Ереме́ё 5:3 - Библия - Пэ Балтитко Романи чиб (Романэс) 2019

³ Раё Дэ́вла! Ци на дыкхэ́на Тырэ́ якха́ пал патяибэ́н? Ту пэкавэса лэн пэ мэрибэ́н, нэ лэ́нгэ на дукхана даба (удары) (нанэ дукхано); Ту домарэсас лэн, нэ ёнэ отпхэндэпэ, соб (кай) Ту тэ пирисыклякирэс лэн: ёнэ кэрдэ́ пэ́скирэ муя́ зоралэды́р скалатыр, ёнэ отпхэндэпэ тэ рисён палэ кэ Ту.

Biblija - Pe Baltitko Romani čib (Romanes) 2019

³ Rajo Dévla! Ci na dykhéna Tyré jakhá pal patiaibén? Tu pekavesa len pe meribén, ne lénge na dukhana daba (udary) (nane dukhano); Tu domaresas len, ne jone otphendepe, sob (kaj) Tu te pirisykliakires len: jone kerdé péskire muiá zoraledýr skalatyr, jone otphendepe te risjon pale ke Tu.

Ереме́ё 5:3 Referans Kwoze

Ереме́ё 7:28

И ту пхэнэ́са лэ́нгэ: “Дая́ исын манушы́тко нацыя, сави́ на кандэ́ла пэ́скири Ра́скирэ-Дэвлэ́скири зан, и сави́ на сыклёла пхарэ́ сыклякирибнастыр: нанэ патяибэ́н лэ́ндэ, ёв сы́рбы лыно́ криг лэ́нгирэ мо́стыр.

Ереме́ё 2:30

Ивья́ (напра́снэс) мулякирдём Мэ тумарэ́ чхаворэ́н, ёнэ на прилынэ́ дова́, пал со мэ пирисыклякирдём лэн. Тумэ́ кокорэ́ зачингирдэ куртала́са пэ́скирэ пророкэ́н, сы́рбы шчэр (ле́во), со похала саро́.

Софония 3:7

Мэ пхэндём форо́скирэ манушэ́нгэ: “Чачэс, тумэ́ фэ́ни (то́ка) дарэ́н Ма́ндыр, соб (кай) Мэ тэ пирисыклякирав тумэн”, соб (кай) тумарэ́ кхэра́ тэ на явэ́н хасякирдэ́, соб (кай) Мэ на сэндякирав пхарэ́с тумэн. Нэ ёнэ тася́рлэс (ра́нэс) уштынэ́, и кэрдэ́ саро́ бипатывакирэс.

Isajos 9:13

Нэ народо на обрисёла кэ Одова́, Кон марэла лэс, на родэ́ла Рас-Дэвлэ́с, болыбна́скирэ-янголэнгирэс.

2 Паралипоменоно 16:9

пал-дова́ со якха́ Ра́скирэ-Дэвлэ́скирэ обдыкхэна сари́ пхув, соб (кай) тэ подрикирэс одолэ́н, конэ́скиро ило́ сарэ́са отдыно́ Лэ́скэ. Нагодьварэс ту кэрдя́н акана́. Палдава́ далэ́ дывэсэ́ндыр явэ́на ту́тэ марибэна.”

Isajos 42:25

И Ёв вычхудя́ пэ лэ́ндэ Пэ́скири холы́ и марибны́тко холямипэн; ёй хачола яга́са сарэ́ ригэ́ндыр, нэ ёнэ на дыкхнэ́; хачолас лэ́ндэ, нэ ёнэ на ґалынэ́ дава́ илэ́са.

Юдэ́нгэ 12:9

И ишчо (инкэ́): ке́ли амэ́ндэ сыс дада́ пир амаро́ рат, савэ́ сыклякирдэ́ амэн, и палдава́ амэ кутякирдям лэн, тэды ци пэ бут буты́р амэ́нгэ трэй тэ кандас амарэ́ Дадэ́с пэ ду́хо (фа́но), соб (кай) тэ джива́с?

Римлянэнгэ 2:2

Нэ амэ джина́са, со пэ адалэ́ манушэ́ндэ, кон кэрэ́ла дасаво-паць, исын чачуно́ Дэвлэ́скиро сэ́ндо.

Езэкилё 24:13

Дро тыро́ нажужыпэн исын тырдыпэ́н тэ кэрэ́л джунгалыпэ́н, нэ пал-дова́, со Мэ жужакирдём тут, а ту усае́кх сан нажужо. Ко́ли вычхувава Мэ пэ ту́тэ саро́ Миро холямипэн, тэ́ньчи ту явэ́са жужакирды.

Ереме́ё 32:19

Ту сан барэ́-годя́киро тэ дэс годы́ и зор тэ кэрэ́с рэ́нды. Тырэ́ якха́ откэрдэ пэ сарэ́ дрома́, савэ́нца чхавэ́ манушэ́нгирэ псирэ́на, соб (кай) тэ дэн кажнонэ́скэ (сваконэскэ) пир лэ́скиро дром, и пир барьякирдэ́ (пло́ды) лэ́скирэ кэрибнастыр/ рэндэ́ндыр.

Ереме́ё 19:15

Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: “Акэ, Мэ яна́ва биба́хт [бари би́да-р.с.] пэ дава́ фо́ро и сарэ́ лэ́скирэ форицы, пэ савэ́ Мэ припхэндём биба́хт, пал-дова́ со ёнэ пхарьякирдэ пэ́скирэ мэня, соб (кай) лэ́нгэ тэ на шунэ́н мирэ́ лава́.”

Ереме́ё 7:26

нэ ёнэ на кандынэ́ Ман, и ёнэ на причхудэ кан тэ шунэ́н, нэ ёнэ пхарьякирдэ пэ́скирэ мэня. Ёнэ кэрдэ́ фуеды́р пэ́скирэ дадэндыр.

Isajos 48:4

Мэ джиндём, со ту на камэ́са тэ кандэс, дрэ тыри́ мэн исын саструнэ́ жылы, тыро́ чэкат исын харкуно (медно).

Pritčy 27:22

Мэк ту тэ тоўчынэс (тэ курэс) дылынэс дрэ ступа тоўкачоса, нэ усае́кх лэ́скиро дылныпэ́н на дурьёла лэ́стыр,

Pritčy 23:35

И пхэнэ́са: “Ёнэ пэкадэ ман, нэ мэ на сом дукхадо, ёнэ шпулдэ (пихиндлэ) ман, и мэ на джиндём. Ке́ли мэ джангадёвава? Мэ ява́ва тэ родав усае́кх тэ выпьяв нэвэ́стыр (нэвэ́с).”

Pritčy 22:12

Ра́скирэ-Дэвлэ́скирэ якха́ ракхэна джиныбэ́н, нэ Ёв равэла тэлэ́ лава́, савэ́ исын напатяибнаскирэ манушэ́ндыр.

Pritčy 21:29

Фуй ману́ш кашталякирэла пэ́скиро муй, нэ дэвлы́тко зоралэ́с джинэ́ла пэ́скиро дром.

Psalmy 51:6

Анги́л Ту́тэ, Екхэ́стэ, мэ кэрдём грэ́хо и кэрдём фуипэ́н анги́л Тырэ́ якха́. И чачуно́ явэ́ла Тыро́ ракирибэ́н и патяибны́тко явэ́ла Тыро́ сэ́ндо.

2 Паралипоменоно 28:22

И дрэ пхарэ́ ваш пэ́скэ дывэса́ ёв усае́кх кэрдя́ на пир Зако́но анги́л Растэ-Дэвлэ́стэ, ёв – кра́ли Аха́зо.

Левито 26:23

Ко́ли и пало́ дава́ Мэ на высыклякирава тумэн, и тумэ́ джа́на пэ Ма́ндэ,

4 Kralip 1:13

И нэвэ́стыр бичхадя́ пэ три́то мо́ло пандждэшытконэс лэ́скирэ пандждэшэ манушэ́нца. И ґаздыя́пэ, и явдя́ три́то пандждэшытко, и пыя́ пэ пэ́скирэ чанга́ анги́л Илиястэ, и мангдя́ лэс, и ракирдя́ лэ́скэ: “О Ману́ш Дэвлэ́скиро! Мэк тэ на явэ́л ди миро и ди тырэ́-писхарье́нгиро – далэ́ пандждэша́ манушэ́нгири – анги́л якха́ тырэ́.

Ереме́ё 8:5

Со́скэ кадалэ́ Мирэ́ мануша́ Ерусалимо́стыр пэрэ́на буты́р [отджана-р.с.] и зоралэды́р чачипнастыр? Ёнэ рикирэнапэ зоралэ́с кэ хохаибэ́н, ёнэ на камэ́на тэ рисён.

Ереме́ё 35:13

‘Адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: “Джа́ и пхэн манушэ́нгэ Юдэя́тыр и одолэ́нгэ, кон дживэ́ла кэ Ерусалимо: ‘Ци на прилэ́на тумэ́ упхэныбэ́н тэ шунэ́н Мирэ́ лава́?’”, – ракирэ́ла Рай Дэвэ́л.

Езэкилё 2:4

Адалэ́ чхавэ́ исын биладжакирдэ мо́са и захалэ илэ́са; Мэ бичхава́ва тут кэ ёнэ, а ту пхэнэ́са лэ́нгэ: “Адя́кэ ракирэ́ла Рай Дэвэ́л, Дэвэ́л!

Дание́лё 9:13

Сыр чхиндло́ исын дро Мойза́скиро Зако́но, адя́кэ сари́ кадая́ би́да мардя амэн; нэ амэ на мангдям дрэ па́тери (моли́тва) Рас-Дэвлэ́с амарэс, соб (кай) амэ́нгэ тэ рисёвас амарэ́ бизаконытконэ рэндэ́ндыр, и тэ ґалёвас чачипэ́н Тыро́.

Amoso 4:6

“И Мэ дыём адя́кэ-паць тумэ́нгэ нангэ данда́, би хабнаскиро дрэ сарэ́ тумарэ́ фо́рья, и на явэ́ла тэ ухтылэл маро́ пэ сарэ́ тумарэ́ штэ́ты, нэ тумэ́ на рисинэ́ кэ Мэ”, – ракирэ́ла Рай Дэвэ́л.

Džiibén 19:34

Пэ яви́р дывэ́с пхурэдыршо пхэн пхэндя́ тыкнэдыршонакэ: “Ѓа́да, мэ тася́ со́мас суты мирэ́ дадэ́са: матькираса лэс и дрэ дая́ рат; и ту джа́ и сов лэ́са, и биянаса амарэ́ дадэ́стыр чхавэ́н.”

3 Kralip 13:33

И пало́ (после) дава́, со выгия́, Еровоа́мо на гия́ криг пэ́скирэ налачхэ́ дромэ́стыр, нэ дурыдыр чхувэлас манушэ́ндыр раша́н пэ вучипна; кон камдя́, одолэ́с ёв высвэнцындя, и одова́ ячэлас раша́са пэ вучипна.

Psalmy 51:8

Ѓа́да, Ту камэ́са, соб (кай) мэ тэ явав чачуно́ дро ило́ и Ту сыклякирэса ман, соб (кай) мэ тэ явав годо́ дрэ гарадэ́ мысли.

Psalmy 55:20

Дэвэ́л явэла тэ шунэ́л и отпхэнэ́ла лэ́нгэ, дава́ Ёв, Саво́ исын пэ троно пэ сарэ́ ве́ки. Сэ́ла. Нэ ёнэ на парудёна, нанэ лэ́ндэ трашаибэ́н Дэвлэ́стыр.

Isajos 26:11

Раё Дэ́вла! Тыро́ васт сыс вучэ́с ґаздыно́, нэ ёнэ лэс на дыкхнэ́; дыкхэ́на и ладжана, кон бидыкхэла (нашты́ тэ дыкхэ́л) пэ Тыро́ народо; яг ха́ла Тырэ́ вэргэ́н.

Ереме́ё 3:3

Палдава́ панинга́ сыс пририкирдэ, и на сыс вэснакирэ брышында и тумэ́ндэ чиката ячнэ́ сы́рбы налачхэ́ джувля́тэ, нэ тумэ́ на прилынэ́ ладжакирибэн.

Ереме́ё 15:7

И Мэ росчхурдава лэн веелоса (барэ́ лопатаса) пал по́рты пэ пхув; и Мэ ла́ва криг сарэ́са лэ́нгирэ чхаворэ́н, и Мэ хасякира́ва Мирэ́ манушэ́н: пал-дова́ со ёнэ на рисёна пэ́скирэ дромэндыр.

Ереме́ё 17:23

Нэ ёнэ на кандынэ́, и ёнэ на причхудэ пэ́скиро кан, а ёнэ штывакирдэ пэ́скирэ мэня, соб (кай) ёнэ на могиндлэ́ тэ шунэ́н ци тэ прилэ́н сыклякирибэ́н.

Ереме́ё 44:10

Тумэ́ кэ ададывэ́с на тыкнякирдэ пэс, на лынэ́ тэ дарэ́н, тумэ́ на кэрдэ́ пир Миро Зако́но ци пир Мирэ́ стату́ты, савэ́ Мэ дыём тумэ́нгэ и тумарэ́ дадэ́нгэ.

Amoso 4:8

Палдава́ дуй, ци трин фо́рья гинэ́ кэ яви́р фо́ро тэ пьен пани́, нэ ёнэ на пинэ́ чалэ́с, нэ усае́кх тумэ́ на рисинэ́ кэ Мэ”, – ракирэ́ла Рай Дэвэ́л.

Amoso 4:9

“Мэ дукхававас тумэн шукэ́ насвалыпнаса (иржаса) и зэлэнэ кирныпнаса пэ гив; листэнгирэ кирмэ (гусеницы) поханас бут тумарэ́ унты (сады), и тумарэ́ винаградники (дракхитка), и тумарэ́ инжыритка кашта́, тумарэ́ маслинитка кашта́, нэ тумэ́ на рисинэ́ кэ Мэ”, – ракирэ́ла Рай Дэвэ́л.

Amoso 4:10

“Мэ бичхававас пэ тумэ́ндэ мэрибнытка фра́нсы, сыр и пэ Еги́пто: Мэ мулякиравас тумарэ́ тэрнэ́ муршэ́н куртала́са кхэтанэ́ грэнца, савэ́н лэнас дро пле́но; Мэ кэравас адя́кэ, доя́ кхан (смрадо) ґаздэласпэ пир тумарэ́ станы (таборы) дрэ тумарэ́ рутхуня, нэ тумэ́ на рисинэ́ кэ Мэ”, – ракирэ́ла Рай Дэвэ́л.

Amoso 4:11

“Мэ рававас тэлэ́ тумарэ́ фо́рья, сыр Мэ, тумаро́ Дэвэ́л, радём тэлэ́ Содо́мо и Гомо́ра, и тумэн сыр ґломня выухтылэн ягатыр, со хачия, нэ тумэ́ усае́кх на рисинэ́ кэ Мэ”, – ракирэ́ла Рай Дэвэ́л.