Дание́лё 6:7 - Библия - Пэ Балтитко Романи чиб (Романэс) 2019

⁷ Сарэ́ тхага́рья кралипнаскирэ, э барыдыра́ штэтытка, э сатрапы, э юнкары и барыдыра́ халадэ́нгирэ доракирдэпэ машки́р лэ́ндэ, соб (кай) тэ выдэн крали́тко стату́то и тэ дэн зорало́ упхэныбэ́н, соб (кай) ко́ли вари-кон дрэ далэ́ трия́нда дывэса́ лэ́ла тэ мангэ́лпэ вар-савэ́ явирэ дэвлэскэ ци манушэ́скэ, апри́ч ту́тэ, кра́лё, кодолэ́с тэ чхурдэ́н дро рово (хохо́й) шчэрэнгиро (левэнгиро).

Biblija - Pe Baltitko Romani čib (Romanes) 2019

⁷ Saré thagárja kralipnaskire, e barydyrá štetytka, e satrapy, e junkary i barydyrá xaladéngire dorakirdepe maškír lénde, sob (kaj) te vyden kralítko statúto i te den zoraló uphenybén, sob (kaj) kóli vari-kon dre dalé trijánda dyvesá léla te mangélpe var-savé javire devleske ci manušéske, apríč túte, králjo, kodolés te čhurdén dro rovo (xohói) ščerengiro (lievengiro).

Дание́лё 6:7 Referans Kwoze

Psalmy 59:3

Зра́кх ман манушэ́ндыр, савэ́ кэрэ́на чорипэ́н и зра́кх ман одолэ́ндыр, кон исын нахрата кэ рат.

Дание́лё 3:27

И скэдынэ́пэ сатрапы, э штэтоскирэ барыдыра́, э шэралэ́ рая хэладэнгирэ, и сэнда́рья крали́скирэ, и дыкхнэ́, со муршэнгирэ маса́ яг на чиладя́, бала́ на обхачинэ пэ шэрэ́, урибэ́н на парудяпэ, и нисаво́ похтан хачкирдо лэ́ндыр на кхандэлас.

Дание́лё 3:6

и кон на пэрэ́ла тэлэ́, и на дэ́ла паты́в, то екха́тыр (сра́зу) явэ́ла чхурдыно́ дро бов, росхачкирдо яга́са.”

Дание́лё 3:2

И бичхавэлас о кра́ли Навуходоносо́ро тэ скэдэл сатрапэн, штэтоскирэ барыдырэ́н (наместникэн), шэралэ́ ран, советникэн (юнкарэн), ракхибнаскирэн пэ кучипэ́н (сокровишчо), сэндарьен, шэратунэ сэндарьен, и сарэ́н барыдырэ́н провинцыякирэн, соб (кай) ёнэ тэ явэ́н пэ высвэнцыныбнаскиро моменто ваш идоло, саво́ чхудя́ о кра́ли Навуходоносо́ро.

Psalmy 62:4

Кицы́ тумэ́ явэ́на тэ пэрэ́н пэ екхэ манушэ́стэ? Тумэ́ родэ́на сарэ́н тэ заравэн сыр доя́ ва́нта, со бандия, сыр тыно, со издрала.

Joannostir 12:10

Тэды раша́нгирэ барыдыра́ скэдынэ́пэ тэ мулякирэ́н и Лазарёс.

Marko 15:1

И екха́тыр (сра́зу) пэ зло́ко, сыр яця́ дывэ́с, раша́нгирэ барыдыра́ годэпхурэнца и лылваритконэнца и саро́ Синедрионо пириракирдэ дава́ рэ́ндо, пхандлэ Исусо́с и лыджинэ́ Лэс кэ Пила́то.

Матфеё 26:4

и кхэтанэ́ зракирдэпэ тэ ухтылэ́н Исусо́с фротымаса, и тэ мулякирэ́н Лэс;

Матфеё 12:14

Нэ Фарисе́и гинэ́ яври́, ячнэ́ тэ зракирэнпэ пэ Лэ́стэ, сыр тэ мулякирэ́н Лэс.

Psalmy 10:9

[30] Ёв гарадёла и ужакирэ́ла сыр шчэр (ле́во) дрэ хашча (логово); ёв гарадёла и ужакирэ́ла одолэ́н, кон исын бизорья́киро. Ёв ухтылэ́ла лэс и тырдэла лэс дрэ пэ́скири фэлы́ (петля).

Naumo 2:12

Шчэр (ле́во) кусця пэ котэра́, кицы́ трэй мас ваш лэ́скирэ шчэрорэндэ, и, тасадя ваш пэ́скирэ шчэрицатэ. Ёв пхэрдякирдя́ ґебара́ (пешчэры) масэса дрэ данда́, и лэ́скирэ хашчы (логовы) джидэ́ масэса.

Mihiejo 6:5

О Мирэ́ мануша́лэ! Пририпирэн акана́, сыр о Вала́ко, кра́ли Моавитоскиро, придуминэлас чорипэ́н, и со отпхэнэ́лас лэ́скэ Валаа́мо, чхаво́ Веороскиро, и со кэрдя́пэ пэ маля (степи) машки́р Ситимо и Галга́ло, соб (кай) тумэ́ могинэ́нас сашты́ тэ уджинэ́н чачипэ́н Ра́скирэ-Дэвлэ́скиро.”

Дание́лё 3:11

и кон на пыя́ тэлэ́ и на дыя́ паты́в, мэк тэ явэ́л чхурдыно́ дро бов росхачкирдо яга́са.

Psalmy 94:20

Ту на явэ́са кхэтанэ́ чорэ́ ранца, савэ́ придуминэна фуипэ́н заме́ст одова́, со исын дро Зако́но.

Psalmy 2:2

Лэ́нгирэ кра́лья газдэнапэ проти и лэ́нгирэ тхэмэ́скирэ барыдыра́ зракирэнапэ проти Растэ-Дэвлэ́стэ и Одолэ́стэ, Конэ́с Ёв помакхця, ракири́:

Psalmy 83:5

ёнэ ракирэ́на: “Явэ́н тэ кэра́с, соб (кай) тэ вычхурдас лэн сыр нацыя, соб (кай) буты́р Израилёскиро лав тэ на рипирэлпэ.”

Дание́лё 6:16

Адя́кэ, о кра́ли припхэндя́, и яндлэ́ Даниелёс, и чхурдынэ́ лэс дро шчэрэнгиро рово (хохо́й); пашы́л о кра́ли пхэндя́ Даниелёскэ: “Тыро́ Дэвэ́л, Савэ́скэ ту сан напарундло дына́ри, Ёв тут зракхэ́ла!”

Psalmy 59:5

Ёнэ праста́на и сыклякирэ́на екх екхэ́с, на дыкхи́, со нанэ банг ма́ндэ. Джанґадёв тэ помогинэс ма́нгэ и подыкх.

Дание́лё 2:4

И пхэндлэ́ э Халдеи крали́скэ Арамеиткэс кэ: “Кра́лё! Яв джидо́ дрэ ве́ки! Пхэн суно́ тырэ́ писхарье́нгэ, и мэ роскэдасам, сави́ зна́чыма исын дрэ лэ́стэ.”

Дание́лё 6:22

О Дэвэ́л миро бичхадя́ Пэ́скирэс Янголо́с и загарадя шчэрэнгиро муй, и ёнэ ничи́ на кэрдэ́ ма́нгэ, палдава́ и мэ сом анги́л Лэ́стэ жужо́, и анги́л ту́тэ, кра́лё, мэ на кэравас намиштэс.”