Hilassi Ergaano 13:46 - Wori Haaggane Yeesso Kiriisto Miinsan Ayyinti Husube Waakh Enenyet Igooche

⁴⁶ Iꞌdaasenyi Baawulo ichoow Barnaba wihi icho roorro laan soolaabeen, “Wihi nah lakaꞌdoono, a nahi Yeedi Waakh kolooraat atin isoocheekno. Jeenteti atin iꞌdiiꞌddeene, saggi atin jiroti armaanjireen ikamalin isikeekkaasseen u la, kola yaafohi Yaꞌhuud ieheynane iiranna.

Hilassi Ergaano 13:46 Referans Kwoze

Hilassi Ergaano 28:28

“Maantaka waha abda, ribnaanki Waakh ꞌdooꞌd ribo, yaafohi Yaꞌhuud ieheynane liierge, icho la daagaan!”

Hilassi Ergaano 26:20

Anna kolooraat ilkerengeetti Damaasko Yeedi Waakh kacheeke. Yomboka ilkerengeetti weene Yeerusaleem ichoow ili Yaꞌhuudiya tuumman ichoow ꞌdooꞌdi Waakh igaranne Yeedi Waakh icheeke. Wihi an cheeke la a saggi icho uskeelicho ikasoonokhtaane icho Waakh ikuurgiyaane, fiddihicho ka saggi icho rumanka uskeel ikasoonokhteen tusaan.

Mattaayo 21:43

“Maantaka wihi an atin icheeko, dakhi Waakh a atin lakakhaata yaafti gurnaanki Waakh ꞌdoono desso lasiicha.

Hilassi Ergaano 3:26

Maanti Waakh falfatiis sooerge, kolooraat atine atin isooerge, ꞌdee ebba jitiiski suuje kasoolaaba. Waakh saggaase atin ikamaale.”

Rooma 2:10

Iꞌdaasenyi Waakh eti tuummane haag kalday on yeelo a koolicha, inkaanyit tusta, nebey siicha. Koloo la yaafohi Yaꞌhuude kasookhabta, ꞌdee yaafohi Yaꞌhuud ieheynan ikuta.

Rooma 1:16

An Wori Haaggan ma kuuryaawo. Iꞌdi tahe Wora a miigti Waakhe hol dowto, eti tuummane Kiriisto rummeeste ribto. Koloo ꞌdooꞌdi Yaꞌhuude Kiriisto rummeeste lariba, ꞌdee toro yaafohi Yaꞌhuud ieheynane Kiriisto rummeeste laka lariba.

Hilassi Ergaano 22:21

“Kamur la wihi us ani iyidah, ‘Nyaam, ani yaafohi Yaꞌhuud ieheynane fogaate kiergada.’ ”

Hilassi Ergaano 13:26

“Yaafeey, atinhi hiiy Aburaahame ichoow atinhi yaafohi addanenye Waakh karoortaan inno wori saggi Waakh inno iribo a inno liisooerge.

Yoohana 1:11

Us ꞌdooꞌdiissa iyimiyye, iꞌdaasenyi ꞌdooꞌdiis usu ma khaatan.

Hilassi Ergaano 7:51

“Atin a matah miig mehe? Uurassiin ichoow dogtiin a iꞌdi wihi ꞌdooꞌdi Waakh ikakhuufin. Atin a iꞌdi aacchinyetiinna, kol dakkhan Rubeyti Munyeenye tirrintaan.

Luuka 24:47

Ilkerengeetti weene Yeerusaleeme lakasookhabta, antohiis ka wori uskeeli lakasoonokhti ichoow uskeeli Waakh enenyet ikakuto miinsan ꞌdooꞌdi harra tuumman liicheeka.

Fiiliffi 1:14

Toro la jeenteti an jeela ikajiruu, ꞌdooꞌdi Kiriisto rummeeste buurtiis Kamur ka uur a lamiigooche, ꞌdee roorro laan Yeedi Waakh cheekaan.

Hilassi Ergaano 13:14

Ilkerengeetti Beerga kakaheene ilkerengeetti Antiyookhiya boroofenhi Bisiidiya kijirto irteen. Seeri Lanaso ka minki weysiite Yaꞌhuud geleene orronteen.

Hilassi Ergaano 13:5

Chirri icho ilkerengeetti Salaamis eleeleen ka, minassi weysiite Yaꞌhuud ka Yeedi Waakh cheekeen. Yoohanahi magahiiskoo Marko layadeeh laka a leejire, gargaare.

Hilassi Ergaano 4:13

Chirri icho Yoohana ichoow Beeterohi roorro laan yeyyeedo argeene toro saggi icho ꞌdooꞌdi walah garti iyahiin kaseen ka weyti girmeesteen. Saggi goorat icho Yeesso ileejireen kaseen.

Yoohana 4:22

Atinhi yaafohi Saamariya chirri atin Waakh wahattaan laka, atin usu rubeytiis ma garattaan. Nahi yaafohi Yaꞌhuude la, Waakkhi nah wahanni a garanna. A mehe eti ꞌdoorribo yaafohi Yaꞌhuude kayamiit.

Mattaayo 10:6

Nyaama ꞌdooꞌdi Issiraayele iꞌdi iiyti baabaatee iirda.

Ibiraaniya 11:34

gaasoo laka ꞌdabi buure jiccheene, gaasoo laka ꞌdooꞌdi birlabbe ka ogoos marmo kabahsateen. Icho a ꞌdaꞌddarneete, iꞌdaasenyi miigoween. Toro la iskarti diho ka mimmiigenye chiiyo firdisso yitaaheen.

Mattaayo 21:41

Wihi icho ilaabeen, “ꞌDooꞌdaas sussuuje jiti suuje ka a bakkicha, ꞌdee ꞌdooꞌdoo addane mujjumenye maanti gurnaan lagurti gisi gurnaankiis siicho gos siicha kireesta.”

Mattaayo 25:46

“ꞌDeerka ꞌdabi armaanjireene goya irtaane, iꞌdaasenyi ki fiffissan jiroti jirtuu imassanne ꞌhela.”

Hilassi Ergaano 9:20

Dowwa on minassi weysiit irte, saggi Yeesso Weeli Waakh iyahe cheeke.

Hilassi Ergaano 19:9

Iꞌdaasenyi ꞌdooꞌd gaasiiskoo a ki matah miigenye, yeed rummeysan ꞌdiiꞌde, toro enenyet tuumman ortiis ka, jiti Kamur wihi noole sussuuje kacheekeen. Baawulo ꞌdeerka icho katabe. Abatti khaatte, maan tuumman min Turannoki buure ka ꞌdooꞌd Yeedi Waakh kaleehawwooche.