Ереме́ё 10:4 - Библия - Пэ Балтитко Романи чиб (Романэс) 2019

⁴ Ёнэ гожакирэна лэс сувнака́са и рупэ́са, ёнэ прикэрэна лэс гвоздэнца (карфинэнца) и чоканэнца (млоткэнца), соб (кай) ёв тэ на роспхадёл пэ котэра́.

Biblija - Pe Baltitko Romani čib (Romanes) 2019

⁴ Jone gožakirena les suvnakása i rupésa, jone prikerena les gvozdenca (karfinenca) i čokanenca (mlotkenca), sob (kaj) jov te na rosphadjol pe koterá.

Ереме́ё 10:4 Referans Kwoze

Isajos 46:7

Ёнэ лэ́на лэс пэ псикэ́, лыджа́на лэс, чхувэ́на пэ лэ́скиро штэ́то, ёв исын тэрдо́, ёв на зджа́ла штэто́стыр; мануша́ годлэна, нэ ёв ничи́ на пхэнэ́ла, на ракхэ́ла бидатыр.

Isajos 44:12

Фаурнари (ковалё) кэрэ́ла састырэстыр товэр, и ёв обкэрэла пэ вангара лэс; выкэрэла лэс барэ́ млотэнца и обкэрэла лэс пэ́скирэ зоралэ́ вастэ́са; адя́кэ кэрэ́ла буты́, со ёв ячэ́ла бокхало и бизорья́киро, ёв на пьела пани́, и ёв кхинёла.

Psalmy 135:15

Наюдытконэ́-нацыенгирэ и́долы исын рупэ́стыр и сувнака́стыр, манушэ́нгирэ васта́ кэрдэ́ лэн:

Psalmy 115:4

[12] Нэ лэ́нгирэ и́долы (хоханэ́ дэвлорэ́) исын рупэ́стыр и сувнака́стыр, савэ́ манушэ́нгирэ васта́ кэрдэ́:

Isajos 46:6

Мануша́ дорэсэ́на сувнака́й кисыкатыр, ублавэна руп и кхарэ́на манушэ́с, соб (кай) ёв тэ кэрэ́л лэ́стыр дэвлэс; мангэ́нпэ дэвлэскэ и пэрэ́н пэ чанга́ анги́л лэ́стэ.

Osija 13:2

Акана́ ёнэ кэрэ́на грэ́хи бутэды́р и барэды́р, и ёнэ кэрдэ́ ваш пэ́скэ вычхудэ́ муя́, и́долы рупэ́стыр пир пэ́скиро джиныбэ́н, сарэ́ кадалэ́ статулы кэрдэ́ графарья (спецы тэ рисынэн) дрэ вастытка бутя́. И ёнэ пхэнэ́на: ‘мэк мануша́, кон янэ́ла свэ́нто дыибэ́н, тэ чамудэн гуруворэ́н.’

Avakumo 2:19

Бида пэ лэ́стэ, кон ракирэ́ла пэ кашт: “Джангадёв (ушты́)!”, кашукэ (мутонэ) барэскэ: “Ушты́!” Ци явэ́ла ёв тэ сыклякирэ́л? Акэ, ёв исын пиричхудо сувнака́са и рупэ́са, нэ нанэ джидо́ ду́хо (фа́но) дрэ лэ́стэ.