Isajos 10:17 - Библия - Пэ Балтитко Романи чиб (Романэс) 2019

¹⁷ Дуд (свэ́то) Израилёскиро явэ́ла яга́са, и Свэ́нто лэ́скиро – долэ́ яга́са, сави́ схачкирэ́ла и схала лэ́скирэ пхусадэ́ чарья́ дро екх дывэ́с.

Biblija - Pe Baltitko Romani čib (Romanes) 2019

¹⁷ Dud (svéto) Izrailjoskiro javéla jagása, i Svénto léskiro – dolé jagása, saví shačkiréla i shala léskire phusadé čarjá dro jekh dyvés.

Isajos 10:17 Referans Kwoze

Isajos 27:4

Нанэ Ма́ндэ холы́. Нэ ко́ли вари-кон чхувэ́ла проти Ма́ндэ дрэ лэ́стэ пхусадэ́ чарья́, то Мэ джа́ва пэ лэ́стэ марибна́са, сарэ́са лэс схачкирава.

Sykadyipén 22:5

И рат на явэ́ла буты́р и лэ́нгэ на явэ́ла трэй лампакиро дуд (свэ́то) и дуд кхамэстыр, пал-дова́ со Рай Дэвэ́л явэ́ла тэ дэл лэ́нгэ дуд. И ёнэ явэ́на тэ кралинэн пэ сарэ́ ве́ки.

Naumo 1:10

На дыкхи́ пэ дова́, со тумэ́ спэнтындлэпэ кхэтанэ́ сыр пхусадытка хру́сты, и спинэпэ сыр матымарья, тумэ́ явэ́на тэ хачон сыр пхусэскири цецива (шуко пхус).

Ереме́ё 7:20

Палдава́ адя́кэ ракирэ́ла Рай Дэвэ́л, Дэвэ́л: “Акэ, Мири́ холы́ и Миро холякирибэ́н вычхувэнапэ пэ дава́ штэ́то – пэ манушэ́стэ, и пэ кхэритконэ́ мурдалэ́ндэ (ското); пэ фэлды́тка кашта́, и пэ пхаба́, со барьёна пэ пхув. Мири́ холы́ явэ́ла тэ хачол сы́рбы яг, и на мурдёла.

Ереме́ё 4:4

Обчхинэн пэс ваш Ма́нгэ, Ра́скэ-Дэвлэ́скэ, и злэн цы́па тумарэ́ илэндыр, тумэ́, мануша́лэ Юдэя́тыр, и кон дживэ́ла кэ Ерусалимо, соб (кай) тэ на пэрэ́л Миро холякирибэ́н сыр яг, и соб (кай) тэ захачол адя́кэ, со нико́н на мудькирэла, пал-дова́ со тумэ́ кэрдэ́ биба́хт.

Isajos 37:23

Конэ́с ту кошэсас и калякирэсас? Пэ конэ́стэ годлэсас и пэ конэ́стэ ґаздыян тырэ́ якха́ адя́кэ вучэ́с? Пэ Свэнтонэ́ Израилёскирэ Дэвлэ́стэ.

Čysly 16:35

И выгия́ яг Ра́стыр-Дэвлэ́стыр и хая одолэ́н дуйшэла́ пандждэша́ муршэ́н, савэ́ яндлэ́ гудлэ́ смо́лы (фимиа́мо).

Sykadyipén 21:23

Фороскэ на трэй ни кхам, ни чхон тэ дэл дуд (свэ́то), соб (кай) тэ зяинэл дро лэ́стэ. Дэвлэ́скири ярко сла́ва зяинэла дудэ́са дро фо́ро и Бакроро́ исын сы́рбы момолы́тко (свети́льнико).

Юдэ́нгэ 12:29

Пал-дова́ со амаро́ Дэвэ́л исын яг, сави́ саро́ хачкирэ́ла.

Матфеё 3:12

Лэ́скиро ґанадытко (лопата) исын дрэ Лэ́скиро васт, и Ёв жужакирэла (чыстинэла) Пэ́скиро шу́рна и скэдэ́ла Пэ́скиро парно́ гив дрэ пиралы́, а пхус хачкирэ́ла яга́са, сави́ на мурдёла.”

Isajos 66:24

“И ёнэ явэ́на тэ выджа́н и явэ́на тэ дыкхэ́н одолэ́-манушэ́нгирэ тру́пы, кон отгия́ Ма́ндыр; пал-дова́ со кирмо лэ́нгиро на хасёла, и яг лэ́нгири на мурдёла; ёнэ явэ́на сыр джунгалыпэ́н (магирипэ́н) ваш кажно лоч (плоть).”

Isajos 60:19

Кхам ту́кэ буты́р на явэ́ла тэ дэл дуд (свэ́то), чхон на ячэ́ла тэ свэнцынэл, нэ Рай Дэвэ́л явэ́ла тырэ́ дудэса (свэтоса) ве́чнэс, Дэвэ́л явэ́ла тырэ́ барэ́ патыва́са.

Isajos 37:36

И выгия́ Янго́ло Дэвлэ́скиро и замардя́ дро Асирия́кирэ-халадэ́нгиро ста́но шэл охтодэша́ пандж тысёнцы манушэ́н. Уштынэ́ пэ са́мо зло́ко (зоря) и, акэ, – сарэ́ мануша́ исын мулэ́.

Isajos 33:14

Пиридарандынэ (страха́дынэ) грэхи́тка мануша́ пэ Сио́но, дарэ́на и издрана бидэвлыткарья! “Кон амэ́ндыр выдживэла паш яг, сави́ саро́ похала, кон выдживэла паш яг, сави́ хачола ве́чнэс?”

Isajos 31:9

И дара́тыр пирипрастала ёв пашы́л пэ́скири тва́рдыма (крепость), и раё лэ́скирэ дарэ́на сыкаибнастыр” – ракирэ́ла Рай Дэвэ́л, Конэ́скири яг исын пэ Сио́но, Конэ́скиро бов исын дро Ерусалимо.

Isajos 9:18

Пал-дова́ со грэ́хо росхачия, сыр яг ха́ла пхусадэ́ чарья́, хачола дрэ вэша́, и тхув ґаздэ́лапэ стылбоса.

Psalmy 97:3

Яг джа́ла анги́л Лэ́стэ и хачкирэ́ла сарэ́са Лэ́скирэ сарэ́ вэргэ́н, савэ́ исын трусця́л Лэ́стэ

Psalmy 84:11

Пал-дова́ со екх дывэ́с пэ Тыри́ грэ́да исын фэды́р, сыр бар (тысёнцо) дывэса́. Мэ выкэдыём фэды́р тэ тэрдёвав пашы́л вуда́р Дэвлэ́скирэ-Кхэрэ́скиро, сыр тэ джива́в дрэ ша́тры, кай фуй мануша́.

Psalmy 50:3

Амаро́ Дэвэ́л явэ́ла и Ёв исын на штыл; яг, сави́ ха́ла саро́, джа́ла анги́л Лэ́стэ и явэ́ла древа́н штормитко балва́л.

Psalmy 27:1

Давидо́скиро Пса́лмо. Рай Дэвэ́л исын миро дуд (свэ́то) и Ёв зракхэ́ла ман; конэ́стыр ма́нгэ тэ страхадёвав? Рай Дэвэ́л приракхэла ман Лэ́скирэ зоралыпнаса; конэ́стыр мэ тэ дарав?

Psalmy 21:9

Тыро́ васт доджа́ла кэ сарэ́ лэ́скирэ вэ́рги; Тыро́ чачо́ васт ухтылэ́ла сарэ́н, кон бидыкхэла Тут.

Psalmy 18:8

Тэ́ньци пхув тринскирдяпэ и издрандыя, тэлатунэ́ бара́ бэргэндыр кхардэпэ (двигиндлэпэ) и издрандынэ, пал-дова́ со Дэвэ́л холя́сыя.

Isajos 26:11

Раё Дэ́вла! Тыро́ васт сыс вучэ́с ґаздыно́, нэ ёнэ лэс на дыкхнэ́; дыкхэ́на и ладжана, кон бидыкхэла (нашты́ тэ дыкхэ́л) пэ Тыро́ народо; яг ха́ла Тырэ́ вэргэ́н.

Isajos 27:7

Ци марэлас лэс Рай Дэвэ́л адя́кэ сыр явирэ манушэ́н? Ци замарэлас лэс адя́кэ, сыр явирэ́н замарэлас?

Isajos 30:33

Пал-дова́ со Тофето ґара́ кэрдо́; ёв сыс кэрдо́ ваш крали́скэ, ёв исын хор и бугло; дрэ яг лэ́скири бут кашта́ чхудэ́; пхурдыпэн Ра́скирэ-Дэвлэ́скиро лэс захачкирэла лэс сыр хачкирды се́ра (дзэвэ́ля).

Isajos 31:1

Бида одолэ́нгэ, савэ́ джа́на дро Еги́пто пал подрикирибэ́н, наде́я лэ́нгири пэ грэ́ндэ и пэ марибны́тка вурдэна́, пал-дова́ со бут лэн исын, пэ манушэ́ндэ, савэ́ традэ́на уклистэ́ пэ грэ́ндэ, савэ́ исын зоралэ́, а пэ Свэ́нто Израилё ёнэ на дыкхэ́на, и кэ Рай Дэвэ́л ёнэ на джа́на!

Isajos 33:12

И явэ́на народы сыр хачкирды звёска, сыр пхусады чар, сави́ счхиндлэ; и явэ́на зхачкирдэ яга́са.

Isajos 47:14

Акэ, ёнэ исын сыр пхус, яг схачкирдя́ лэн, на зракхнэ́ ёнэ пэ́скиро джиибэ́н ягатыр; ничи́ на яця́пэ – ни вангар, соб (кай) тэ татёс, ни яг, соб (кай) тэ бэшэс на́бут паш ла́тэ.

Заха́рия 12:6

Дро дова́ дывэ́с Мэ кэра́ва ран Юдаскирэн – сыр хич (скороведа) яга́са машки́р кашта́ и сыр момолы́тко (свети́льнико) машки́р ґарбы (снопы), и ёнэ повымарна сарэ́н пашылатунэн манушэ́н чачэ́ и зэрвонэ (левонэ) рига́тыр, и нэвэ́стыр явэ́на дро Ерусалимо мануша́ пэ лэ́скиро, Ерусалимоскиро штэ́то.

Яви́р Зако́но 4:24

пал-дова́ со Рай Дэвэ́л, Дэвэ́л тыро́, исын яг, сави́ ха́ла, исын Дэвэ́л зэвлыныпнаскиро.

Софония 1:18

Ни лэ́нгиро руп, ни сувнака́й нашты́ (на змогинэна) тэ зракхэн лэн дро дова́ дывэ́с барэ́ Ра́скирэ-Дэвлэ́скирэ холынатыр. Лэ́скирэ-зэвлыныпнаскири яг ха́ла сарэ́са сари́ пхув, пал-дова́ со Ёв янэ́ла сы́гэс ко́нцо (яго́ро) пэ сарэ́ндэ, кон дживэ́ла пэ пхув.