Lwaḥi 2:13 - Ṯarifiṯ 2020

¹³ Nec ssneɣ mani ṯzeddɣeḏ, ḏinni lƹarc n Cciṭan. Cek teṭṭfeḏ ḏeg yisem inu. War ṯenkareḏ ca l'iman iy zzayi ṯeggiḏ, waxxa ḏeg wussan nni iy ḏi nɣin ijjen n ccahiḏ inu ḏayes ȓaman qqaren-as Antipas. Nɣin-ṯ zzaṯwem mani izeddeɣ Cciṭan.

Lwaḥi 2:13 Referans Kwoze

1 Timutawus 5:8

Cuf, wenni war itḏebbiren x ȓeḥbab nnes xaṣṣatan x lƹaʼila nnes ataf netta inkar lʼiman, wenni war yuminen qaƹ ataf ḥsen zzayes.

Lwaḥi 3:11

Aqa usiɣ-d, war tƹeṭṭaȓeɣ ca. Ṭṭef ḏi lʼiman nnec ḥima war d itis ḥadd ac iysi ttaj nnec.

2 Timutawus 2:12

Meȓa neṣbar, uca a neḥkem akiḏes. Meȓa nenkar-iṯ, uca ƹaweḏ netta aḏaneɣ inkar.

Ȓexḏayem 22:20

Ḥḍareɣ nec wami sizzȓen iḏammen n Stifan wenni xak icehhḏen. Wafqeɣ x ȓmewṯ nnes, ḥḍiɣ-asen uȓa ḏ arruḍ n yinni iy ṯ inɣin.

Lwaḥi 14:12

Ḏi lḥala nni itxeṣṣa-yasen i ȓmuminin ṣṣaliḥin aḏ ṣbaren aḏ ggen array s ȓuṣiyaṯ n Arebbi aḏ amnen zi Ƹisa.

Lwaḥi 3:3

Ƹqeȓ x ttaƹlim iy ṯqebȓeḏ wami ḏas ṯesȓiḏ. Xḏem zzayes, tub. Meȓa war ṯeǧiḏ ca ƹlabal, nec aɣarek d aseɣ am yij uceffar war ṯessineḏ ca man ṯsaƹƹat iy d ɣa aseɣ.

Lwaḥi 2:2

Nec ssneɣ ȓexḏayem nnec ḏ tamara nnec ḏ ṣṣbar nnec. Ssneɣ war ṯqebbȓeḏ ca yinni iǧan ḏ iƹeffanan, ṯjarrbeḏ yinni iqqaren qa neccin ḏ arrusul ṯufiḏ-ṯen sxerriqen waha.

Iƹibraniyen 10:23

A neṭṭef bȓa ma a neḍȓeq ḏi lʼamal nni iy xef ncehheḏ liʼanna Arebbi iy ḏaneɣ iweƹḏen ḏayes ttiqeṯ.

2 Timutawus 1:13

Meṯṯel ttaƹlim nni nican iy ṯesȓiḏ zzayi, akiḏes iy ɣa yiȓi ijjen n lʼiman ḏ yijjen n ȓemḥibbeṯ iy iǧan ḏi Ƹisa Lmasiḥ.

Matta 24:9

Ssenni akenniw sellmen yiwḏan ḥima akenniw ƹeddben, akenniw nɣen. Marra dduwal akenniw ƹiffen ƹlaḥsab isem inu.

Yaƹqub 2:7

Ma war ṯessinem ca belli ḏ niṯni ig issawaȓen s ȓƹib ḏeg yisem aṣebḥan n Lmasiḥ wenni iy zi ḏawem tȓaɣan yiwḏan?

Iƹibraniyen 3:6

Walakin Lmasiḥ netta ḏ Mmis iḥekkem x ayṯbab n ṯeddarṯ n Arebbi, itkellaf zzaysen nican. U neccin ḏ ayṯbab-a n ṯeddarṯ nnes iƹni meȓa neṭṭef mliḥ ḏi zƹameṯ nneɣ u ḏi lʼamal nneɣ iy xef nteftaxar.

1 Ayṯ-Salunik 5:21

Lla, meyyzeṯ manayenni marra. Ṭṭfeṯ ḏi min iǧan ḏ aṣebḥan;

Ȓexḏayem 9:14

Ȓexxu aqaṯ ḏa, ucin-as arruxṣa arruyas n ȓfuqaha ḥima aḏ iṭṭef marra yinni iƹebbḏen s yisem nnec."

Luqa 21:17

Akenniw ƹiffen marra iwḏan ƹlaḥsab isem inu.

Matta 10:23

Meȓa ƹeddben-kenniw ḏi can ṯendint, arewȓem ɣar ṯenneɣni. Aqa tesȓam ȓḥaqq: Aḏ d yas Mmis n bnaḏem, ataf kenniw ƹaḏ war ṯkemmȓem x min kenniw weṣṣiɣ ḏi ṯneddam n Ayṯ-Israʼil.

Matta 4:10

Indeq-d Ƹisa inna-as: "Ruḥ, beƹƹeḏ-ayi a Cciṭan. Aqa Lkitab iqqar: "

Lwaḥi 1:5

U ƹaweḏ akiḏwem yiȓi arḍa zi Ƹisa Lmasiḥ, netta ḏ ccaheḏ ḏayes ȓaman. Netta iy d ixeȓqen ḏ amezwaru n yinni iy d itekkaren zi ȓmewṯ, ḏ netta ig iḥekkmen x izeǧiḏen n ṯmurṯ. Iḥibb-aneɣ, ifekk-aneɣ zi ȓmuƹṣiyaṯ nneɣ s iḏammen nnes.

Lwaḥi 11:3

Aḏ ssekkeɣ ṯnayen n ȓechuḏ inu aḏ ggen arruḍ n lḥuzen aḏ xbaren iwḏan s min ƹeȓmen zi Arebbi aȓaf u miyyatayen u settin yum."

Lwaḥi 12:11

Ɣeȓben-ṯ ayṯmaṯneɣ s iḏammen n Yizmar ḏ chaḏeṯ nsen. Ṯuḏarṯ nsen war xasen ṯƹizz ca, wejḏen aḏ mmṯen.

Lwaḥi 13:2

Ȓwaḥc-a iy ẓriɣ itcabbah ḏeg uɣiȓas, iḍaren nnes ggin am iḍaren n ddub, aqemmum nnes igga am uqemmum n ssbaƹ. Wenni iǧan am ddaynaṣur yuca-as i ȓwaḥc-a jjheḏ nnes ḏ lƹarc nnes ḏ ijjen n ssulṭa ṯemɣar.

Lwaḥi 17:6

Ẓriɣ ṯamɣarṯ nni ṯsekkar s iḏammen n ȓmuminin ṣṣaliḥin ḏ iḏammen n yinni icehhḏen x Ƹisa. Wami t ẓriɣ ḏehceɣ aṭṭas.

Lwaḥi 17:14

Niṯni aḏ ḥarben Izmar walakin netta aṯen iɣȓeb; Qa netta ḏ Mawlana n mawlanaṯ ḏ Azeǧiḏ n izeǧiḏen, yinni iy kiḏes iǧan iȓaɣa-yasen-d Arebbi ixḍar-iṯen, ḏaysen iǧa ȓaman."