1 Timooti 3:16 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹⁶ Rumanka runti dagsaneete Waakh miinsane Waakh inno isoobabbakkaahiche a weentahe. Kiriisto harrata saggi weeli enenyete iyimiyye, Rubeyti Munyee la saggi us ifissanyahe enenyet tusse. Herti Waakh usu a agarte. Woriis yaafohi Yaꞌhuud ieheynan goyaka lacheeke, ꞌdooꞌdi ittaawenye harra usu rummeeste, goobi Waakh liikorche.

1 Timooti 3:16 Referans Kwoze

Yoohana 1:14

Ki magahiis Yeed layadeeh weeli enenyet yitahye, harrata ka goyteen furte. Inno la weynaantiisti weyti haaggan a agarre, weynaanti weeli keleyenye Waakh. Ulla usuhi haaggi Waakhe buure ichoow rume buuhaane Aabbaheen kayimiy.

Ibiraaniya 1:3

Weela Waakh la weynaanti Waakkhi ababo tusa, ulla toro a fooli Waakh. Ulla yeediiski miig leh ka wihi tuummane jiro khuccha. Ulla a yumuyye, ꞌdee usu rubeytiis jiti uskeeli weeli enenyet lakadikho yitah. Inkoo us wahaas yeele ka, goobi Waakh ka Waakkhi Weyti Ween ankiiski miigeet orronte.

Marko 16:19

Inkoo Yeessohi Kamure icho leeyeede ka goobi Waakh liikorche, Waakh anki dahantiisti miigeet orronte.

Rooma 16:25

Waakh saaꞌdno! Us kakhuufnaanki atin Kiriisto kakhuuftaan ka atin miigoon a yabuuꞌd. Ulla Wori Haaggane Yeesso Kiriisto miinsane an cheeko ka waha yeelin a yabuuꞌd. Wora Haaggan la a ki inno awteen u iabanne, Waakh kalday on inno isoofura. Runta la a ti Waakh guꞌhassi ittaawe dagche.

Luuka 24:4

Waha ka ngꞌaayaani chirraas on et lamma darfohi iꞌdi ankhad u ababo khabto garabicho tolossateen.

Kolossaay 1:23

Iꞌdaasenyi, taba wori rummaat kakhuufa, iꞌdi wihi isesseehin u jurkhicha. Khajjeeli Wori Waakhe Haaggan akaguurina. Wora atin daagteen a ki ꞌdooꞌdi harra tuumman liicheeke. Anna a Baawulo, a falfati Wora Haaggan cheekto.

1 Yoohana 1:2

Eta la a nah isoobahe, nah usu a agarre, runti usu miinsane cheekna. Toro la eta jiroti jirtuu imassan khabo, goorat Aabbahiis leejire nah isoobahe iche atin isoocheekna.

1 Beetero 3:22

Kiriisto la goobi Waakhe inokhte, Waakh dahantiisti miigeet orronte, herti Waakh tuumman ichoow wihi tuummane goobi Waakh ka anto ichoow miig leh ba afiis ma kutaan.

1 Beetero 1:12

Wihi liisoobabbakkaahiche a mehe ya icho ma isihiline, iꞌdaasenyi atine atin ihileen maanti icho wahanyeyyohi geeddi icho noolyahiin iitaahane guꞌhassi ittaawenye yombo sooraaho sooyateeh kaayyeedeen. Toolla la ꞌdooꞌdi Wori Haaggane miigti Rubeyti Munyeenye goobi Waakh lakasooergo cheeko ka, wahanyeyyoha a atin liisoocheeke. Herti Waakh laka ichehi wahanyeyyohaas agarto imoonta.

Kolossaay 2:2

Iꞌdane yeela, ꞌdee icho uur miigoocha, isꞌdoonaane wohoo kalday yateehiin. Toro la ichohi Wori Waakh tuum abtaane rumanka liibuuhicho iche ꞌdoona. Wora Waakhe dagsan la Kiriisto rubeytiissa miinsanyahe,

Kolossaay 1:27

Wihi Waakh ꞌdooꞌdiiskaas igooche, a waha goorat haaggane dagsane yaafohi Yaꞌhuud ieheynan liisoobabbakkaahicho ꞌdooꞌdiis abti. Waha la a Kiriistohi atin ichoow usu ba wohoo kalday tahiine, ꞌdee weynaanti Kamure inno khajjeello isleegisanno.

Kolossaay 1:6

Wora Haaggan a atin iyimiyye, ꞌdooꞌdi ittaawenye harra tuumman laka a kataaꞌha toro gurnaan dela. Waha la a wihi goytiin ka laka yitah, uus maanti kolooraat atin Wora rummaat daagteene, toro haaggi Waakhe buure runtiis tuum abatteen.

Luuka 22:43

Hertoo Waakh la goobi Waakh ka timiyye, isoobahte, miig siisse.

Mattaayo 3:16

Yeesso uus labaattissiye, chirraas on bicche goya kasoobahe. Chirraas on sereye bakkaahte, ulla Rubeyti Waakhe iꞌdi kutukuurrug u sooyegto sartiis koorrommatti arge.

1 Yoohana 3:5

Iꞌdaasenyi saggi Yeesso iyimiyye ꞌdee uskeeleen inno ikabahcho a garattaan. Ulla uskeeloo rucchul laka ma yeelin.

Ibiraaniya 12:2

Taba, kol tuumman Yeesso a kamalanni giꞌde. Usú orey inno woye, Waakh kakhuufne, toro uliba laka inno woya, Waakh tuum kakhuufna. Ulla jeenteti hamaadi sugo u, lakhaanyoti eti massalaaba lakakaaho taham a igarrahsate. Ulla toolla goobi Waakh ka komborti Waakhe antoot ankicheki miigeete fiddiya.

1 Timooti 3:9

Rubeyti suujoon inno ikacheekan ka, a ꞌdooꞌdi wori dagsane rummaate Kiriisto miinsane Waakh enenyet isoobabbakkaahiche kakhuufo.

Yoohana 20:12

Herti Waakhe lammeenye gaaddi daddakhan khabto inti sar Yeesso tiil fiddiito, agarte. Hertaas Waakh la too, inti matah kijire iche fiddiita, too la inti luhlo kajireene fiddiita.

Mattaayo 1:23

“Inanti mejel igaran a uurowta, inankoo dessa. Magahiis la Emmaanuwel iche layadeeh.” Iꞌda ka mehe leessa ya, “Waakh a inno leejira.”

Bakkaahit 7:9

Waha ꞌdubicho ka an yeye, orteey ka ururi weyti buurenye ekkees liiubaaꞌdane ilal tuumman ichoow yaafo tuumman ichoow ꞌdooꞌdi fil tuummane ichoow afaf tuumman kayimiyye komborti Waakhe antoot ichoow Heleem ortiis ba toollo arge. Icho la kabuuꞌddeti daddakhane gessateene toro la seytohi geeyi baare dahanohicho ka khucchaan.

1 Beetero 1:20

Geeddi harra liisoouumin on usu lasoobahche, iꞌdaasenyi iroonotiin u ibeenneta ꞌdaꞌddaboote lasoobabbakkaahiche.

Ibiraaniya 7:7

Wihi inno garanni la a mehe ya, eti enenyet iweesti, ichoow ki liiweesti, ki enenyet iweesti ween.

Efeesso 6:19

Ani laka Waakh isoowaha, ꞌdee chaꞌan yeyyeedo, Waakh wihi an adeeh a isiicho, ꞌdee roorro laan enenyet wihi dagsane Wori Haaggan miinsan a icheeko.

Efeesso 1:9

Waakh la maliiski goorat dagsane inno isoobabbakkaahiche. Waha a wihi hamaadiis ka, us Kiriisto ka gooche.

Galaatiya 4:4

Iꞌdaasenyi maanti ibeenki Waakh gooche yitah ka, Waakh Weeliis sooerge. Iꞌdi weeli enenyet u arantoo desse, dakhi amurre Muusa goya kadesse,

1 Koriinto 15:47

Eti oraat harra on kayimiyye, ebeere lakasoouume. Eti lammaatteet la goobi Waakhe kayimiy.

1 Koriinto 2:7

Kharati nah kaayyeeno la a ti Waakhe dagsan. Waakh la kharataas a dagche. Kharata la a ti Waakh geeddi us walah isoouumin gooche, ꞌdee wihi haaggan tuumman ꞌhella.

Rooma 10:18

Iꞌdaasenyi wihi an worsadi a mehe ya, ꞌdooꞌdi Issiraayel wora ma daagin a? Aa! Rumanka a daageen. Iꞌdi Chiirnaanneti Waakh liikachiiruu, “Hooyassicho harra tuumman a kataaꞌheene, yeedi icho yeyyeedeen harra ginꞌdohiche tuumman a eleele.”

Hilassi Ergaano 20:28

Rubeyti Munyee iꞌdi ersimohi hoolaate atin kayeesse. Hoolaha la a ꞌdooꞌdi Waakh. Maantaka isyaakhicha toro la hoolahi Rubeyti Munyee dahantiin gelisse tuumman yaakhicha. Ururi Waakhe goorat Yeesso diiggiis ka Waakh igate, yaakhicha toro toorriba giꞌde.

Galaatiya 2:8

A mehe Waakkhi hili Waakh liihilo ka Beetero ergaanoti ꞌdooꞌdi Yaꞌhuud kayeele, ani laka hili Waakh liihilo ka ergaanoti yaafohi Yaꞌhuud ieheynan a ikayeele.

Rooma 9:5

Icho la aacchinyetichoti lagarti Aburaaham ichoow Isakh ichoow Yaakoobo illehe a khabaan. Kiriisto anki weeli enenyet ka, hiiyyaase kayimiy. Ulla a Waakkhi walah tuumman anti, koolo a ꞌhelo jirtuu tuummamba! Aamiin.

Hilassi Ergaano 10:34

Beetero la yeede wihi us yidah, “An kola saggi Waakh rumanka yaafo tuumman ekka iekkaacho a arge.

Rooma 8:3

Wihi amurre Muusa yeelin iubaaꞌdan jeenteti wihi uurasseen goya kijiro uskeel imoono ꞌdarsicheen u, Waakh a yeele. Waakh weeliiski kaldaye sooerge, soorriyoti uskeel yitah. Weeliiska la iꞌdi weeli enenyet u sarti weeli enenyete uskeel lehe khabe. Waakh ꞌdeerka uskeeli weeli enenyet sartiis kijiro hukkume sina igooche,

Hilassi Ergaano 14:27

Inkoo icho ilkerengeetti Antiyookhiya geleen ka, urur Kiriisto isiwaheene, wihi Waakh icho ka yeele ichoow saggi Waakh jitoo ifure ꞌdee yaafohi Yaꞌhuud ieheynan laka Waakh ikakhuufaan icheekeen.

Yoohana 16:28

An Aabbahaaya kiimiyye, harrata imiy, toro la harrata a kataba, Aabbaheey inokhda.”

Yoohana 13:3

Yeesso saggi Aabbahiis walah tuumman dahantiis igesse a garta, saggi us Waakh ikayimiyye us toro Waakh ikanokhti a garta.

Luuka 24:51

Abatti iweestaayi, abatti katabe goobi Waakh liikorche.

Bakkaahit 17:7

ꞌDeerka herti Waakh wihi iche ani itidah, “A iꞌdoh igirmeysatta? Wihi dagsane makhaabassa ichoow binahi iche koorromatte matah teeba ichoow gaas tomon khabo miinsan, a kisoobabbakkaahicha.

Bakkaahit 17:5

Miintiche la magaha wohoo dagsan itoollo iche kachiiran, Ilkerengeetti Weene Baabiloon, a Abarti Malaayayyoot ichoow Lakhaanyoyyohi Harra.

Ibiraaniya 8:1

Ayti nah elanni talla, rumanka kuhaanihi weyti weene goobi Waakh ka komborti antoote Waakkhi Weyti Ween ankicheki miigeet ka meessi lakiinkaanyito fiddiyo a khabna.

2 'Dessaloonika 2:7

A mehe miigti dagsane hugunꞌdarri toolla laka hole dowta. Iꞌdaasenyi eti toolla waha ichohi yateeh jeycho, a jeycha ichoowka Waakh usu meel kabahcha.

2 'Dessaloonika 1:10

Waha la maanti icho yateehiin, a maanti us soonokhti, ꞌdooꞌdiiski munyeenye usu rummeeste tuumman usu saaꞌdo, toro la kagirmeesti. Waha atin laka goya a kijirtaan jeenteti atin wihi Waakh yeele nah agarre nah atin isoocheekne irummeysatteen u.

Hilassi Ergaano 1:19

Enenyeti ilkerengeetti weene Yeerusaleem kijiro tuumman daage, gosaas magah ibahcheene aficho ka Akeldaama yidaaheen. Iꞌdaakka la mehe leessa ya, “Gosi Diig.”

Yoohana 17:5

Maantaka Aabbahaaw, weynaanti an geeddi at harra isoouumin kileekhabe ortaah ka iweynaay.

Yoohana 15:26

“Maanti Rubeyti Munyeenye ꞌDooggargaarto layadeehe Aabbaheey katamiit an atin isooergo, Rubeyta Munyeenye rum lehe Aabbaheey katamiit, a atin itamiite, wori ani imiinsan atin icheekta.

Yoohana 6:62

Eemba Ínam Aadam usuhi inti goorat us kijire ikoro a agarteen?

Luuka 2:32

Usu yaafohi Yaꞌhuud ieheynane banay ibabbakkaahicha, ꞌdooꞌdaahki Issiraayel la inkaanyit ikeena.”

Marko 16:5

Chiꞌicho goꞌd geleen ka, eti nugule anki miigeet fiddiyo darfohi daddakhan khabo argeene, naheen.

Marko 1:13

Ibeen tomon affar Yeesso hidaaddaas on kijire, Seytaan la kajmeti uskeel kaluguꞌddo ikeene. Hidaaddaas ka binahi yibaat on leejire, herti Waakh la Yeesso ihisse.

Mattaayo 28:2

Harra weyti sesseehte, a mehe hertoo Kamur goobi Waakhe katimiyye goꞌd iratte, daddaab ꞌdembeleeliite, daddaab sarche koorrommatte.

Mattaayo 13:11

Yeesso la wihi us ilaabe, “Waakh garanti wihi dagsane dakhi goobi Waakh miinsan lagarti a atin siiche. Iꞌdaasenyi ꞌdooꞌdi addan iꞌdaas mee.

Mattaayo 4:11

Seytaan ꞌdeerka Yeesso katabe, herti Waakh la timiyye Yeesso gargaarte.

1 Beetero 3:18

A mehe Kiriisto maantoo kalday on uskeeleen iyumuyye, maantoo addan la uskeeleen ma iyamuut. Eti fissan jeenteti ki khollokkhane iyumuyye ꞌdee inno Waakh inno ikeena. Usuhi weeli enenyetenye layigisye, iꞌdaasenyi Rubeyti Munyee ka omoot lakasookahche.

Rooma 10:12

Waha mehe tusaan ya, eti Yaꞌhuude ichoow eti Yaꞌhuud ieheynan seley ma gaan. Kamur a Kamuri enenyet tuummane, ulla eti tuummane usu wahe, weyti imaala.

Rooma 3:4

Iꞌdaas mee! Chirri weeli enenyet tuumman been goocho laka, Waakh rume leeyahe. Iꞌdi liichiiruu, “ꞌDee atihi Waakhe saggi at rum on ikaayyeeddo laarga, toro la saggi at ꞌdooꞌdi wohoo kaacheekti isoorisso laarga.”

Rooma 16:26

Iꞌdaasenyi runta dagsan toolla weyti lasoobabbakkaahiche. Runtaas la Chiirnaanneti Waakhe ꞌdooꞌdi Waákh íyeyyeedo ka a lacheeke. Waha la saggi Waakkhi jirtuu tuumman jiro iꞌdoono inno isoocheeke, iche liiyeele. Amuri us inno ibahche la a mehe ya, nyaama runtaas yaafohi harra tuumman abcha, ꞌdee Kiriisto a kakhuufeene, toro la a raaheen.

2 Koriinto 1:19

A mehe Yeesso Kiriistohi Weeli Waakhenye ani ichoow Silfaano ichoow Timooti woriis atin icheekne, koloo kalday laka, “Aa,” ichoow, “Mele,” ma isleeyadeeh. Iꞌdaasenyi usu ka a, “Aa,” kalday on.

1 Beetero 1:21

Usu ka atin Waakkhi usu omoot kasookahche toro la weynaache a rummeysatteene, ꞌdee Waakh on kakhuuftaane, toro la usu on khajjeel kakhabtaan.

1 Yoohana 3:8

Eti tuummane uskeel yeelo a ki Seytaan, a mehe Seytaan uus uumaccho ka us uskeel on yeela. Weeli Waakh a yimiyye ꞌdee hili Seytaan baabiicha.

Luuka 20:44

Dawuud rubeytiis usu Kamure kawaha, saggoh ꞌdeerka Ki Lasubhe hiiy Dawuud iyahe?”