро пэ тырэ́ чхаворэндэ, савэ́ ишчо (инкэ́) явэ́на анги́л.

Ekliesiastos 11:6

Тасярлатунэ (раннёнэ) злокостыр почхув пэ́скири зя́рка дрэ пхув, нэ бэльвэлятыр на тангинэ (на жалин) тыро́ васт ваш буты́, пал-дова́ со ту на джинэ́са, со удэлапэ кэ миштыпэ́н, ци дава́ рэ́ндо, ци дова́ рэ́ндо, ци дуй далэ́ рэ́нды, явэ́на лачхэ́.

Psalmy 105:4

Родэ́н Рас-Дэвлэ́с и Лэ́скири зор, родэ́н Лэс усады (сак):

Luka 13:24

“Спробинэн зоралэ́с тэ заджа́н пир цясно вуда́р, пал-дова́ со бут мануша́, Мэ пхэна́ва тумэ́нгэ, явэ́на тэ родэ́н, соб (кай) тэ заджа́н андрэ́, и ёнэ на дэ́на ра́да (змогинэна).

Amoso 5:15

Бидыкхэн тумэ́ чорипэ́н (биба́хт), нэ выкэдэн лачхипэ́н, и тумэ́ кэрэ́н адя́кэ, соб (кай) тэ явэ́л чачипэ́н пашы́л по́рта (вра́ты) форо́скири, сашты́ тэ явэ́л, со Рай Дэвэ́л, янголэ́нгирэ-болыбна́скиро Дэвэ́л, явэ́ла тэ тангинэ́л одолэ́н, кон ячэ́лапэ манушэ́ндыр Езаскирэндыр (Иосифостыр).”

Amoso 5:6

Родэ́н Рас-Дэвлэ́с и тумэ́ явэ́на тэ дживэ́н, соб (кай) Ёв тэ на кэрэ́л адя́кэ, со яг пэрэ́ла сы́гэс пэ кхэр Ёзаскиро, и хачкирэ́ла сарэ́са лэс адя́кэ, со на явэ́ла ние́кх тэ мурдякирэл яг дрэ Вефиль.

Isajos 31:1

Бида одолэ́нгэ, савэ́ джа́на дро Еги́пто пал подрикирибэ́н, наде́я лэ́нгири пэ грэ́ндэ и пэ марибны́тка вурдэна́, пал-дова́ со бут лэн исын, пэ манушэ́ндэ, савэ́ традэ́на уклистэ́ пэ грэ́ндэ, савэ́ исын зоралэ́, а пэ Свэ́нто Израилё ёнэ на дыкхэ́на, и кэ Рай Дэвэ́л ёнэ на джа́на!

Amoso 5:4

Палдава́ адя́кэ ракирэ́ла Рай Дэвэ́л кхэрэ́скэ Израилёскирэскэ: “Тумэ́ родэ́н Ман и явэ́на джидэ́.

Osija 12:6

И ту, Яково́скиро ўнуко (непото), рисёв палэ кэ Дэвэ́л тыро́: ракх (дыкх) тангипэ́н (лачхэ́-илы́ткима) и чачуно́ сэ́ндо, и ўса́ды (сак) ужакир лачхипэ́н тумарэ́ Дэвлэ́стыр.

Amoso 5:8

родэ́н Лэс, Кон создыя́ чэргэненгири група Плеады (Эфта́-чэргэнитко) и Орионо (Чэргэня́ пэ Васто́ко). Кон парувэла зэр (тень) мэрибнаскири пэ ясно зло́ко (ра́нко), Кон кэрэ́ла адя́кэ, со дывэ́с ячэ́ла сыр калы рат. Кон кхарэ́ла кэ Пэ панинга́ морёскирэ (дэрьявэ́скирэ), и Ёв росчхувэла лэн пир сари́ пхув, – Рай Дэвэ́л исын Лэ́скиро лав.

Osija 8:7

Ёнэ посеиндлэ балва́л, и ёнэ счхинэна штормо: сыр гива́ лэ́ндэ сарэ́са на явэ́на пэ ґэро́й (колосо); на явэ́ла прибарипэн дро яржо́. Ко́ли и выбарьёла лэ́ндэ вари-со, то э чу́жа мануша́ накхавэна (проглынинэна) яржо́ (гив).

Apostolengiri Butý 2:18

и пэ Мирэ́ писхарьендэ, сыр пэ муршэндэ адя́кэ-паць и пэ джувлендэ, Мэ чхува́ва Миро Ду́хо (Фа́но) дрэ долэ́ дывэса́, и ёнэ явэ́на тэ ангилпхэнэн.

Езэкилё 34:26

Мэ бахтякирава лэн и пхувья́, савэ́ исын пашы́л Мири́ бэ́ргица; Мэ ява́ва тэ бичхавав брышы́нд, ко́ли трэй, кадалэ́ явэ́на бахтякирибнаскирэ брышында.

Isajos 32:20

Бахталэ́ исын тумэ́, кон сеинэла пашо пани́, и кон бичхавэ́ла одори́к гурувэ́с и осло́с.

Isajos 30:23

И Ёв дэ́ла ту́кэ брышы́нд, ко́ли засеинэса фэ́лда и маро́, саво́ янэ́ла пхув сыр барьякирдо́ (пло́до), лачхо́ маро́ дэ́ла ту́кэ; тырэ́ гурува лэ́на тэ чаравэнпэ дро дова́ дывэ́с пэ лачхэ́ фэ́лды.

Ереме́ё 50:4

Дрэ долэ́ дывэса́ и дро дова́ часо’, – ракирэ́ла Рай Дэвэ́л, – ‘чхавэ́ Израилёскирэ и сарэ́ чхавэ́ Юда́скирэ явэ́на кхэтанэ́, и ёнэ явэ́на, рови, соб (кай) тэ родэ́н Рас-Дэвлэ́с, пэ́скирэс Дэвлэ́с.

Isajos 5:6

Дасавэса Мэ лэс ячкирава: на явэ́на тэ обчхинэн лэс, на явэ́на тэ обґанавэн лэс, забарьёла ёв налачхэ́ чарьяса, Мэ припхэнава болыбнаскэ, соб (кай) ёв тэ на дэл брышы́нд лэ́скэ.”

Pritčy 18:21

Дрэ чиб исын зор ваш джиибэ́н, ци ваш мэрибэ́н. Кон камэ́ла тэ ракирэ́л, одолэ́скэ трэй тэ ужакирэл ци екх, ци яви́р.

Psalmy 72:6

Кра́ли явэ́ла сыр брышы́нд пэ фэ́лда чарьяса, сыр баро́ панинг, со чхувэ́лапэ пэ пхув.

2 Коринфянэнгэ 9:10

И Дэвэ́л, Саво́ дэ́ла зя́рки тэ чхувэ́н дрэ пхув и маро́ тэ хан, дэ́ла тумэ́нгэ саро́ и барьякирэ́ла саро́ и явэ́ла барвало́ аплодо тумарэ́ чачипнастыр:

Isajos 48:18

Нэ ко́ли б ту шундя́н Мирэ́ лава́! Тэ́ньци б рама́нё (миро) тыро́ тэ явэ́л сыр рэка (лэнь), чачипэ́н тыро́ – сыр рэ́ки (лэня́) барэ́.

Osija 14:1

[13.16-ю.о.] Мануша́ Самариятыр явэ́на бангэ́ палдова́, со ёнэ кэрдэ́ бу́нто проти лэ́нгирэ Дэвлэ́стэ. Ёнэ пэрэ́на куртала́тыр, лэ́нгирэ бияты явэ́на росчингирдэ (пэкадэ) пэ котэра́, и лэ́нгирэ пхарэ́ джувлятыр отлэна тыкнэмасэн.’

Isajos 54:14

Ту явэ́са зоралы́ чачипна́са, на трэй ту́кэ тэ дарэс, пал-дова́ со нико́н ту́кэ буты́р на дэ́ла пхарипэ́н, ту на явэ́са тэ дарэс, пал-дова́ со ёв кэ ту на подджа́ла.