Avakumo 1:6 - Библия - Пэ Балтитко Романи чиб (Романэс) 2019

⁶ Пал-дова́ со Мэ, акэ, ґазда́ва Халдеен, кирки и сы́гно нацыя, сави́ кхарэ́лапэ (двигинэлапэ) пир пхувья́киро буґлыпэ́н, соб (кай) тэ заухтылэн джиибна́скирэ штэ́ты, савэ́ исын на лэ́нгирэ.

Biblija - Pe Baltitko Romani čib (Romanes) 2019

⁶ Pal-dová so Me, ake, ĥazdáva Xaldiejen, kirki i sýgno nacyja, saví kharélape (dviginelape) pir phuvjákiro buĥlypén, sob (kaj) te zauhtylen džiibnáskire štéty, savé isyn na léngire.

Avakumo 1:6 Referans Kwoze

4 Kralip 24:2

И бичхадя́ пэ лэ́стэ Рай Дэвэ́л баро́ кэ дар халадыбэ́н Халдее́нгиро, и халадыбэ́н Сириянэнгиро, и халадыбэ́н Моавитянэнгиро, и халадыбэ́н Амонитянэнгиро, – бичхадя́ лэн пэ Юдастэ, соб (кай) тэ хасякирэ́л лэс пир Ра́скирэ-Дэвлэ́скиро лав, саво́ Ёв пхэндя́ пирда́л Пэ́скирэ писхарье́ндэ, пророкэ́ндэ.

Ереме́ё 5:15

Акэ, Мэ яна́ва манушы́тко нацыя пэ тумэ́ндэ дурипнастыр, Израилёскиро кхэр”, – ракирэ́ла Рай Дэвэ́л! “Дава́ исын зоралы́ нацыя, дая́ нацыя исын ґаратуны, савэнгири чиб на джинэ́на тумэ́, и тумэ́ на ґалёна, со ёнэ пхэнэ́на.

Ереме́ё 25:9

акэ, Мэ бичхава́ва, и Мэ ла́ва сарэ́ сэм΄и (ирья́) паш-ратитконэ́ (севернонэ) рига́тыр’, – ракирэ́ла Рай Дэвэ́л, – ‘и Мэ бичхава́ва лэн кэ Навуходоносо́ро, кра́ли пир Вавило́но, Миро писха́ри, и Мэ яна́ва лэн проти дая́ пхув, и проти манушэ́ндэ, кон дживэ́ла пэ дая́ пхув, и проти сарэ́ далэ́ Наюды́тка на́цыи, савэ́ исын трусця́л, и Мэ сарэ́са хасякира́ва лэн, и Мэ кэра́ва адя́кэ, со мануша́ явэ́на тэ дивинэнпэ трашатыр (дара́тыр) пэ лэ́ндэ, тэ дэн шоля сабнаса и лэ́нгэ явэ́ла ве́чно хась/ хасибэ́н.

Isajos 23:13

Акэ, исын пхув Халдеенгири. На сыс англэды́р дава́ народо; Асуро кэрдя́ лэс манушэ́ндыр, савэ́ дживэ́нас пэ шуки́ пхув. Ёнэ чхувэ́на пэ́скирэ вучардя (башни), роспхагирэна лэ́скирэ райканэ кхэра́, пхагирэна лэн сарэ́са.

Ереме́ё 21:4

‘Адя́кэ ракирэ́ла Рай Дэвэ́л, Израилёскиро Дэвэ́л: ‘А́кэ, Мэ рискира́ва палэ мардытка, со исын дрэ тумарэ́ васта́, савэ́нца тумэ́ марэнапэ Вавилоно́скирэ крали́са и Халдее́нца, савэ́ обчхудэ трусця́л тумэн халадэнца яври́, пал барунэ́ ва́нты, и Мэ скэда́ва лэн машкира́л дава́ фо́ро.

Ереме́ё 4:8

Палдава́ подпхандэнпэ жалобнонэ гонэса, обровэн и ровэ́н годла́са: пал-дова́ со Ра́скирэ-Дэвлэ́скиро холякирибэ́н, на рисия́ амэ́ндыр.

Ереме́ё 4:6

Ѓаздэн сцяго каринг Сио́но: нашэ́н, на ячэ́нпэ (на тэрдён). Пал-дова́ со Мэ яна́ва биба́хт паш-ратитконэ́ (шылалэ) рига́тыр и бари хась (баро́ хасибэ́н).

2 Паралипоменоно 36:17

И Ёв яндя́ пэ лэ́ндэ Халдеенгирэ крали́с, – и одова́ мулякирдя́ тэрнэ́ манушэ́н лэ́нгирэ куртала́са дрэ лэ́нгиро свэнтыныбнаскиро кхэр, и на потангиндя ни тэрнэ́ чхавэ́с, ни патываля чха, ни пхурэс, ни богос: саро́ отдыя́ Дэвэ́л дрэ лэ́скиро васт.

2 Паралипоменоно 36:6

Проти лэ́стэ выгия́ Навуходоносо́ро, Вавилоно́скиро кра́ли, и закуиндя лэс састырэнца, соб (кай) тэ лыджа́л лэс дро Вавило́но.

Ереме́ё 4:11

Дро дова́ часо явэ́ла пхэндло́ кадалэ́ манушэ́нгэ и Израилёскэ: “Шуки́ балва́л джа́ла вучэ́ штэтэ́ндыр, со исын пэ чхучэ́ прахи, пэ Мирэ́ манушэ́ндэ, на, соб (кай) тэ жужакирэн, ци, соб (кай) тэ веинэл сыр гив;

Ереме́ё 8:10

Палдава́ Мэ да́ва лэ́нгирэ ромне́н явирэ́нгэ, и лэ́нгирэ фэ́лды кодолэ́ манушэ́нгэ, савэ́ явэ́на хулая́ пэ лэ́ндэ. Пал-дова́ со кажно лэ́ндыр тыкнэстыр кэ са́мо барэды́р исын присыклыно и ґа́лко кэ барвалыпэ́н: пророкостыр кэ раша́й – кажно лэ́ндыр кэрэ́ла начачунэс.

Ереме́ё 13:20

Ѓаздэн тумарэ́ якха́ и дыкхэ́н, со джа́ла пэ тумэ́ндэ паш-ратитконэ́ (севернонэ) рига́тыр. Кай тыро́ ґурто, шука́р ґурто, саво́ сыс дыно́ ту́кэ?

Ереме́ё 21:7

И пало́ (после) дава́, – ракира́ва Мэ, Рай Дэвэ́л, – Мэ отда́ва Сэдэкияс, Юдэя́кирэ крали́с, и лэ́скирэ дынарье́н, и яви́р манушэ́н кадалэ́ форо́стыр, савэ́ ячэ́напэ джидэ́ франсэндыр, куртала́тыр и бокхалыпнастыр дрэ Навуходоноскирэ васта́, Вавилоно́скирэ крали́стэ, дрэ тумарэ́-вэргэ́нгирэ васта́, и дрэ кодолэнгирэ васта́, савэ́ родэ́на тумаро́ джиибэ́н. И ёв мулякирэ́ла тумэн курталакирэ ягороса. Ёв на явэ́ла тэ тангинэ́л (тэ жалинэл) тумэн, тэ тангинэ́л, и ёв на явэ́ла лачхэ́-илытко кэ тумэ́.”

Езэкилё 16:40

Ёнэ адя́кэ-паць кхарэ́на пэ ту́тэ скэдыибэ́н, ёнэ домарэна тут барэ́нца, и росчингирэна тут пэ́скирэ курталэнца.

Езэкилё 21:31

Вычхувава пэ ту́тэ Мири́ зоралы́ холы́, Мэ пхурдава пэ ту́тэ Мирэ́-холямипнаскирэ яга́са, отда́ва тут дрэ биилэскирэ-манушэ́нгирэ васта́, манушэ́нгэ, савэ́ джинэ́на, сыр трэй тэ замарэ́н.

Езэкилё 28:7

то, акэ, Мэ яна́ва пэ ту́тэ манушэ́н явирэ пхувьендыр, савэ́ исын древа́н захалэ; ёнэ выджа́на пэ́скирэ курталэнца пэ тырэ́ – годя́киро шукарибэн, ёнэ магирэна тут, соб (кай) ту на явэс бутэды́р дасаво шука́р райканыткэс, сыр са́нас.

Езэкилё 31:12

И счиндлэ лэс явирэ-пхувьенгирэ мануша́, дасавэ́ захалэ, со нанэ бутэды́р дасавэн дрэ народы, и ёнэ чурдынэ лэс пэ бэ́рги, пэ сарэ́ фэ́лды пынэ́ лэ́скирэ вэ́тки, лэ́скирэ, сэнки обпхагирдэпэ пэ сарэ́ лэнги; гинэ́ криг зэрьятыр (тенёстыр) сарэ́ пхувитка народы, и ячядэ лэс.

4 Kralip 24:1

Дрэ лэ́скирэ дывэса́ гия́ пэ лэ́стэ Навуходоносо́ро, Вавилоно́скиро кра́ли, и кэрдя́пэ Иоакимо вужло лэ́скэ пэ трин бэрш, нэ пало́ дова́ (после) отгия́ лэ́стыр.

Ереме́ё 30:5

“Адя́кэ ракирэ́ла Рай Дэвэ́л: ‘Амэ шундя́м зан (глос), сави́ издралас, исын дар, нанэ рама́нё (миро).’

Ioil 2:3

Анги́л лэ́ндэ джа́ла яг, со похала саро́, а пала́л пал лэ́ндэ хачкирибэ́н, со пэкэла саро́. Анги́л лэ́ндэ пхув исын сы́рбы у́нта (садо) Эдэмоскири, а пала́л пал лэ́ндэ ячэ́лапэ чхучакирды мал (степ), нисо́ никай на кэрэ́лапэ лэ́ндыр.