1 Timooti 5:10 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹⁰ toro la a ti jeenteti iche haag iyeessuu enenyet tuumman inkaanyito. Haaggiche a ꞌdow on. A ti nyaakhuutiche jiti haaggan kasooweynaasse, a ti goobiche ka ꞌdooꞌd martiisatte, a ti ꞌdooꞌdi Waakh iꞌdi ilbooy u luhlo dikhte, a ti ꞌdooꞌdi sina khabe gargaarte. A ti hili haaggan tuumman isisoobihisse.

1 Timooti 5:10 Referans Kwoze

1 Timooti 6:18

Haag on a yeeleene, haaggaas icho yeelaan ka la kamurre a yitaaheen. ꞌDooꞌdi uurnugleel ka walah diibo a yitaaheene, wihi icho khabaan la ꞌdooꞌd a leegismeen.

Tiito 3:8

Yeedassaas an idah a wihi lakakhuufo. Atihi yeedassaas katirriinsatti ꞌdee ꞌdooꞌdi Waakh rummeeste kol tuumman haag yeelo iche ꞌdoona. Wahanyeyyoha la enenyet a ihaagganyahiine toro la a iroonyahiin.

Hilassi Ergaano 9:36

Ilkerengeetti Yooba ka makhaabassoo abatti Kiriisteenye Tabiita layadeeh a jirte. Magahiche afi Giriig ka a Dorkas. Afaf lammacho ka chiꞌ lalaabe a Hoól. Iche la kol tuumman ꞌdooꞌd wihi haaggane iyeesse, toro la miskiino gargaarte.

Tiito 3:1

Tab ꞌdooꞌd Kiriisto kasooꞌheliche, ꞌdooꞌdi anto khabo ichoow karnatohi sirgaal ba a inkaanyiteene wihi liiꞌdoono kol tuumman a raaheene wihi haaggan la a itannabteene a yeeleen.

Tiito 2:7

Ati rubeytaah la wihi tuummane at yeesso ka, iyookkoti haaggane icho raahaan iateeh. Saggi at enenyet walah iabisso ka, eloo rucchul laka atusine, wohoo ꞌdabakhe iikhaatine,

2 Timooti 3:17

Iꞌda ka eti Waakh hili haaggan tuumman tuume haaggin yabuuꞌde, toro liitannabicha.

Rooma 12:13

Wihi atin khabtaan ꞌdooꞌdi Waakhe gargaar ꞌdoono leegisma, toro la artohiin faha, marti urmohiin a soogesso.

Luuka 7:44

Yeesso ꞌdeerka makhaabál iurgiye wihi us Siimon iyidah, “Siimon bal makhaabassa yey! At uus an kootte minkaah imiy bicchehi an luhlo kadikhdi laka ma isiinne, iꞌdaasenyi iche ilmohiche ka luhlo a ikhuyyaamisse, tintiche ka la a ihiyyaayte.

Mattaayo 5:16

Taba giꞌde atin laka iꞌdaasu, haaggi atin yeessaan weeli enenyet tuumman a argo, ꞌdee enenyet tuumman Aabbahiinki serey jiro a inkaanyito.

1 Beetero 2:12

ꞌDooꞌdi Waakh igaran goyaka jiroti haaggan jira, ꞌdee koli icho suujoonkoo atin kacheektaan tuumman, jeenteti icho haaggi atin yeessaan ifiirichaan u, Waakh a koolicheen maanti us yamiit.

Ibiraaniya 13:21

Waakh ba haaggi tuummane atin kaankhane, ꞌdee atin wihi us ꞌdoono yeessaan atin siicha. Yeesso Kiriisto ka, Waakh ba miigti atin wihi us kahamaado yeessaan atin siicha. Yeesso Kiriisto ba jirtuu tuumman lasaaꞌda. Aamiin.

Ibiraaniya 13:2

Goobassiin ka, ꞌdooꞌdi atin igaranne atin martiisattaan laka kasooꞌhela. A mehe ꞌdooꞌdoo saggaas on u garrawwaayyo ka herti Waakh a martiiste.

Ibiraaniya 10:24

Saggi inno uur isimiigoonno, ꞌdee ꞌdoonin isikhabno, haag la isiyeello kamalanni giꞌde.

Tiito 3:14

Wihi an ꞌdooꞌdeen kaꞌdoono a ichohi geeddi icho yabuuꞌdiin haag yeelin abtaane, ꞌdee ꞌdooꞌdi rumanka gargaar ꞌdoono gargaareene, ꞌdee iicho jiroti indigir laa jirin.

Tiito 2:14

Yeesso la jeentetane jirotiis inno isoobahche, ꞌdee hugunꞌdarri tuumman inno kasoofura, toro la inno dikha ꞌdee ꞌdooꞌdi kiisenye haag kalday imoono nateeh.

Luuka 7:38

Yeessohi dikkil kajiifo adahtiis tolossatte ooyte, ilmohiche ka luhlohiis khuyyaamisse. ꞌDeerka tinticheti matah ka hiyyaayte, luhlohiis doddongatte, miricchi ka subahte.

3 Yoohana 1:12

Enenyet tuumman haag Demmediroos a cheeka. Us runti Waakhe raaha, waha la saggi us eti haaggan iyahe iche tusaan. Nah laka saggi us eti haaggan iyahe a atin isoocheekna. Atin la saggi wihi nah cheekno tuumman rum iyahiin a garattaan.

1 Beetero 4:9

Goobassiin ka nyunnyuuto laan ismartiisda.

2 Timooti 3:15

toro la saggi uus at weel keeheet Chiirnaanneti munyee lakaabche a garatta. Chiirnaanneta la kikharaan a tabuuꞌde, ꞌdee ribnaan kiwoyta. Ribnaanka la kakhuufnaanki Yeesso Kiriisto lakakhuufo iche lakeela.

2 Timooti 2:21

ꞌDooꞌdi uskeeli us yeelo iskadikhe a iꞌdi karmohi khummane, lamunyaache, latannabiche hili haaggan lakahaagsati.

2 Timooti 1:5

An saggi at kakhuufnaanki rummaate Kiriisto lakakhuufo ikhabto a kasooꞌhela, iꞌdi goorat inkookotaahti Looyis layadeeh ichoow abartaahti Yuunis layadeeh ijireen u. Anna a tissiba at laka a iꞌdichooda.

1 Timooti 5:25

Saggaas u la haaggi enenyet yeelo iꞌdaanu laarga. Iꞌdaasenyi chirri haaggi icho yeelaan liiargin laka, ma dagti.

1 Timooti 2:10

Iꞌdaasenyi deyyehoti ꞌdooꞌdi Waakh istadeeh, wihi lakasooraaho a haaggi iche yeesso.

Kolossaay 1:10

Waakhe atin iwahna, ꞌdee jiroti Kamur inkaanyitto toro kahamaadisso jirtaan. Iꞌda ka sagag tuumman ka enenyet haag a iyeessaane, abannaanki atin Waakh abattaan la a kakhayma.

Efeesso 2:10

A mehe Waakhe wihi toolla inno nahe inno kayeele. Wohoo kaldaye inno ichoow Yeesso Kiriisto nahe ka a inno soouume ꞌdee hilassi hahhaaggane Waakh goorat inno itannabiche kaassahanna.

Hilassi Ergaano 22:12

“Etoo Anaaniya layadeeh ani iargin yimiy. Us weyti Waákh karoora toro amurre Muusa mujjum raaha, ꞌdooꞌdi Yaꞌhuude Damaasko kajiro tuumman la weyti usu inkaanyita.

Hilassi Ergaano 10:22

Reer wihi us ilaabe, “Etoo Korneeliyo layadeehe koobbintoo iskareet itoollo kanimiy. Ulla a etoo fissane Waákh karooro, yaafti Yaꞌhuud tuumman la weyti inkaanyitto. Hertoo Waakhe munyeenye usu minkiis a kiwaho ꞌdee wora a daago itidah.”

Hilassi Ergaano 9:39

Beetero la icho raahe. Chirri us sooeleele ka, lakhaate goonankaas saraat lageeche. Deyyehoti ittaawenye muunkheyyee la intaase tolossa ooyta. Ubbaarreti derdeer ichoow kabuuꞌddeti iche geeddi iche jirte tosse, Beetero tuseen.

Hilassi Ergaano 6:3

Walaalinyeey, et teeba goytiin ka magah khabto, Rubeyti Munyee laka rubeyohicho buuhto toro la kharee soobahcha, hila a gelinno.

1 Timooti 5:16

Iꞌdaasenyi chirri makhaabassoo Yeesso rummeysatte jirto iche la minkiche ka muunkhoyyohoo khabto, iche muunkhoyyohaas woywoyta uus ꞌdee urur Kiriisto huleesa lakorinne. Iꞌda ka urur Kiriisto muunkhoyyohi eti gargaaro laa kalday on woywoya.

1 Timooti 3:7

Toro la a eti ꞌdooꞌdi kharaate Yeesso irummeysan ka laka magahi haaggan khabo. Uus ꞌdee lakhaanyo keenine, angeyi Seytaan geline.

1 Timooti 3:2

Wihi Waakh gooche, eti urur Kiriisto yaakhicho a eti eloo rucchul laka liikacheekanne, makhaabassoo kalday on khabo, wihi us yeelo tuumman ka isjeycho, inkaanyit khabo, goobiis ka ꞌdooꞌd martiisti, ꞌdooꞌd Kiriisto walah abin yabuuꞌd.

Mattaayo 25:17

Ki ugar lamma chilimme khabe laka lamma addan kaꞌhele.