1 Timooti 1:9 - Wori Haaggane Yeesso Kiriisto Miinsan Ayyinti Husube Waakh Enenyet Igooche

⁹ Inno saggi amurretaas ꞌdooꞌdi liiyeele ki fiffissan ieheynan laka a garanna. Iꞌdaasenyi amurre a ti ꞌdooꞌdi amurreti Waakh iraahin ichoow ki weynaan iinkaanyitin ichoow ki Waakh igaran ichoow ki uskeel yeelo ichoow ki Waakh ikahamaadin ichoow ki Waakh iinkaanyitin ichoow ki ꞌdooꞌdi dele bakkicho ichoow ki diig gelo.

1 Timooti 1:9 Referans Kwoze

Galaatiya 3:19

Amurre Muusa ꞌdeerka mehe liisoobahcheey? Jeenteti Waakh liidaagiwwaaye iche lakasookhaye ichoowka weel nyaakhut nyaakhut Aburaaham ki goorat Waakh ayyintaas ka yeele yimiy. Waakh herti Waakh ka amurretaas a chuukhe. Muusa la Waakh ichoow ꞌdooꞌdi Yaꞌhuud dahcho gele, ꞌdooꞌdaas amurre ikeene.

1 Beetero 4:18

Iꞌdi Chiirnaanneti Waakh tadeeh u, “Chirri ꞌdooꞌdi fiffissan ba ribnaanki laribo ꞌhool yahe, ꞌdooꞌdi Waakh igaran ichoow ki uskeel leh intaakka mee?”

Rooma 5:20

Amurre Muusa a lakasookhaye ꞌdee amurreti lajebcho kakhayanta, iꞌdaasenyi maanti uskeel kakhayme, weyti ꞌdirihiissa haaggi Waakhe buurenye inno imunneynan kakhayme.

Galaatiya 5:23

samacchaar ichoow isjeyin. Amur wahanyeyyoha ꞌdiiꞌddan mele.

Tiito 3:3

Iꞌdi tahe inno rubeyteen laka ꞌhor ꞌdooꞌdi ꞌdalammeenye yeed idaagine leekkeeste, bowꞌdati wahanyeyyohi noole uurasseen imoonaane toro kahamaadicho on eheet. Jiroteen wihi buuhe a suujoon ichoow kalꞌdarri. A inno laꞌdiiꞌde inno laka ꞌdooꞌdi addan a ꞌdiiꞌdne.

Rooma 6:14

A mehe uskeel kola ma atin dakhti, iꞌdi tahe jirotiin ka wihi amurre Muusa atin kaꞌdoonto mee atin dakhti, haaggi Waakhe buurenye inno imunneynane atin dakhta.

Rooma 1:30

ꞌDooꞌda enenyete hanta toro la Waakh ꞌdiiꞌddayyahiine, enenyet leeabaarrama, enenyet a rannyaane toro isatahnoochaan. Kol tuumman la jiti icho suujoon kayeelaan on mal kadowtaane, toro la ꞌdooꞌdi dele ma daagaan.

Bakkaahit 22:15

Iꞌdaasenyi ꞌdooꞌdi ilkerengeetta khariche kijiro, a ki isbiꞌdirroocho, ꞌdooꞌdi tibaato khabo ichoow ki sohoꞌddarri kaassohti ichoow ki enenyet dubunuunu yagiis ichoow ki iyookkoyyohi waakkhakh lakayeessi wahti ichoow ki been ꞌdoono toro kol dakkhan been goocho.

Bakkaahit 21:8

Iꞌdaasenyi ꞌdooꞌdi burꞌdeyyee ichoow ki Kiriisto irummeysan ichoow ki wihi biꞌdire tuumman yeelo ichoow ki enenyet dubunuunu yagiis ichoow ki sohoꞌddarri kaassohti ichoow ki tibaato khabo ichoow ki iyookkoyyohi waakkhakh lakayeessi wahti ichoow ki beeno leh tuumman, meessicho a beyti ꞌdabe iꞌdi lahawti kibiriiꞌd ibolokhto. Waha a omootti lammaatteet.”

Tiito 1:16

ꞌDooꞌda Waakh a garanna essa, iꞌdaasenyi jiroti icho jiraan ka Waakh a ꞌdiiꞌddanyahiin. Weyti laꞌdiiꞌddanyahe, yeed ma daagaane, haaggoo rucchul laka yeelin ma yabuuꞌdiin.

1 Beetero 3:20

Waha a rubeyohi ꞌdooꞌdi goorat ayti Waakh raahiwwaaye maanti goorat Noowa koobanhi buure dise. Waakh la ꞌdooꞌdaas a isamacchaare. Iꞌdaasenyi et siyyeet kooban goya kijirte kaldaye bicche ikhaatin.

Ibiraaniya 11:31

Raahabti malaayee la kakhuufnaanki iche Waakh kakhuufte on ka, iche ꞌdooꞌdi Waakh daagin ꞌdiiꞌde liileeigaasawwaaye. Iꞌdi tahe iche ꞌdooꞌdi Issiraayele ꞌdegey irte, nebey ka a martiisatte.

2 'Dessaloonika 2:8

Chirraase ꞌdeerka eti amurre tuumman ꞌdiiꞌdo soobaha, Yeessohi Kamure la usu yeedi afiis kasoobaho ka yagiise, toro la ababnaanki maanti us soonokhti us ababo ka bar tira.

Rooma 4:13

Wihi inno garanni, Waakh goorat Aburaaham ichoow nyaakhut nyaakhut Aburaaham ayyinti us igooche a mehe ya, harra tuummane dalhaan. Aburaaham jeenteti us amurre Muusa iraaho ayyinta ma iꞌheline, iꞌdaasenyi jeenteti us Waakh ikakhuufe usu eti fissan liiekkaache, iche Waakh ayyinta igooche.

Mattaayo 10:21

“Etoo walaaliissa ꞌdub goocha, dahanohi nahab gessa ꞌdee layagiis. Ooyo laka weeliis iꞌdaas yeela. Nyaakhut ꞌdooꞌdi dele yeedicho ꞌdiiꞌda, dahanohi ꞌdooꞌdoo addan gessaane ꞌdee layagiis.

1 Beetero 2:7

Atinhi usu rummeysattaan ka daakka weyti atin ikhummanyahe. Iꞌdaasenyi ꞌdooꞌdi irummeysan ka, “Daakki ꞌdooꞌdi minan diso ꞌdiiꞌde, usu tirrinki dagaheete min tiiro yitah.”

Ibiraaniya 12:16

Uus etiinkoo kalday laka sohoꞌddarri kaassohanne, ommos iꞌdi Essaawohi Waakh inkaanyitiwwaaye itaahan. Ulla jeenteti gololi koloo kalday on ka, antohiiski teyyannoon ororiche.

Galaatiya 5:21

kalꞌdarri, meleefu ichoow daawohi biꞌdire ichoow wihi iꞌdaase tuumman. Orey a atin tootooche, toro maanta a atin tootoocha, ꞌdooꞌdi jiroti iꞌdee jiro, dakhi Waakh ma gelo.

Galaatiya 5:18

Iꞌdaasenyi chiꞌ Rubeyti Munyee atin woyto, amurre Muusa ma atin anatti gon.

1 Timooti 4:7

Hawweesseti Yeedi Waakh buusan ichoow ti ꞌdalam ba kaseeh. Isjeyiche ꞌdee jiroti Waakh kahamaado jir.

1 Timooti 6:20

Timooti, wihi Waakh dahantaah soogesse mujjum yaakhi. ꞌDooꞌdi yeedi ꞌdalame inkaanyitoo rucchul laka Waakh ikakhabin ichoow iriirti ilmarhaatteete icho been ka a garanti rummaat essaan nabah iisudin.

2 Timooti 2:16

Hawweesseti ꞌdalame Waakh ikahamaadin buj. A mehe hawweesseti iꞌdee enenyet on Waakh kaseehichaan.

2 Timooti 3:2

Ebba awtiissa on ꞌdoona, chilim ꞌdoona, serey isgeecha, eylaja, enenyet meꞌdeꞌddeela, ꞌdooꞌdi dele ma daago, kalaꞌd mele, Waakh ma inkaanyito.

Tiito 1:6

Wihi Waakh gooche, eti urur Kiriisto woyo, a eti wohoo rucchul laka liikacheekan, a makhaabali makhaabassoo kalday on khabo, nyaakhutiis Kiriisto rummeeste, nyaakhutiis uskeeli buurenye iꞌdaanu layeelo ichoow yeeddaagiwwaayyo liikacheekan.

Tiito 1:10

Iꞌdi tahe ꞌdooꞌdi ittaawenye weynaan iinkaanyitine, worassi indigir laa ka ꞌdooꞌd ekkeesti jira. Kach ka la a ꞌdooꞌdoo Yaꞌhuude Kiriisto rummeesti, ꞌdooꞌd Kiriisto a lakhandiyo essi.

Yuuda 1:15

Ulla ꞌdooꞌd tuumman a hukkuma. ꞌDooꞌdi tuummane Waakh igaranne uskeel leh, wihi Waakh ꞌdiiꞌdo tuumman yeele ichoow yeedichoki tuummane sussuujenye Waakh miinsane icho esseen ka sina igoocha.”