Joannostir 6:51 - Библия - Пэ Балтитко Романи чиб (Романэс) 2019

⁵¹ Мэ сом джидо́ маро́, саво́ явдя́ болыбна́стыр; кон явэ́ла тэ хал Миро маро́, одолэ́ манушэ́скэ дэ́лапэ ве́чно джиибэ́н; маро́, саво́ Мэ да́ва, исын Мири́ лоч (маса́), савэ́ Мэ отда́ва, соб (кай) свэ́то тэ дживэ́л.”

Joannostir Svencono lačopheniben 1933 (Latvia)

⁵¹ Me isom džīdo māro, sav javela telle bolibnastir; habnaskīro da māro jāla džīdo sajek; māro, sav Me dava, isi Mīre masa, saje Me otdava vaš svetosko džīben.

Biblija - Pe Baltitko Romani čib (Romanes) 2019

⁵¹ Me som džidó maró, savó javdiá bolybnástyr; kon javéla te xal Miro maró, odolé manušéske délape viéčno džiibén; maró, savó Me dáva, isyn Mirí loč (masá), savé Me otdáva, sob (kaj) svéto te dživél.”

Joannostir 6:51 Referans Kwoze

Luka 22:19

Тэ́ньци Ису́со лыя́ маро́, парикирдя Дэвлэ́с (Дэвлэ́скэ), пхагирдя́ лэс, и дыя́ лэ́нгэ; ракири́: ‘Ѓа́да, исын Мирэ́ Маса́, савэ́ отдэнапэ пал тумэ́ндэ; дава́ адя́кэ и тумэ́ кэрэ́н тэ рипирэ́н пал Ма́ндэ.”

Joannostir 6:33

Пал-дова́ со Дэвлэ́скиро маро́ исын Одова́, Саво́ явэ́ла (джа́ла тэлэ́) болыбна́стыр и дэ́ла джиибэ́н свэтоскэ.”

Joannostir 3:13

Нико́н на сыс пэ болыбэ́н апри́ч Одолэ́стэ, кон гия́ тэлэ́ болыбна́стыр, дава́ исын Чхаво́ Манушэ́скиро, Саво́ дживэ́ла дро Болыбна́скиро Раё.

Titoske 2:14

Саво́ отдыя́ Пэс пал амэ́ндэ, соб (кай) Ёв тэ зракхэ́л амэн сарэ́ начачунэ рэндэ́ндыр, тэ кэрэ́л амэн жужэ́ манушэ́нца, соб (кай) амэ тэ явас екх Лэ́скирэ манушэ́нца, савэ́ древа́н тырдэнапэ тэ кэрэ́н лачхипэ́н.

Матфеё 20:28

адя́кэ сыр Чхаво́ Манушэ́скиро явдя́ на ваш дова́, соб (кай) Лэ́скэ тэ дынаринэ́л, нэ соб (кай) Ёв тэ дынаринэ́л и тэ отдэ́л Пэ́скиро джиибэ́н, сыр выкиныбэ́н пал бутэндэ.”

Юдэ́нгэ 10:20

Ёв дыя́ зор амэ́нгэ тэ проджас пир шы́рма нэвонэ́ и джидэ́ дромэ́са, саво́ исын пир Лэ́скири лоч (плоть);

2 Коринфянэнгэ 5:21

Пэ Христосо́стэ, Савэ́стэ на сыс грэ́хо, Дэвэ́л чхудя́ сарэ́ амарэ́ грэ́хи сыр свэ́нто отдыибэ́н, соб (кай) амэ тэ ячаспэ чачунэнца анги́л Дэвлэ́стэ пир Христосо́стэ.

1 Petr 2:4

Явэ́н пашылэды́р кэ Ёв, Саво́ исын сы́рбы джидо́ бар, Савэс мануша́ на прилынэ́, а Савэс Дэвэ́л выкэдыя́ сыр Дрогонэс Лэ́скэ,

Эфесянэнгэ 5:2

дживэ́н дрэ паты́в кэ яви́р мануша́, сыр и Христо́со сыкадя́ паты́в амэ́нгэ и отдыя́ Пэс пал амэ́ндэ, сыр гудло́ кхандыпэн и свэ́нто дыибэ́н, саво́ исын лачхо́ Дэвлэ́скэ.

Joannostir 3:16

Дэвлэ́скэ адя́кэ яця́ дро́го свэ́то, со Ёв отдыя́ Пэ́скирэ Екхэбияныпнытконэ Чхавэ́с, соб (кай) кажно, кон явэ́ла тэ патял дрэ Лэ́стэ, тэ на хасёл, а тэ явэ́л лэ́стэ ве́чно джиибэ́н.

Joannostir 1:29

Пэ яви́р дывэ́с Иа́но дыкхэ́ла Исусо́с, Саво́ джа́ла кэ ёв и ракирэ́ла: “Ѓа́да, исын Дэвлэ́скиро Свэ́нто Бакроро́, Саво́ лэ́ла пэ Пэ́стэ свэтоскиро грэ́хо.

1 Ian 4:14

И амэ дыкхцям и сам якхи́тка (якхалэ), со Дад бичхадя́ Чхавэ́с тэ зракхэ́л свэ́то.

1 Ian 4:10

Акэ, дро со пшалы́тко паты́в исын: дава́ нанэ, со амэ́нгэ яця́ дро́го Дэвэ́л, а дава́ исын, со Лэ́скэ яця́м дро́га амэ и Ёв бичхадя́ Пэ́скирэ Чхавэ́с тэ страдынэл (тэ пирилыджал пхарипэ́н) кэ мэрибэ́н пал амарэ́ грэ́хи.

1 Ian 2:2

и Ёв исын Кодова́, Кон пирилыджия пхарипэ́н кэ мэрибэ́н Пэ́скирэ ратэ́са пал амарэ́ грэ́хи сы́рбы свэ́нто дыибэ́н, и на фэ́ни (то́ка) пал амарэ́, а адя́кэ-паць пал грэ́хи сарэ́ свэто́скирэ.

Joannostir 1:14

И Лав яця́ манушэ́са дрэ лоч (плоть) и дживдя́ амэ́нца; и амэ дыкхцям Лэ́скиро ярко шукарипэ́н и зор, сави́ сыс Лэ́стэ сыр Екхэбияныпнытконэ Чхавэ́стэ, Саво́ исын Дадэ́стэ, и Саво́ исын пхэрдо́ бахталыпнаса и чачипна́са.

Эфесянэнгэ 5:25

Мурша́лэ, сыкавэ́н паты́в пэ́скирэ ромне́нгэ адя́кэ, сыр Христо́со сыкадя́ паты́в Кхангирьякэ и отдыя́ Пэс пэ мэрибэ́н пал ла́тэ,

2 Коринфянэнгэ 5:19

пал-дова́ со Дэвэ́л пир Христосо́стэ примириндя свэ́то Пэ́са и примангдя лэ́нгирэ грэ́хи, и Ёв чхудя́ дро амаро́ ило́ лав, соб (кай) амэ тэ ячас Лэ́скэ рахманонэ манушэ́нца.

Joannostir 7:38

Кон патя́ла дрэ Ма́ндэ, – сыр исын пхэндло́ дро Свэ́нто Чхиныбэ́н, – ‘Лэ́скирэ илэ́стыр явэ́на тэ тхадэн рэ́ки (лэня́) джидэ́ пане́са.’”

Joannostir 3:14

Сыр Мо́йза (Моисеё) ґаздыя́ сапэс пэ чхучи́ пхув, адя́кэ Чхавэ́скэ Манушэскирэскэ трэиндя́ тэ явэ́л ґаздыно́,

Joannostir 3:36

Одова́, кон патя́ла дрэ Дэвлэ́скирэ Чхавэ́стэ, лэ́стэ явэ́ла ве́чно джиибэ́н; а кон на патя́ла дрэ Дэвлэ́скирэ Чхавэ́стэ, одова́ на дыкхэ́ла джиибэ́н, а Дэвлэ́скири холы́ явэ́ла пэ лэ́стэ саро́ ве́ко.”

Joannostir 5:24

Чачэс, чачэс Мэ ракира́ва тумэ́нгэ: одова́, кон шунэ́ла Миро Лав и патя́ла Кодолэ́скэ, Кон бичхадя́ Ман, лэ́стэ исын ве́чно джиибэ́н и ёв пэ сэ́ндо на явэ́ла, ёв какана́ пиригия мэрибна́стыр дро джиибэ́н.

Joannostir 6:35

Ису́со пхэндя́ лэ́нгэ: “Мэ кокоро́ сом джиибна́скиро маро́; одова́, кон явэ́ла кэ Мэ, на явэ́ла ние́кхвар бокхало, и одова́, кон патя́ла дрэ Ма́ндэ, ние́кхвар на явэ́ла тэ камэл тэ пьел.

Joannostir 6:41

Э Юды ракирдэ́ холямэс пэ Лэ́стэ пал дова́, со Ёв пхэндя́: “Мэ сом маро́, саво́ явдя́ болыбна́стыр.”

Joannostir 6:47

Чачэс, чачэс Мэ ракира́ва тумэ́нгэ: одова́, кон патя́ла дрэ Ма́ндэ, кодолэ́скэ дэ́лапэ ве́чно джиибэ́н’.

Joannostir 6:48

Мэ сом джиибна́скиро маро́.

Joannostir 6:50

Тумарэ́ дада́ ханэ́ кхурми пэ чхучи́ пхув и мынэ́.

Joannostir 11:26

И кажно, кон исын джидо́ и патя́ла дрэ Ма́ндэ, на мэрэ́ла ние́кхвар. Ци патя́са ту дро дава́?”