2 Timooti 1:5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

⁵ An saggi at kakhuufnaanki rummaate Kiriisto lakakhuufo ikhabto a kasooꞌhela, iꞌdi goorat inkookotaahti Looyis layadeeh ichoow abartaahti Yuunis layadeeh ijireen u. Anna a tissiba at laka a iꞌdichooda.

2 Timooti 1:5 Referans Kwoze

1 Timooti 1:5

Jeenteti an waha yeel ikaadeeh la, a iꞌdoo ꞌdee ꞌdooꞌd Kiriisto ꞌdoonin isikhabo. ꞌDooninta la inti iche katamiit a uuri eloo rucchul laka ikhabin ichoow rubeyti suujoon inno ikacheekan ichoow kakhuufnaanki rummaate Kiriisto lakakhuufo.

Hilassi Ergaano 16:1

Baawulo ichoow Siila koloo ilkerengeetti Deerbe tabeene, saahka ilkerengeetti Luussira irteen. Etoo abatti Kiriisteenye Timooti layadeehe abartiis Kiriisto rummeysatte la intaas a kajire. Abartiis a inanti Yaꞌhuude, iꞌdaasenyi aabbahiis a yaaftoo Yaꞌhuud ieheynan.

1 Timooti 4:6

Chirri at ꞌdooꞌdi Kiriisto rummeeste waha kawaanisso, at ilbooy Yeesso Kiriistoki haaggane tateeh. Toro la kol dakkhan wori rummaate Kiriisto miinsan ichoow haaggi lakaasooweynaache at raahto rubeytaah ka miige kisiichaan.

2 Timooti 3:15

toro la saggi uus at weel keeheet Chiirnaanneti munyee lakaabche a garatta. Chiirnaanneta la kikharaan a tabuuꞌde, ꞌdee ribnaan kiwoyta. Ribnaanka la kakhuufnaanki Yeesso Kiriisto lakakhuufo iche lakeela.

Rooma 15:14

ꞌDooꞌd Kiriistokaaw, ani rubeyteey saggi wihi hahhaaggan atin ibuuhaane, wihi ꞌdooꞌd Kiriisto miinsan tuum igarattaane toro la iswaanin itabuuꞌdiin a tissiba.

Ibiraaniya 6:9

Aalasseenyoki nah weyti ꞌdoonno, chirri nah iꞌduu atin faajjiino laka, nah waꞌdwaaꞌd ma atin kakhabno. Iꞌdi tahe saggi atin jiti deefo ribnaan raaho iraahtaane garanna.

2 Timooti 1:12

Jeentetase toolla ani sina ikawaarta. Iꞌdaasenyi ma kalakhaanyeysadi. A mehe eti an rummeesde a garda. Anna waha a tissiba, miigti us wihi an dahantiis gesse us kayaakhicho ichoowka ibeenki ꞌdaꞌddaboot yateeh a khaba.

2 Koriinto 6:6

Jiroti eloo rucchul laka ikhabine nah jirre ka, runti Waakhe nah abanne ka, samacchaari nah eheet ka, uuri ꞌdabakhenye nah khabne ka, Rubeyti Munyeenye goyteenyo kajirto ka, ꞌdooninti rummaate nah khabne ka, saggi nah ilbooyyeti Waakh inahe a laarge.

Rooma 8:38

An wihi an tissibo a mehe ya, walah jirtuu dakkhan ꞌdooninti Kiriisto inno ꞌdoono inno kagoocho mele. Omoot ommos jiro ommos herti Waakh ommos ginnayyo ma inno kagoochaan. Wihi toolla jiro ommos wihi sooyomboocho ommos miigti Seytaan laka ma inno kagoochaan.

Rooma 4:21

Iꞌdi tahe wihi us tissibo a mehe ya, Waakh ayyinti us enenyet igooche tuumman buuhin a yabuuꞌd.

Ibiraaniya 11:13

ꞌDooꞌda dakkhan la Waakh kakhuufaayi tuume. Icho la wihi Waakh iayyiche ma ꞌheline, toro la fogaka wihi ꞌdee berri sooyateeh argeene, kahamaadeen. Saggi icho harrata ka chiiy ichoow ꞌdooꞌdi yeelan iyahiin ꞌdow ka a cheekeen.

Rooma 14:14

Jeenteti ani ichoow Kamureenki Yeessee koo kalday inahuu, wihi an tissibo kallaayo, golol awtiis u biꞌdire mele. Iꞌdaasenyi, chirri etoo gololoo biꞌdir leeyahe, ꞌdeerka gololaas etaas ka a biꞌdir gon.

Rooma 14:5

Toro la etoo ka seeroo seerassi addan a kamunya. Etoo addan ka la seerar tuumman a ekka on. Ebba ayta ka wihi leemujjume a goocho.

Hilassi Ergaano 26:26

Agiribbahi karnate, an roorro laane kileeyyeeda. Wihi an tissibo, at wahanyeyyoha tuumman a garatta. A mehe inti dagsan ma lakayeelin.

Yoohana 1:47

Chirri Yeesso Naꞌdaanayelhi isoosohti arge ka, wihi usu miinsane us yidah, “Eti rumanka Issiraayelenye wihi beenaat liikaꞌhelin kalla.”

1 Beetero 1:22

Toolla runti atin raahtaan ka a isdikhteene ꞌdee ꞌdooꞌdi Kiriisto rummeeste ꞌdooninti rummaat ikhabtaan gone, taba giꞌde uurassiin ka weyti isꞌdoona.