Ереме́ё 21:7 - Библия - Пэ Балтитко Романи чиб (Романэс) 2019

⁷ И пало́ (после) дава́, – ракира́ва Мэ, Рай Дэвэ́л, – Мэ отда́ва Сэдэкияс, Юдэя́кирэ крали́с, и лэ́скирэ дынарье́н, и яви́р манушэ́н кадалэ́ форо́стыр, савэ́ ячэ́напэ джидэ́ франсэндыр, куртала́тыр и бокхалыпнастыр дрэ Навуходоноскирэ васта́, Вавилоно́скирэ крали́стэ, дрэ тумарэ́-вэргэ́нгирэ васта́, и дрэ кодолэнгирэ васта́, савэ́ родэ́на тумаро́ джиибэ́н. И ёв мулякирэ́ла тумэн курталакирэ ягороса. Ёв на явэ́ла тэ тангинэ́л (тэ жалинэл) тумэн, тэ тангинэ́л, и ёв на явэ́ла лачхэ́-илытко кэ тумэ́.”

Biblija - Pe Baltitko Romani čib (Romanes) 2019

⁷ I paló (poslie) davá, – rakiráva Me, Raj Devél, – Me otdáva Sedekijas, Judejákire kralís, i léskire dynar'jén, i javír manušén kadalé foróstyr, savé jačénape džidé fransendyr, kurtalátyr i bokhalypnastyr dre Navuhodonoskire vastá, Vavilonóskire kralíste, dre tumaré-vergéngire vastá, i dre kodolengire vastá, savé rodéna tumaró džiibén. I jov muliakiréla tumen kurtalakire jagorosa. Jov na javéla te tanginél (te žalinel) tumen, te tanginél, i jov na javéla lačhé-ilytko ke tumé.”

Ереме́ё 21:7 Referans Kwoze

Ереме́ё 37:17

то кра́ли Сэдэки́я бичхадя́ тэ янэл лэс яври́. О кра́ли пхучэлас чораханэ́с лэ́стыр дро пэ́скиро кхэр и пхэндя́: “Ци исын вари-саво́ лаворо Ра́стыр-Дэвлэ́стыр?” И отпхэндя́ Ереме́ё: “Исын.” Тэ́ньци ёв пхэндя́: “Тут выдэна дрэ васта́ крали́скирэ Вавилоно́стыр!”

Езэкилё 7:9

И на потангинэла тут Мири́ якх, и Миро ило́ на ковлёла кэ ту. Мэ отда́ва палэ ту́кэ пир тырэ́ дрома́, и чорипэна тырэ́ явэ́на ту́са, и тумэ́ ґалёна, со Мэ сом Рай Дэвэ́л, Дэвэ́л, Саво́ пхарэ́с сэндякирэ́ла.

Ереме́ё 13:14

И Мэ чикавава (пэкавава) лэн екх пир екхэ́стэ, сыр дадэн, адя́кэ-паць и чхавэ́н кхэтанэ́, – ракирэ́ла Рай Дэвэ́л, – и Мэ на ява́ва лачхэ́-илэ́скиро кэ ёнэ, и Мэ на ява́ва тэ тангинав (тэ жалинав) лэн, и Ма́ндыр на явэ́ла тангипэ́н (ла́ска) лэ́нгэ, а Мэ хасякира́ва лэн.’”

Яви́р Зако́но 28:50

мануша́ биладжаипнытка, савэ́ на дэ́на паты́в пхурэ́ манушэ́скэ и на тангинэна (на жалинэна) тэрнэс;

Езэкилё 9:10

Пал дова́ на потангинэла лэн Мири́ якх, и на ковлёла Миро ило́; нэ Мэ да́ва лэнгрэ рэ́нды палэ пэ лэнгрэ шэрэ́.

Езэкилё 8:18

Пал дова́ Мэ ява́ва тэ кэра́в холямипнаса: на потангинэла Мири́ якх, и на поковлёла Миро ило́. Мэк ёнэ тэ годлэн дрэ Мирэ́ кана́ зоралэ́ заня́са, нэ Мэ на шунава лэн.”

Isajos 47:6

Холясыём Мэ пэ Миро народо, хасякирдём Мирэ́ чхавэ́н, отдыём лэн дрэ тырэ́ васта́, Вавило́но, а ту на потангиндян лэн; пхуро́ ману́ш лыджия́ тыро́ пхарипэ́н.

Isajos 27:11

Ко́ли лэ́скирэ рандя́ зашутёна, лэн обпхагирэна; явэ́на джувля́ (манушня) и схачкирэна лэн. Пал-дова́ со ёнэ исын народо бигодякиро, Ёв на потангинэла лэн, Одова́, Кон саро́ создыя́.

Ереме́ё 15:5

Пал-дова́ со, кон потангинэла тут, Ерусалимо? Кон сыкавэ́ла лачхэ́-илы́ткима ту́кэ? Кон заджа́ла кэ ту тэ пхучэс, сыр ту сан?

Ереме́ё 15:9

Э дай, сави́ бияндя́ эфта́ тыкнэн, ёй выпхурдыя палатуно́ ду́хо (фа́но); ла́киро кхам гия́ тэлэ́, мэк дава́ ишчо (инкэ́) исын дывэ́с; ёй исын ладжакирды и запхагирды дрэ годы́. И кон ячэ́лапэ, кодолэ́н Мэ пиридава курталакэ анги́л лэ́нгирэ вэргэ́ндэ’, – пхэндя́ Рай Дэвэ́л.

Ереме́ё 22:25

и Мэ отда́ва тут дрэ одолэнгирэ васта́, савэ́ камэ́на тэ замарэ́н тут, и дрэ кодолэскирэ васта́, конэскирэ мо́стыр ту дарэса – васта́ Навуходоносороскирэ, крали́стэ Вавилоно́стыр, и – васта́ Халдеенгирэ.

Ереме́ё 27:6

И акана́ Мэ да́ва сарэ́ далэ́ пхувья́ дро васт Навуходоносороскиро, крали́скэ пэ Вавило́но, Мирэ́ писхари́скэ, и Мэ да́ва адя́кэ-паць фэлдытконэ мурдалэ́н лэ́скэ тэ дынаринэ́н лэ́скэ.

Ереме́ё 34:3

И ту на зракхэсапэ лэ́скирэ вастэ́стыр, нэ тут маму́й лэ́на и пиридэна дро васт лэ́скиро; и тырэ́ якха́ дыкхэ́на якха́ крали́скирэ Вавилоно́стыр, ёв явэ́ла тэ ракирэ́л ту́са муял (муй пэ муй) и ту джа́са кэ Вавило́но.’

Езэкилё 23:28

Пал-дова́ со адя́кэ ракирэ́ла Рай Дэвэ́л, Дэвэ́л: ‘Акэ, Мэ отда́ва тут дрэ васта́ кодолэнгирэ, конэ́с ту зоралэ́с на камэ́са дрэ васта́ кодолэнгирэ, конэ́стыр отгия́ тыро́ ило́.

Ереме́ё 14:12

Ке́ли ёнэ явэ́на тэ постынэн, Мэ на ява́ва тэ шунав лэ́нгири го́дла; и ке́ли ёнэ янэ́на цэ́ла хачкирибэна, и свэ́нта дыибэна́ гивэстыр, Мэ на прилава лэн: пал-дова́ со Мэ хасякира́ва лэн куртала́са, барэ́ бокхаса и франсэнца.”

Ереме́ё 19:7

И Мэ кэра́ва адя́кэ, со ничы́ на явэ́ла мол зракирибэ́н пэ скэдыны кэ Юдэ́я и кэ Ерусалимо пэ дова́ штэ́то, и Мэ кэра́ва адя́кэ, со ёнэ пэрэ́на куртала́тыр анги́л пэ́скирэ вэргэ́ндэ, и кодолэнгирэ вастэ́стыр, савэ́ родэ́на лэ́нгиро джиибэ́н, и Мэ кэра́ва адя́кэ, со лэ́нгирэ тру́пы Мэ да́ва сыр хабэ́н болыбнытконэ чириклэнгэ и мурдалэ́нгэ пэ пхув.

Ереме́ё 20:4

Пал-дова́ со адя́кэ ракирэ́ла Рай Дэвэ́л: ‘Акэ, Мэ кэра́ва адя́кэ, со Ту, Пасхоро, явэ́са тэ дарэс кокоро́ пэ́стыр, и адя́кэ-паць сарэ́ Тырэ́ дру́ги (мала́), и ёнэ пэрэ́на вэргэ́нгирэ куртала́тыр и тырэ́ якха́ явэ́на тэ дыкхэ́н дава́. И Мэ отда́ва сари́ Юдэ́я дрэ Вавилоно́скирэ-крали́скирэ васта́ и ёв лыджа́ла криг лэн дро пле́но кэ Вавило́но, и одо́й ёв мулякирэ́ла лэн куртала́са.

Ереме́ё 32:4

и Сэдэки́я, кра́ли Юдэя́киро, на зракхэ́лапэ Халдее́нгирэ вастэ́ндыр, нэ ёв адя́кэ пэрэ́ла дро васт крали́скиро Вавилоно́скиро, и ёв явэ́ла тэ ракирэ́л лэ́са муял (муй пэ муй), и тэ дыкхэ́л лэс якх пэ якх;

Ереме́ё 36:29

И ту пхэн Иоакимоскэ, крали́скэ пэ Юдэ́я, – ‘адя́кэ ракирэ́ла Рай Дэвэ́л: ‘Ту хачкирдян дава́ сви́тко, пхэни́: ‘Со́скэ ту чхиндян пэ лэ́стэ, со о кра́ли Вавилоно́скиро, чачэс, явэ́ла и хасякирэ́ла дая́ пхув, и ёв кэрэ́ла адя́кэ, со на явэ́ла ни ману́ш, ни мурда́л (жывотно) одо́й.’”

Ереме́ё 50:17

‘Мануша́ Израилёскирэ исын сы́рбы бакрэ́, савэ́ росчхурдынэ, кай якха́ дыкхэ́на, шчэра́ (левы) рострадынэ лэн криг: англэды́р кра́ли Асирия́киро похая лэн, и акана́, палатуно́ (после́днё) кадава́ Навуходоносо́ро, кра́ли Вавилоно́скиро, пхагирдя́ лэ́нгирэ кокалы́.’

Roiben 2:20

“Дыкх, Раё Дэ́вла, и обдумин, конэ́скэ Ту кэрдя́н адя́кэ? Соб (кай) джувля́ тэ хан пэ́скиро барьякирдо́ (пло́до), конэ́с ёнэ барьякирдэ́? Соб (кай), хай, тэ мулякирэ́н раша́с и пророко́с пэ Ра́скирэ-Дэвлэ́скиро Свэ́нто Штэ́то?

Roiben 2:22

Ту кхардян кхэтанэ́ сы́рбы пэ свэнкитко дывэ́с траша, со обгинэ трусця́л ман; дро дывэ́с, сыр Ту холясыян, ние́кх на насця, на яця́пэ. Кодолэ́н, конэ́скэ мэ давас колы́н и конэ́с мэ барьякирдём, мирэ́ вэ́рги выханэ.”