Hilassi Ergaano 10:35 - Wori Haaggane Yeesso Kiriisto Miinsan Ayyinti Husube Waakh Enenyet Igooche

³⁵ Iꞌdaasenyi Waakh ꞌdooꞌdi il tuummane usu karooro wihi fissan yeelo a khaatta.

Hilassi Ergaano 10:35 Referans Kwoze

1 Yoohana 2:29

Chaꞌatin saggi Kiriisto ifissanyahe garattaan, saggi ꞌdooꞌdi tuummane wihi fissan yeelo nyaakhuti Waakh iyahe a garattaan.

Hilassi Ergaano 10:2

Usu ichoow minkiis tuumman kol tuumman wihi Waakh kahamaadicho yeeleene, toro la Waakh a karooraan. Us ꞌdooꞌdi Yaꞌhuude miskiine weyti gargaare, toro kol tuumman Waakhe wahta.

Kolossaay 3:11

Jirota husub ka enenyet seley ma gaan, iꞌdi maanta Yaꞌhuud ichoow yaafohi Yaꞌhuud ieheynan, ꞌdooꞌdi khandiiti ichoow ki ikhandiyan, ꞌdooꞌdi isoomin ichoow ki lakarooro, ki ilbooyyee ichoow ki furan seley ma gaan. Iꞌdaasenyi eti khumman a Kiriisto, inno ichoow us la a wohoo kalday.

Hilassi Ergaano 15:9

Inno ichoow icho la walah inno yeerarroocho mele, wihi tahe kakhuufnaanki icho Waakh kakhuufeen ka, Waakh uurassicho a dikhe.

2 Koriinto 7:1

Maantaka aalasseeyki an weyti ꞌdoono, Waakh wahaas tuumman a inno iayyiche gone, wihi tuummane sarteen ichoow rubeyteen biꞌdirroocho iskadikhno. Jeenteti inno Waakh ikaroorruu la, orey isohda ꞌdooꞌdi tuum munyee ateeha.

Kolossaay 1:6

Wora Haaggan a atin iyimiyye, ꞌdooꞌdi ittaawenye harra tuumman laka a kataaꞌha toro gurnaan dela. Waha la a wihi goytiin ka laka yitah, uus maanti kolooraat atin Wora rummaat daagteene, toro haaggi Waakhe buure runtiis tuum abatteen.

Hilassi Ergaano 9:31

ꞌDeerka urur Kiriistoki ilassi Yaꞌhuudiya ichoow Gaalilaaya ichoow Saamariya kajiro ba geeddoo ka sina laan nebey kafiddiyeen. Rubeyti Munyee la icho miigoosse, toro la uur miigoosse, toro ꞌdooꞌd laka kakhayme. Icho tuumman la Kamur karooreen.

Efeesso 5:21

Wihi ꞌdaꞌddaboot, jeenteti atin Kiriisto iinkaanyittaan u, taba giꞌde, af iiskutina.

Efeesso 1:6

Maantaka Waakh koolinno jeenteti haaggiiski buurenye us inno siiche u. Weeliiski us weyti ꞌdoono ka haagga iꞌdaanu a inno siiche.

Galaatiya 3:28

Kola enenyet seley ma gaan. Iꞌdi maanta Yaꞌhuud ichoow yaafohi Yaꞌhuud ieheynan, ommos bowꞌda ichoow ꞌdooꞌdi bowꞌda ieheynan, ommos mejel ichoow deyyeho seley ma gaan, a mehe atin tuumman Yeesso Kiriisto ka a wohoo kalday.

1 Koriinto 12:13

Iꞌdi tahe Rubeyta kaldaye Waakh on inno tuumman sartoo kalday goya inno kabaattissite, yaafohi Yaꞌhuud ommos yaafohi Yaꞌhuud ieheynan eheetteey ka ba, bowꞌda ommos ꞌdooꞌdi lafure eheetteey ka ba. Inno tuumman la Rubeyta kalday on inno lasiiche, inno lakasookhube.

Rooma 3:22

Waakh kakhuufnaanki enenyet Yeesso Kiriisto kakhuufo ka iche enenyet eti ortiis ka fissan iekkaacha. Waha la eti tuummane Yeesso Kiriisto rummeesti ka a rum. Waakh enenyet seley ma sassaaho,

Rooma 2:13

A mehe ꞌdooꞌdi amurre Muusa nabah on ka daago mee Waakh ꞌdooꞌdi fiffissan iekkaacho. Iꞌdaasenyi ꞌdooꞌdi wihi amurre ꞌdoonto yeelo iche Waakh ꞌdooꞌdi fiffissan iekkaacha.

Luuka 1:28

Herta Waakh Maariya isoobahte wihi iche itidah, “Nebeytaah ma furatti, atihi Kamur weyti kijilhaate. Kamur a kileejira!”

Fiiliffi 3:3

A mehe innohi Rubeyti Waakh ka weysanni, wihi Yeesso Kiriisto inno iyeele keeylajno toro wihi enenyet sartiis ka yeelo ikakhuufin, iche khandihi rummaate.

Hilassi Ergaano 10:28

Beetero la wihi us ꞌdooꞌdaas iyidah, “Weyti a garattaane amurreteen eti Yaꞌhuude yaafohi addan kachimmamo ommos minassicho gelo a buusantahe. Iꞌdaasenyi Waakh mehe ituse ya, an et an a biꞌdir ommos a suuj adeeh mele.

Rooma 2:14

Chirri ꞌdooꞌdi Waakh igaranne amurre Muusa ikhabin, uuricho on woyo wihi amurre elatti raaho, ꞌdooꞌda saggi us amurre iraaho tusa chiꞌicho amurre ikhabin laka.