Efeesso 1:17 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹⁷ An a inonnokhda Aabbaheenki weynaan tuumman tiis tahe, Yeesso Kiriistohi Kamureene Waakkhiise daaha, ꞌdee Rubeyti Munyeenye atin kharaasso, eti Waakh yahe atin isoobabbakkaahisso a atin siicho, ꞌdee Waakh mujjum abattaan.

Efeesso 1:17 Referans Kwoze

2 Beetero 1:3

Miigti Waakh ka wihi tuummane jiro miinsane ꞌdee inno jiroti Waakh kahamaado jirro a inno siiche. Garanti inno Kiriisto garanni ka wahanyeyyohaas a khabna. Toro la weynaantiis ichoow haaggiiski weyti deefo ka a inno wahe.

2 Beetero 3:18

Iꞌdaasenyi haaggi Waakhe buure ichoow abanti atin Yeesso Kiriistohi Kamureenenye ꞌDoorribeheene abattaan ka weynaada. Toolla ichoow jirtuu tuummamba us ba koolo ꞌhela! Aamiin.

Efeesso 1:3

Waakkheenki Aabba Yeesso Kiriistohi Kamureene koolinno. Waakh Kiriisto ka, goobi Waakh goyaka buuhi Rubeyti Munyee kayamiit tuumman a inno imaale.

Yoohana 17:3

Enenyet la chuꞌus atihi kaldaye rumanka Waakhe kigarti, toro la Yeesso Kiriistohi at sooergatte garti, wahaas a jiroti jirtuu imassan.

Mattaayo 11:27

Yeesso toro wihi us ꞌdooꞌd iyidah, “Aabbaheey walah dakkhan dahantaaya soogesse. Aabbahaaya on menye et Weeliis garti mele. Toro la Weeliis ichoow ꞌdooꞌdi Weeliis ibabbakkaahin ꞌdoono on menye, et rumanka eti Aabbaheey yahe garti mele.

1 Koriinto 2:10

Iꞌdaasenyi waha a wihi Waakh Rubeyti Munyee ka nah isoobabbakkaahiche. Iꞌdi tahe Rubeyti Munyee walah tuumman a fiirissa. Mali Waakhe dagsan laka a fiirissa.

Efeesso 3:5

Waakh kholoyyohi oraat waha dagsan ma tusine, toolla la Rubeyti Munyee ka ergaanotiisti munyee ichoow ꞌdooꞌdi Waákh íyeyyeedo munyee waha a isoobabbakkaahiche.

Yoohana 20:17

Yeesso chirraakka wihi us iyidah, “Iikhaban, iꞌdi tahe an uliba Aabbaheey ma inokhan. Nyaame, ꞌdooꞌdi irummeeste iiro, saggi an eti Aabbaheeyenye toro icho laka Aabbahichee ikanokhdi, icheek. Ulla a Waakkhaaya, toro la a Waakkhichooda.”

Hilassi Ergaano 6:10

iꞌdaasenyi Isiteefano kharati Rubeyti Munyee siisse ka yeyyeede, eticho yeed ilaabin yabuuꞌd mele.

Mattaayo 6:13

Kajmeti uskeel nah kaluguꞌddo nah kajeyiche, iꞌdaasenyi Seytaanki uskeel leh nah karib!’

Yoohana 14:26

Iꞌdaasenyi Rubeyti Munyeenye ꞌDooggargaarto layadeehe, Aabbaheey meesseey ka sooergo, walah tuummane atin abissa, toro la wihi tuummane an atin isoocheeke, atin kasooꞌhelissa.

2 Koriinto 12:1

Orey on isohda eylaja. Iꞌdaasenyi indigir iche khabto mele. Eheetteey laka inti an eylajeey ka eleelo a wahanyeyyohi Kamur ituse iꞌdi maanta fooltabchoyyo ichoow wihi Kamur isoobabbakkaahiche.

Luuka 21:15

A mehe an yeedi atin tadeehiin ichoow khara a atin siicha, ꞌdee chiiytiin tuumman goyaka koo atin tirrimin yabuuꞌd mele ommos et runti atin cheekteen ꞌdiiꞌdo mele.

1 Koriinto 12:8

Rubeyti Waakh on ka etoo wori khara lasiicha, Rubeyta Waakh on ka etoo addan wori walah lakagarti lasiicha.

1 Koriinto 2:8

Weynaanti harrata kichekoo kalday laka kharata inno kaayyeeno ma aban. Iꞌdi tahe chiꞌ goorat icho abteen, Kamureenki weynaan tuumman leh massalaaba ma kakaahaan gon.

Rooma 15:6

ꞌdee atin tuumman hooyoo kalday ka Waakkhi Yeesso Kiriistohi Kamureene Waakkhiisenye toro la Aabbahiise saaꞌddaan.

Yoohana 16:3

ꞌDooꞌd la waha tuumman a atin yeela, iꞌdi tahe icho Aabbaheey ma gartaane, ani laka ma igartaan.

Yoohana 14:17

Waha a Rubeyti Munyeenye rum leh. ꞌDooꞌdi harrata la Rubeyti Munyee ma khaatti. Iꞌdi tahe icho Rubeyta Munyee ma argaane, ommos ma gartaan. Iꞌdaasenyi atin a garattaan, a mehe Rubeyti Munyee toolla a atin leefiddiita, toro berri goytiinna kijirta.

Mattaayo 16:17

Yeesso wihi us ilaabe, “Siimon inam Yoohana, ati Waakh a kimaale. Iꞌdi tahe runtaas at cheekte ti weeli enenyet katimiy menye, iꞌdaasenyi Aabbaheeyki serey jiro iche kisoobabbakkaahiche.

Mattaayo 11:25

Yeesso chirraakka weeste wihi us yidah, “Aabbahaaw, Kamuri serey ichoow harra ba iween, a kikoolicha. Iꞌdi tahe at wahanyeyyoha ꞌdooꞌdi kharayyeenye toro la weyti soome a kadagisse, ꞌdooꞌdi iꞌdi nyaakhutenye wohoo igaran la tusse.

Bakkaahit 7:12

wihi icho yidaaheen, “Aamiin! Saaꞌdo ichoow weynaan ichoow khara ichoow kalaꞌd ichoow inkaanyit ichoow miig ichoow anto Waakkheenki jirtuu tuumman jiro a muꞌdanyahe. Aamiin!”

Tiito 1:1

Eti khadaaba kisoochiiro a ani Baawulohi ilbooyi Waakhenye, toro la ergaano Yeesso Kiriistee. Anna a liisoobahche, ꞌdee ꞌdooꞌdi Waakh soobahsate gargaara Waakh mujjum kakhuufa, toro la wori rummaate Kiriisto miinsane jiroti Waakh ꞌdoono lajiro icho woya.

Yaakoobo 2:1

ꞌDooꞌd Kiriistokaaw, atin Yeesso Kiriistohi Kamureenenye toro weynaan tuumman leh a rummeysatteen gone, taba enenyet seley asassaahina.

1 Koriinto 14:6

Toolla ꞌdooꞌd Kiriistokaaw saggoh atin igargaaro chirri an amiite, an afi Rubeyti Munyee kaayyeedo? Sag ba! Sammata an wihi Waakh isoobabbakkaahiche ommos runti an gardi ommos farniinki eti Waákh íyeyyeedo an atin ikasoochekin, ommos an walah atin iabin, an walah an atin kagargaaro mele gon.

Luuka 12:12

A mehe Rubeyti Munyee chirraas wihi atin tadeehiin a atin abissa.”

Luuka 2:14

“Waakkhi saraat a lasaaꞌdo. ꞌDooꞌdi harrata ka Waakh kahamaado la nebey a lakakaalo!”

2 Timooti 2:25

ꞌDooꞌdi usu tirrimo laka samacchaar on walah abcha, kolossoo Waakh ꞌdooꞌdaas rubeyohi uskeel kasoonokhti a siicha, runtaas rummeestaane ulla icho woya.

Rooma 1:28

Toro la jeenteti icho Waakh garan iꞌdiiꞌdeen u, Waakh icho a ꞌdiiche, uskeeli nool kamassaan. Suujoonki nool on kamassaane, jeentetaas u wihi kootte ikamaline yeelaan.

Hilassi Ergaano 7:2

Waha ka wihi us laabe, “Yaafeey idagansada. Waakkhi weynaane tiis tahe, aabbaheenki Aburaaham layadeeh geeddi goorat archiiy us ilkerengeetti weene Haaran igelin, ili Messabotaamiya ka a isoobahe.

Efeesso 4:13

Waha la orey on isohtaane ichoowka inno tuumman kakhuufnaanki inno Waakh kakhuufno ka ichoow Weeli Waakhe inno abanni ka wohoo kalday nateehe, ꞌdooꞌdi iiꞌdowe nateehe ichoowka geeddi Kiriisto iiꞌdowe iiꞌdowna.

Fiiliffi 3:15

Innohi tuummane wahanyeyyohi Waakh ka iiꞌdowne, malaas khabno giꞌde. Iꞌdaasenyi, chirri gaasiinkoo maloo addane yeere khabo, Waakh wahaas a atin isoobabbakkaahicha.

Mattaayo 20:33

Wihi icho ilaabeen, “Kamur, nahi il agarro ꞌdoonna.”