Efeesso 2:3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

³ Inno tuumman laka ꞌhor iꞌdichooda eheete, wihi uurasseen goya kijiro uskeel imoono on iamuunne, uskeeli uurasseen ichoow malasseen ꞌdooneen on maanjeeranne. Inno iꞌdi ꞌdooꞌdi addan u wihi inno imale a holi Waakh.

Efeesso 2:3 Referans Kwoze

Tiito 3:3

Iꞌdi tahe inno rubeyteen laka ꞌhor ꞌdooꞌdi ꞌdalammeenye yeed idaagine leekkeeste, bowꞌdati wahanyeyyohi noole uurasseen imoonaane toro kahamaadicho on eheet. Jiroteen wihi buuhe a suujoon ichoow kalꞌdarri. A inno laꞌdiiꞌde inno laka ꞌdooꞌdi addan a ꞌdiiꞌdne.

1 Beetero 1:14

Iꞌdi nyaakhuti yeed daaguu, suujoonki liimoono maanti atin wohoo igaran atin khabteen iinokhanna.

Efeesso 4:22

Wihi atin laabche, jiroti atin ꞌhor jirteene, fiddihiinki uskeel liimoono atin ekkeeste toro atin kheerooche ꞌdiicha.

Rooma 13:14

Taba giꞌde sagag tuumman ka Yeesso Kiriistohi Kamure iꞌdiis ateeha, toro la wihi uurassiin goya kijiro uskeel imoono koloo kalday laka araahina.

Rooma 6:12

Maantaka uus uskeel sartiinta tamuut dakhan, uus ꞌdee atin wihi uurassiin kijiro uskeel imoono raahine.

1 Yoohana 2:16

A mehe wahanyeyyohi harrata a iꞌdi maanta wihi ꞌdooꞌd uurassicho goya kijiro uskeel imoono ichoow ꞌdooꞌdi wihi us argo tuumman iildeerroti ichoow ꞌdooꞌdi wihi us khabo ichoow wihi us yeelo keeylajo. Suujoonka tuumman Waakkhi Aabbaheene ma kayamiite, wihi keeno a wahanyeyyohi harratane laꞌdoono.

Efeesso 2:2

Maantaas la wahanyeyyohi harratane sussuuje ichoow karnati ginnayyohi saraat anti iche raahteen. Ulla a ki ꞌdooꞌdi Waakh daagiwwaayo woyo.

Yoohana 8:44

Atin a nyaakhuti Seytaanki ooyohiine. Wihi us imoono tuumman atin laka yeeline ꞌdoontaan. Uus uumaccho ka us eti ꞌdooꞌd bakkicho on eheet. Ulla toro rum a ꞌdiiꞌda, iꞌdi tahe us injire wihi rummaat ma cheekin. Chirra us yeedi beenaat cheeko la, wahaas eti rumanka us yahe tusaan. Us a eti been lehe, toro la a ooyohi ꞌdooꞌdi been goocho.

2 Koriinto 7:1

Maantaka aalasseeyki an weyti ꞌdoono, Waakh wahaas tuumman a inno iayyiche gone, wihi tuummane sarteen ichoow rubeyteen biꞌdirroocho iskadikhno. Jeenteti inno Waakh ikaroorruu la, orey isohda ꞌdooꞌdi tuum munyee ateeha.

1 Koriinto 4:7

Ayyo ꞌdooꞌdi etoo addan kadeefo atin kayeele? Mehe khabtaane, Waakh atin isiin? Chirri atin lasiiche la, a iꞌdoh iꞌdi etoo iꞌhelin u, ieylajjaan?

Rooma 7:18

Wihi an tissibo, walah haaggane goyteey kijiro mele, saggaas on u wihi uureey goya kijiro uskeele imoonaan. A mehe an haage yeelin imoona iꞌdaasenyi yeelin ma abuuꞌd.

Marko 4:19

iꞌdaasenyi dowwa on waꞌdwaaꞌdi harrata ichoow ꞌdamaanki kamurroon ichoow wahanyeyyohi addane liimoono ba Yeeda afchaane, gurnaan icho delaan mele.

Rooma 11:30

Atinhi ꞌdooꞌdi ilassi addan goorat Waakh raahin a ꞌdiiꞌddeen. Toolla la ꞌdooꞌdi Issiraayel Waakh a raahiwwaaye gone, Waakh uur a atin isoonugleeste.

Rooma 9:22

Saggaas on u, chiꞌ Waakh enenyet holiis ichoow miigtiis tusin ꞌdoone laka, wihi us gooche, us ꞌdooꞌdi kootte baabiin liigooche weyti a isamacchaara on.

Yoohana 1:13

Nyaakhuta delmaatti sarti weeli enenyet ma kasoouummamine ommos wihi weeli enenyet gooche menye, ommos ꞌdooninti mejel mee. Iꞌdaasenyi Waakh rubeytiissa nyaakhutiis kayeesse.

2 Beetero 2:18

A mehe icho yeedi ilmarhaatteete kaayyeedaane isatahnoochaan. ꞌDooꞌdi yeed Yeesso ka jarakhenye, dowwanoha ka suujoonki us yeele kabahsati wihi uurassicho goya kijiro uskeel imoono ka sohoꞌddarri isoojiitaane angey gessaan.

2 Beetero 2:14

Koloo kalday laka uskeel ma ꞌdiichaane, indohicho oboorrihi icho leeurꞌdin ꞌdoonaan on menye, wohoo addan ma khabtaan. ꞌDooꞌdi yeed Yeesso goyaka jarakhe ekkeestaane uskeel kalugꞌdaan. ꞌDooꞌda ꞌdamaam on menye wohoo addan ma woyaan. Icho a ꞌdooꞌdi Waakh fale.

1 Timooti 6:9

ꞌDooꞌdi kamurrowin ꞌdoono, kajmeti uskeel kaluguꞌddo ichoow angey ichoow wahanyeyyohi ꞌdalame liimoono ichoow suujoone kadihaan. Waha la icho a jiitaane ichoowka suujaachaane bar tiraan.

Galaatiya 3:22

Iꞌdaasenyi Chiirnaanneti Waakh mehe cheekta ya, uskeel weeli enenyete harra tuumman a hide, ꞌdee ꞌdooꞌd Kiriisto ayyinti Waakh gooche, kakhuufnaanki Yeesso Kiriisto lakakhuufo ka ꞌhela.

Rooma 1:24

Maantaka Waakh icho a ꞌdiiche, ebba uskeeli uuriis imoono yeele. Jeentetaas u biꞌdirroonki nool sarticho ka a isyeeleen.

1 Yoohana 2:8

Eheet a, amuroo husube atin isoochiira. Runtiis goytiis ichoow goytiinna lakaarga. A mehe banayhi rummaat a bildiikhaane, mugꞌdi la baaba.

Hilassi Ergaano 14:16

Kholoyyohi kute ka Waakh yaafo tuumman a ꞌdiiche, tooba jitiche tabte.

Rooma 2:14

Chirri ꞌdooꞌdi Waakh igaranne amurre Muusa ikhabin, uuricho on woyo wihi amurre elatti raaho, ꞌdooꞌda saggi us amurre iraaho tusa chiꞌicho amurre ikhabin laka.

Rooma 5:9

Diig Kiriisto ka, Waakh ꞌdooꞌdi fiffissane inno iekkaache gone, geeddoo meheenye Kiriisto ka holi Waakh inno lakariba?

Rooma 5:10

Iꞌdi tahe inno chiiyti Waakh nahaayi, Waakh omootti Weeliis ka ankiis inno keene. Toolla Waakh ankiis inno keene la, geeddoo meheenye jiroti Weeli Waakh ka inno lariba!

Kolossaay 1:21

Atin goorat ꞌhor Waakh foga ileejirteene, maliin ka chiiytiissa eheet jeenteti atin uskeel iyeesseen u.

1 'Dessaloonika 4:13

Toollaka ꞌdooꞌd Kiriistokaaw, atinhi wihi ꞌdooꞌd Kiriistoki tuume kayateeh wihicho abattaane ꞌdoonna, ꞌdee jeentetichuu iꞌdi ꞌdooꞌdi addane khajjeel ikhabin u ooyina.

1 'Dessaloonika 5:6

ꞌDeerka uus inno iꞌdi ꞌdooꞌdi addane urꞌdo itaahan. Iꞌdaasenyi taba a neybaanni toro la a isjeyinno.