Marko 9:12 - Библия - Пэ Балтитко Романи чиб (Романэс) 2019

¹² И Ёв отпхэндя́ лэ́нгэ: “Чачо́, со Или́я англэды́р сыс банго́ тэ явэ́л и тэ кэрэ́л саро́ нэвэ́стыр, сыр и исын чхиндло́ пал Чхавэ́стэ Манушэскирэстэ, со приявэлапэ Лэ́скэ бут тэ пирилыджал мэ́ньки, и со Ёв явэ́ла ладжакирдо́?

Biblija - Pe Baltitko Romani čib (Romanes) 2019

¹² I Jov otphendiá lénge: “Čačó, so Ilíia angledýr sys bangó te javél i te kerél saró nevéstyr, syr i isyn čhindló pal Čhavéste Manušeskireste, so prijavelape Léske but te pirilydžal mén'ki, i so Jov javéla ladžakirdó?

Marko 9:12 Referans Kwoze

Isajos 50:6

Мэ отдыём Миро думо, соб (кай) тэ марэ́н Ман; Мирэ́ чама (шчоки), соб (кай) тэ пэкавэн; муй Миро Мэ на закэрдём кошыбнастыр и чунгардыпнастыр.

Isajos 52:14

Кицы́ мануша́ дивинэнаспэ, ке́ли дыкхнэ́ пэ Ту́тэ! Ёв адя́кэ парудяпэ марибнастыр, со на сыс Лэ́стэ манушы́тко муй, адя́кэ Ёв выдыкхэлас, со и на сыс Лэ́стэ манушы́тко патри́н (о́бразо)?

Luka 23:11

Иродо пэ́скирэ халадэнца кэрдэ́ бипатывакирибэн Лэ́скэ и сандлэпэ холямэс Лэ́стыр, урьякирдэ пэ Лэ́стэ парно́ крали́тко урибэ́н и бичхадя́ палэ Лэс кэ Пила́то.

Isajos 49:7

Адя́кэ ракирэ́ла Рай Дэвэ́л, Израилёскиро Свэ́нто, Саво́ выкиндя Израилё, адя́кэ ракирэ́ла кэ народо, савэ́с сарэ́ кошэна и традэ́на, саво́ исын писха́ри барэ́ рандэ: “Кра́лья дыкхэ́на и уштэна; тхага́рья (кня́зи) пэ чанга́ пэрна ваш Ра́скэ-Дэвлэ́скэ, Саво́ исын чачуно́, ваш Свэ́нто Израилёскиро, Саво́ Тут выкэдыя́.”

Заха́рия 13:7

О, Курта́ля! Ѓаздэпэ пэ пастырёстэ Мирэстэ и пэ сэмэнцатэ Мирьятэ, ракирэ́ла янголэ́нгирэ-болыбна́скиро Рай Дэвэ́л. Замар пастырёс, и роспрастанапэ бакрэ́! И Мэ протырдава васт Миро кэ тыкнэ́.

Luka 1:76

И тут, чхаворо́, явэ́на тэ кхарэ́н пророкоса Най Вучэдырэскирэса, пал-дова́ со ту явэ́са тэ джас анги́л Растэ-Дэвлэ́стэ тэ скэдэс дром Лэ́скэ,

Малахия 4:6

И ёв рискирэ́ла дадэ́нгиро ило́ кэ чхавэ́, чхавэ́нгиро ило́ кэ дада́, соб (кай) Мэ, сыр ява́ва, тэ на обчхував пхув прокошыбнаса.

Luka 23:39

Екх розмарибнарьендыр, саво́ сыс примардо, сандяпэ холямэс Исусо́стыр: “Ци на сан Ту Христо́со? Зра́кх Пэс и амэн.”

Матфеё 26:24

Чачэс, Чхаво́ Манушэ́скиро джа́ла, сыр исын чхиндло́ пал Лэ́стэ, нэ би́да кодолэ́ манушэ́скэ, саво́ здэла Чхавэ́с Манушэскирэс; фэды́р явэ́лас ваш лэ́скэ тэ на бияндёл.”

Матфеё 16:21

Долэ́ часостыр лыя́ Ису́со тэ ракирэ́л яснэс Лэ́скирэ сыкляибнытконэ́нгэ, со Лэ́скэ трэй тэ джал дро Ерусалимо и бут мэ́ньки тэ пиридживэл годэпхурэндыр и рашангирэндыр и лылваритконэндыр, и явэ́ла Ёв замардо, и пэ три́то дывэ́с Ёв отджидёла.

Заха́рия 11:13

И пхэндя́ ма́нгэ Рай Дэвэ́л: “Чхурдэ лэн дрэ пири́ кхангирья́кири, – кадасави вучи́ тими́н, сави́ ёнэ дынэ́ пал Ма́ндэ! И лыём Мэ трия́нда рупуворэ и чхурдыём лэн дро Кхэр Ра́скирэ-Дэвлэ́скиро ваш манушэ́скэ, кон липинэл пирья глинатыр (глэятыр).

Psalmy 74:22

Ушты́, о Дэ́вла, тэрдёв пал Тыро́ чачипэ́н: ри́пир, сыр дылынэ́ мануша́ обракирэна Тут со дывэ́с.

Marko 9:13

Нэ Мэ ракира́ва тумэ́нгэ, со Или́я ужэ явдя́, и мануша́ кэрдэ́ Лэ́са, со сыс пэ ило́ лэ́ндэ, сыр дава́ и сыс чхиндло́ пал лэ́стэ.”

Marko 9:31

Пал-дова́ со Ёв сыклякирдя́ Пэ́скирэ сыкляибнытконэ́н, и пхэндя́ лэ́нгэ: “Чхавэ́с Манушэскирэс здэна дрэ манушэ́нгирэ васта́, и ёнэ мулякирэна Лэс; и мулякирдо Ёв отджидёла пир трин дывэса́.”

Marko 10:33

“Амэ джа́са пашылэды́р кэ Ерусалимо, и Чхаво́ Манушэ́скиро явэ́ла здыно раша́нгирэ барыдырэ́нгэ и лылваритконэнгэ: ёнэ засэндинэна Лэс пэ марибэ́н и здэна Лэс Наюдэ́нгэ;

Apostolengiri Butý 1:6

Палдава́, ке́ли сыкляибны́тка скэдынэ́пэ кхэтанэ́, ёнэ пхучнэ́ Лэ́стыр: “Ра́ё Дэ́вла! Ци на яця́ дава́ часо, соб (кай) Ту тэ кэрэ́с нэвэ́стыр Израилёскиро Кралипэ́н?”

Apostolengiri Butý 4:11

Ису́со исын сы́рбы ‘дова́ Бар, саво́ на прилынэ́ бутитка пэ кхэр, саво́ яця́ вэнглоскирэ шэралэ́ Барэса.’