Yoohana 5:30 - Wori Haaggane Yeesso Kiriisto Miinsan Ayyinti Husube Waakh Enenyet Igooche

³⁰ Awteey u walah an yeelo mele, iꞌdaasenyi saggi an Aabbaheey ikadaago iche enenyet jiti fissan ka ihukkuma, a mehe an ma iskahamaadicho iꞌdaasenyi ki isooergate kahamaadicha.

Yoohana 5:30 Referans Kwoze

Yoohana 6:38

Iꞌdi tahe an goobi Waakhe kiimiyye, wihi an ꞌdoono menye, iꞌdaasenyi wihi Aabbaheeyki isooerge ꞌdoono, iche yeela.

Yoohana 5:19

Yeesso wihi us jaldaabti Yaꞌhuud ilaabe, “Rume atin icheeka, Weeli Waakh walah us keley yeelo mele. Wihi us argo Aabbahiis yeelo on yeela. Iꞌdi tahe wihi Aabbahiis yeelo on Weeliis laka yeela.

Yoohana 4:34

Yeesso la wihi us iyidah, “Wihi uur iꞌdoono iꞌdi gololeeye a mehe ya, a anihi wihi Waakkhi isooerge ꞌdoono yeelo, toro la hili goorat us dahanteey soogesse massicho.

Yoohana 14:10

Fiilif, at saggi an Aabbaheey goytiis ifiddiyo, ulla goyteey ifiddiyo ma rummeysatti? Yeeda an eldi ani ma ikiimaatane, Aabbaheeyki goyteey fiddiyo iche waha tuumman yeela.

Mattaayo 26:39

Iꞌdaaru orey isohte, il isiꞌdiiche, fool harra kaꞌdaare, Waakh wahte wihi us yidah, “Aabbahaaw, chiꞌiche tateeh kokkooba sinayyoot a liikakhaato! Iꞌdaasenyi in an ꞌdoono menye, in at ꞌdoonto on a titaahe.”

Yoohana 8:28

ꞌDeerka wihi us iyidah, “Maanti atin Ínam Aadam massalaaba ka serey geesseen, saggi an etaas iahe, a abattaan. Toro la saggi an wohoo rucchul laka miigteey ka iyeeline, iꞌdaasenyi an wihi Aabbaheey iabche on icheeko a abattaan.

Rooma 15:3

A mehe Kiriisto rubeytiis ma iskahamaadin. Iꞌdaasenyi wihi chiiran, “Okkhoow abaari ꞌdooꞌd kileeabaarramo ani isookute.”

Yoohana 8:50

An koolo ma isiyowdi, iꞌdaasenyi eti anihi liikoolicho ꞌdoono a jira, ulla a eti jiti rummaat ka enenyet hukkumo.

Yoohana 8:42

Yeesso la wihi us iyidah, “Chirri kootte Waakh rumanka Aabbahiin yahe, ani a iꞌdoontaan. Iꞌdi tahe an Waakhe kiimiyye, toolla la an intane kajira. An awteey u ma imaatane, iꞌdaasenyi usu isooerge.

Yoohana 17:4

Hili goorat at dahanoheey soogelisse an massiche ka, harrata ka an a kiweynaache.

Yoohana 18:11

Yeesso la wihi us Beetero iyidah, “Birlabaah min ilaab! Kol sinati Aabbaheey isoogooche ani ikawaarine koogtahe?”

Rooma 2:5

Iꞌdaasenyi matahenyetiin a mimmiige toro la uurassiin ka uskeeli atin kasoonokhattaan a ꞌdiiꞌddaan. Jeentetaas u atin sinati berri ibeenki Waakh holiis atin tuso toro jiti rummaat ka enenyet hukkumo, a isibuuraassaan.

Rooma 2:2

Wihi inno garanni a mehe ya, Waakh chuꞌus ꞌdooꞌdi wihi iꞌdee yeelo hukkumo us sina igoocho, us wihi rummaat on yeela.