Ереме́ё 10:10 - Библия - Пэ Балтитко Романи чиб (Романэс) 2019

¹⁰ Нэ Рай Дэвэ́л исын чачуно́ Дэвэ́л: Ёв исын джидо́ Дэвэ́л и Кра́ли пэ сарэ́ ве́ки. Лэ́скирэ холя́тыр издрала пхув и манушы́тка на́цыи на дэ́на ра́да тэ вырикирэн, сыр Ёв холясо́ла зоралэ́с.

Biblija - Pe Baltitko Romani čib (Romanes) 2019

¹⁰ Ne Raj Devél isyn čačunó Devél: Jov isyn džidó Devél i Králi pe saré viéki. Léskire xoliátyr izdrala phuv i manušýtka nácyi na déna ráda te vyrikiren, syr Jov xoliasóla zoralés.

Ереме́ё 10:10 Referans Kwoze

Яви́р Зако́но 32:4

Ёв исын зоралы́ Твардыма; Лэ́скирэ рэ́нды исын бидошэнгирэ, и сарэ́ дрома́ Лэ́скирэ исын чачунэ́. Дэвэ́л исын чачуно́, и нанэ начачипэ́н дрэ Лэ́стэ; Ёв исын чачуно́ и патяибны́тко.

Isajos 57:15

Пал-дова́ со адя́кэ ракирэ́ла Вучо́, Вучэ́с ґаздыно́, Саво́ дживэ́ла ве́чнэс, Лэ́скиро лав исын “Свэ́нто”: “Мэ джива́ва пэ вучо́ болыбэ́н и пэ свэ́нто штэ́то и адя́кэ-паць одолэ́ манушэ́нца, конэ́скиро ду́хо (фа́но) исын пхагирдо́, и кон исын на пхутькирдо, соб (кай) тэ отджидякирав ду́хо (фа́но), кон на пхутькирдо, и тэ отджидякирав илэ, конэ́стэ ду́хо (фа́но) исын пхагирдо́.

Psalmy 76:7

Тырэ́ дара́тыр, Яково́скиро Дэвэ́л, мэрибнытко вурдэ́н, адя́кэ-паць и грай сы́рбы тасадынэ тэ совэн.

Naumo 1:6

Кон дэ́ла ра́да тэ тэрдёл штылэ́с, ке́ли Рай Дэвэ́л зоралэ́с холясо́ла? Кон дэ́ла ра́да тэ вырикирэл мижэхипэн Лэ́скирэ холя́тыр? Лэ́скиро холякирибэ́н вычхувэлапэ сыр яг, и скалы (бэ́рги) пхарадёна пэ котэра́ анги́л Лэ́стэ.

Psalmy 42:2

Сыр мирга (лань) древа́н камэ́ла пани́, саво́ тхадэ́ла, адя́кэ-паць дро мирэ́ ду́хо (фа́но) исын смэга / труш (жажда) кэ Ту, о Дэ́вла.

Psalmy 100:5

пал-дова́ со Рай Дэвэ́л исын лачхо́, Лэ́скири лачхэ́-илы́ткима ячэ́лапэ ўса́ды (сак), и Лэ́скиро патяибэ́н исын родо́стыр кэ ро́до.

Sykadyipén 20:11

И мэ дыкхцём баро́ парно́ троно и Екхэ́с, Кон сыс бэшто́ пэ лэ́стэ. Пхув и болыбэ́н нашэнас криг Лэ́скирэ мо́стыр и штэ́то на сыс латхно лэ́нгэ.

Psalmy 31:5

Выты́рдэ ман фэля́тыр (петля́тыр), со ёнэ чораханэ́с чхудэ́ пэ ма́ндэ, пал-дова́ со Ту сан миро зоралыпэ́н тэ приракхэс ман.

Psalmy 10:16

[37] Рай Дэвэ́л исын Кра́ли пэ сарэ́ бэрша́ и ве́ки. Наюдэнгирэ на́цыи хасёна Лэ́скирэ пхувья́тыр.

Psalmy 18:7

Ке́ли ма́нгэ яця́ пхаро́, мэ кхардём Рас-Дэвлэ́с и рондём заня́са анги́л мирэ́ Дэвлэ́стэ: Ёв шундя́ мири́ зан тэла́л Пэ́скирэ штэто́стыр дро Болыбна́скиро Раё, Ёв шундя́ мири́ годлыма.

1 Ian 5:20

Амэ джина́са, со Дэвлэ́скиро Чхаво́ явдя́ и дыя́ амэ́нгэ годы́, соб (кай) амэ тэ уджинас, кон исын чачуно́ Дэвэ́л, и соб (кай) амэ́нгэ тэ явас дро екхипэ́н чачунэ́ Дэвлэ́са, Лэ́скирэ Чхавэ́са, Исусо́са Христосо́са. Дава́ исын чачуно́ Дэвэ́л и ве́чно джиибэ́н.

Юдэ́нгэ 10:31

Дава́ исын дарано тэ пэрэ́н дрэ джидэ́ Дэвлэ́скирэ васта́.

1 Ximaske 1:17

Вечнонэ Крали́скэ, саво́ ние́кхвар на мэрэ́ла и дживэ́ла дрэ сарэ́ ве́ки, Набицялэскэ и Екхджинэскэ Дэвлэ́скэ, мэк тэ явэ́л паты́в и сла́ва дрэ сарэ́ ве́ки.

1 Фесалоникийцэнгэ 1:9

пал-дова́ со ёнэ кокорэ́ роспхэндлэ́ пал амэ́ндэ, сыр тумэ́ прилынэ́ амэн, ке́ли амэ явдя́м кэ тумэ́: и сыр тумэ́ рисинэ́ кэ Дэвэ́л идолэндыр, соб (кай) тэ кэрэ́н свэ́нто буты́ джидэ́ и чачунэ́ Дэвлэ́скэ,

Apostolengiri Butý 14:15

ракири́: “Мануша́лэ! Со тумэ́ кэрэ́на? Амэ сам дасавэ́-паць мануша́, сыр и тумэ́, и роспхэнаса бахталы́ зан тумэ́нгэ, и амэ камаса, соб (кай) тумэ́ тэ мэкэ́н кадалэ́ хоханэ́ и́долы и тэ прилэ́н джидэ́ Дэвлэ́с, Саво́ создыя́ болыбэ́н и пхув и пани́, и саро́, со исын дрэ лэ́ндэ;

Малахия 3:2

Нэ кон вырикирэ́ла [сашты́ тэ вырикирэл-ю.о.] дава́ дывэ́с, ке́ли Ёв явэ́ла? Кон вытэрдёла [сашты́ тэ вырикирэл-ю.о.], ке́ли Ёв сыкадёла? Ёв явэ́ла сы́рбы яг, сави́ розбилавэла (росплавинэла), сы́рбы шутло сапуни (шчолко), саво́ жужакирэла руп.

Avakumo 3:6

Ёв тэрдия́, и пхув тринскирдяпэ, Ёв подыкхця́, и мануша́ издрандынэ и ґаратунэ́ бэ́рги пхарадынэ пэ котэра́, а векитка бэ́ргицы бандинэ. Лэ́скирэ дрома́ исын вечна.

Mihiejo 1:4

Бэ́рги явэ́на тэ билавэн тэл Лэ́стэ, и долы явэ́на тэ пхарадён, сы́рбы мом анги́л яг, сы́рбы паня́, со чхувэнапэ крутыматыр (вучипна́стыр).

Psalmy 146:6

Ёв создыя́ болыбэ́н и пхув, мо́ри (дэрьява́) и саро́, со исын дрэ лэ́ндэ. Ёв усады (сак) рикирэ́ла патяибэ́н.

Psalmy 145:13

Тыро́ кралипэ́н – кралипэ́н пир сарэ́ ве́ки, и Ту рикирэса зор пир сарэ́ ро́ды.

Psalmy 114:7

Издра пхув анги́л Растэ-Дэвлэ́стэ, анги́л Яково́скирэ Дэвлэ́стэ,

Psalmy 104:32

Ёв подыкхэла пэ пхув и ёй издрала, Ёв чилавэ́ла бэ́ргицы и лэ́ндыр тхув джа́ла.

Psalmy 97:4

Лэ́скирэ блискави́цы екха́тыр (сра́зу) дэ́на дуд (свэ́то) трусця́л свэ́то: пхув дыкхэ́ла и издрала.

Psalmy 93:2

Тыро́ троно исын зачхудо ґаратунэ́ (вагунэ́) бэршэ́ндыр, Ту сан ве́чно.

Psalmy 90:11

Кон джинэ́ла Тырэ́-холякири зор? Кон уґалёла дар, со явэ́ла Тырэ́ холякирибнастыр?

Psalmy 84:2

Савэ кучонэ́ исын Тырэ́ ша́тры, о Раё Дэ́вла, болыбна́скирэ-янголэ́нгиро.

Psalmy 77:18

Пхэрдэ́ о́блоки пэ болыбэ́н дынэ́ тэлэ́ паня́, болыбэ́н пхэндя́ заня́са, и Тырэ́ марибны́тка бустя́ (стре́лы) вурняндынэ криг;

Ióvo 9:6

Кон тринскирэла пхув ла́кирэ штэто́стыр, и ла́кирэ сты́лбы издрана;

2 Паралипоменоно 15:3

Бут дывэса́ Израилё сыс би чачунэскиро Дэвлэ́скиро и би рашаскиро, саво́ сыклякирэлас, и би законоскиро;

3 Kralip 18:39

И сыр сарэ́ мануша́ дыкхнэ́ дава́, то ёнэ пынэ́ лэ́нгирэ мо́са и пхэндлэ́: “Рай Дэвэ́л (Яхва́), Ёв исын Дэвэ́л, Рай Дэвэ́л (Яхва́) исын Дэвэ́л.”

1 Kralip 17:36

и шчэрэс (левос) и ричэс замарэлас тыро́ писха́ри, и адалэ́ Филистимляниноса наобчхиндлэса явэ́ла дова́-паць, со сыс лэ́нца, палдава́ со адя́кэ ёв ладжакирэла джидэ́ Дэвлэ́скирэ халадэ́н

1 Kralip 17:26

И пхэндя́ Дави́до манушэ́нгэ, савэ́ сыс тэрдэ́ лэ́са: “Со кэрэ́на одолэ́скэ, кон мулякирэ́ла далэс Филистимлянинос и злэла ладж Израилёстыр? Палдава́ со кон исын адава́ наобчхиндло Филистимлянино, со адя́кэ ёв ладжакирэл джидэ́ Дэвлэ́скирэ халадэ́н?”

Сэндарьенгири Лылвари́ 5:4

Ке́ли выджасас Ту, Раё Дэ́вла, Сеиростыр, ке́ли Ту ги́ян Эдомоскирэ фэлдатыр, тэды трискирдяпэ пхув, и тхадыя болыбэ́н, и о́блоки чхувэ́нас пани́;

Яви́р Зако́но 5:26

пал-дова́ со, ци исын сави́ лоч (плоть), сави́ шундя́ Ра́скирэ-Дэвлэ́скири джидэскири зан (глос), сави́ ракирдя́ машкира́л яг, сыр амэ и яцямпэ джидэ́?

1 Ximaske 6:17

Упхэн далэ́ свэто́скирэ барвалэнгэ, соб (кай) ёнэ тэ на ґаздэ́н пэс и тэ на патя́н дро пэ́скиро барвалыпэ́н, нэ фэды́р тэ патял дрэ джидэ́ Дэвлэ́стэ, Саво́ пхэрдэ́с дэ́ла саро́, со трэй ваш амари́ бахт,

Joannostir 17:3

А ве́чно джиибэ́н исын дро дова́, соб (кай) тэ джинэ́н Тут, Екхэ́с Чачипнаскирэ Дэвлэ́с, и Исусо́с Христосо́с, Савэс Ту бичхадян.

Матфеё 26:63

Нэ Ису́со сыс штыл. И пэ́рво раша́й пхэндя́ Лэ́скэ: “Засовлахава Тут Дэвлэ́са Джидэса: пхэн амэ́нгэ, ци Ту сан Христо́со, Чхаво́ Дэвлэ́скиро?”

Матфеё 16:16

И Си́моно Пэ́три отпхэндя́ и пхэндя́: “Ту сан Христо́со, Чхаво́ Джидэ́ Дэвлэ́скиро, Саво́ дживэ́ла ве́чнэс”

Avakumo 3:10

Бэ́рги дыкхнэ́ дава́ и лынэ́ Тэ издран, сыгна панинга́ дынэпэ тэ тхадэн потокоса. Хор паня́ пхэндлэ́ лэ́нгирэ заня́са, и ґаздынэ́ вучэ́с лэ́нгирэ валны сыр васта́.

Ioil 2:11

И пхэнэ́ла зоралэ́с Рай Дэвэ́л Пэ́скирэ заня́са (глосаса) сы́рбы грумо анги́л Лэ́скиро халадыбэ́н: пал-дова́ со исын зоралыпнаскирэ Лэ́скирэ марибнаскирэ мурша́. Дывэ́с Ра́скирэ-Дэвлэ́скиро исын баро́ и древа́н трашано, и кон дэ́ла ра́да тэ вырикирэл лэс?

Дание́лё 7:14

И Лэ́скэ, Чхавэ́скэ манушэнгирэскэ, сыс дыно́ баро́ право, сла́ва и кралипэ́н, соб (кай) сарэ́ манушы́тка на́цыи (народы), кхэри́тка ро́ды (пле́ми) и екхэ-чибакирэ ирья́ (чиба́/ чибья́) (языки) тэ дынаринэ́н Лэ́скэ, саро́ Лэ́скиро баро́ право на проджа́ла пэ сарэ́ ве́ки, и Кралипэ́н Лэ́скиро на пхарадёла.

Дание́лё 6:26

Ма́ндыр дэ́лапэ припхэныбэ́н, соб (кай) дрэ кажно риг мирэ́ кралипнаскири, мануша́ тэ издран и тэ дэн паты́в кэ дар анги́л Даниелёскирэ Дэвлэ́стэ, пал-дова́ со Ёв исын Дэвэ́л джидо́ и ве́чно, о Кралипэ́н Лэ́скиро на пхарадёла, и Лэ́скирэ райканыпнаскиро кралипэ́н – пэ сарэ́ ве́ки.

Дание́лё 4:34

[37] Акана́ мэ сом, о Навуходоносо́ро, шарава, ґазда́ва и патывакирава Крали́с Болыбнаскирэс, Савэскирэ рэ́нды сарэ́ исын чачунэ́ и дрома́ чачипнаскирэ, и Саво́ зорало́ исын, соб (кай) тэ чхувэ́л тэлэ́ кодолэ́н, савэ́ псирэ́на пхутькирибнаса.

Дание́лё 4:3

[6] Сыс дыно́ упхэныбэ́н ма́ндыр тэ янэ́н сарэ́н годыпнаскирэн Вавилоно́стыр, соб (кай) ёнэ тэ пирипхэнэн ма́нгэ, пал со сыс дова́ суно́.

Ереме́ё 23:36

И тумэ́ на ракирэ́н буты́р: ‘Пхари́ звесь (зан) Ра́стыр-Дэвлэ́стыр, пал-дова́ со кажно адасаво́ лав манушэ́стэ явэ́ла пхари́ звесь (зан) ваш лэ́скэ, кон адя́кэ ракирэ́ла, пал-дова́ со тумэ́ пиририскирдэ лава́ джидэ́ Дэвлэ́скирэ, амарэ́ Ра́скирэ-Дэвлэ́скирэ, янголэ́нгирэ-болыбна́скирэ, амарэ́ Дэвлэ́скирэ.

Isajos 37:17

Одкэр, Раё Дэ́вла, Тыро́ кан и пошун, одкэр, Раё-Дэ́вла, Тырэ́ якха́ и подыкх, вышу́н лава́ Сенахиримоскирэ, саво́ бичхадя́, соб (кай) тэ калякирэн Тут, Джидэ́ Дэвлэ́с.

Isajos 37:4

Мэк тэ шунэ́л тыро́ Рай Дэвэ́л лава́ Рабсакостыр, конэ́с бичхадя́ кра́ли Асирия́киро, хула́й лэ́скиро, соб (кай) ёв (Рабсако) тэ калякирэл джидэ́ Дэвлэ́с, соб (кай) тэ кошэл Лэс лавэ́нца, савэ́ шундя́ тыро́ Рай Дэвэ́л, помангпэ пал манушэ́ндэ, савэ́ ячнэ́пэ, савэ́ ишчо (инкэ́) джидэ́.’”

Psalmy 68:11

Тырэ́ мануша́ дживдэ́ одо́й. Ту, Дэ́вла, кэрдя́н дава́ ваш чорорэнгэ Тырэ́ лачхипнастыр.

Džiibén 21:33

И Авраа́мо чхудя́ тэ барьён дэмбитко вэлади́н (рошча) пашы́л Вирса́вия, и мангдя́пэ одо́й Ра́скэ-Дэвлэ́скэ, Вечнонэ Дэвлэ́скэ.

3 Kralip 8:60

соб (кай) сарэ́ мануша́ уджиндлэ́, со Рай Дэвэ́л исын Дэвэ́л, и нанэ апри́ч Лэ́стэ.

Psalmy 29:10

Рай Дэвэ́л исын бэшто́ упра́л пэ тасадыпнаскиро панинг; чачо́, Рай Дэвэ́л исын бэшто́ сыр Кра́ли пэ сарэ́ ве́ки.

Psalmy 68:8

О, Дэ́вла! Ке́ли Ту выджасас анги́л Пэ́скирэ манушэ́ндэ, ке́ли Ту ги́ян пир чхучи́ пхув,

Psalmy 90:2

О, Раё Дэ́вла! Ту са́нас усады (сак) амэ́нгэ сыр амаро́ кхэр ваш сарэ́ ро́ды!

Isajos 40:15

Акэ, народы – сыр чолыня (капли) пани́ вэдратыр и гинэнапэ сыр пра́хо пэ ублады́тка (весы). Акэ, островы (пхувья́ машки́р мо́рё (дэрья́в)), Ёв ґаздэ́ла сыр пра́хо.

Isajos 65:16

Ко́ли вари-кон бахтякирэ́ла пэс Лэ́са пэ дая́ пхув, явэ́ла бахтякирдо́ чачунэ́ Дэвлэ́са, и кон совлахала пэ пхув, явэ́ла тэ совлахал чачунэ́ Дэвлэ́са, пал-дова́ со ґаратунэ́ биды бистрэнапэ, явэ́на гарадэ́ Мирэ́ якхэ́ндыр.

Ереме́ё 4:2

И ту явэ́са тэ совлахас: “Тэ явэ́л джидо́ Рай Дэвэ́л патяибна́са, сэндоса и чачипна́са, соб (кай) Мэ тэ бахтякирав сарэ́н Наюдэн, соб (кай) Ма́ндыр ёнэ тэ барьякирэ́н пэс!”

Ереме́ё 4:24

Мэ дыкха́ва пэ бэ́рги, и, акэ, – ёнэ издрана, и сарэ́ бэ́ргицы тринскирнапэ одори́к и палэ.

Ереме́ё 50:46

Пхув явэ́ла тэ издрал годлатыр Вавилоно́стыр, ке́ли лэс лэ́на, и годлыпэн явэ́ла тэ шунэлпэ машки́р Наюды́тка на́цыи.

Ереме́ё 51:29

Пхув издрала и тринскирлапэ: пал-дова́ со кажно дума Ра́скирэ-Дэвлэ́скири явэ́ла тэ кэрэ́лпэ дро чачипэ́н проти Вавило́но, соб (кай) тэ кэрэ́л чхучи́ (пусто) пхув Вавилоноскири би екхэ манушэ́скиро.

Isúso 3:10

И пхэндя́ Ису́со: “Далэ́стыр тумэ́ уджинэна, со машки́р тумэ́ндэ исын джидо́ Рай Дэвэ́л, Саво́ традэ́ла тумэ́ндыр Хананеен, и Хетеен, и Евеен, и Ферезеен, и Гергесеен, и Амореен, и Евусеен:

1 Паралипоменоно 29:11

Тыро́, Раё Дэ́вла, райканыпэн, и зоралыпэ́н, и сла́ва, и збе́рдыма (побе́да), и саро́, со исын пэ болыбэ́н и пэ пхув, исын Тыро́; Тыро́, Дэ́вла, кралипэ́н, и Ту сан вучэды́р сарэ́стыр, сыр Баро́ Рай, Саво́ хулаинэла.

Psalmy 9:8

Нэ Рай Дэвэ́л исын бэшто́ пэ сарэ́ ве́ки, Ёв чхудя́ Пэ́скиро троно тэ сэндякирэ́л.

Psalmy 74:12

Нэ Ту, Дэ́вла, сан миро Рай самонэ англыпна́стыр, Саво́ зракхэ́ла манушэ́н пэ пхув.

Psalmy 76:8

Ту трашавэса кэ мэрибэ́н, и конэ́скэ исын пир зор тэ тэрдёл проти Ту́тэ?

Psalmy 100:3

Джинэ́н, со Рай Дэвэ́л исын амаро́ Дэвэ́л! Ёв создыя́ амэн, нэ амэ на кокорэ́ пэ́стыр явдя́м пэ дава́ свэ́то; амэ сам Лэ́скирэ мануша́ и амэ сам бакрэ́ Лэ́скирэ ґуртостыр.

Isajos 40:28

Ци ту на джинэ́са, ци ту на шундя́н, со ве́чно исын Рай Дэвэ́л, Саво́ создыя́ пхув, николи на кхинёла, и на нашавэла зор, нэ ту на ґалёса Лэ́скири годы́.

Дание́лё 6:27

Ёв зракхэ́ла и подэла васт бидатыр, кэрэ́ла знаме́нии (ґертыка́) и ди́вы пэ болыбэ́н, и пэ пхув; Ёв зракхця́ Даниелёс шчэрэнгирэ зорья́тыр.”

Naumo 1:5

Бэ́рги издрана анги́л Лэ́стэ, и бэ́ргицы биладёна; пхув кунинэлапэ анги́л Лэ́скиро явибэн [муй-р.с.]; свэ́то, и саро́, со дживэ́ла пэ свэ́то.