1 Timooti 1:14 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹⁴ Kamureen la haaggiiski buurenye an imunneynan weyti ituste. Toro la Yeesso Kiriisto ka, kakhuufnaanki an Waakh kakhuufo ichoow ꞌdooninti an ꞌdooꞌd ꞌdoono a isiiche.

1 Timooti 1:14 Referans Kwoze

2 Timooti 1:13

Kakhuufnaanki at Kiriisto kakhuufto ichoow ꞌdooninti at ꞌdooꞌdi addan ꞌdoonto ka, wor Yeesso ki rummaate at ikadaagte mujjum jurkhi, a mehe ati ichoow Yeesso Kiriisto ba a wohoo kalday.

1 Koriinto 15:10

Iꞌdaasenyi haaggi Waakhe buure ka eti an ahe a ahe. Haaggiis la ki ilmarhaatteet mee. Iꞌdi tahe an ergaanoti addan tuumman ꞌdirihicheeda hol dowe. Waha la ani menye, iꞌdaasenyi Waakh on haaggiiskaas ka hil ikahaagsate.

1 Beetero 1:3

Waakkhi Aabba Yeesso Kiriistohi Kamureene koolinno. Us uurnugleeliiski buure on ka, jirotoo husube inno khajjeello a inno siiche. Jiti us waha kayeele la, a Yeesso Kiriistohi us omoot kasookahche.

2 Koriinto 13:14

Haag Yeesso Kiriistohi Kamure ichoow ꞌdooninti Waakh ichoow kulanki Rubeyti Munyee ba atin tuumman atin leejiraan.

Rooma 16:20

Waakkhi nebey tuumman leh Seytaan a baabiicha, ulla luhlohiin ilicho ka yabta. Yeesso Kiriistohi Kamureene ba atin imaala.

1 Yoohana 4:10

ꞌDoonine talla, inno mee Waakh ꞌdoonne, iꞌdaasenyi usu inno ꞌdoone toro Weeliis sooerge, soorriyotiis ka, holi Waakhe uskeeleen keeno bahcha.

1 'Dessaloonika 1:3

Kol dakkhan Waakkhi Aabbaheene ortiis ka saggi jeenteti atin Kiriisto ikakhuuftaan u hili haaggan ihaaggissaan ichoow jeenteti atin usu iꞌdoontaan u hol idowtaan ichoow jeenteti atin Yeesso Kiriistohi Kamureene khajjeel ikakhabtaan u igarrahsattaan, a kasooꞌhella.

2 Koriinto 8:9

Iꞌdi tahe haaggi buurenye koo Yeesso Kiriistohi Kamureene a garattaan. Chiꞌ kamurroon tuumman kiis yahe laka, jeentetiin u miskiine yitahye, ꞌdee miskiinkiis ka kamurrowtaan.

Bakkaahit 22:21

Yeessohi Kamure ba ꞌdooꞌdi Waakh tuumman imaala. Aamiin.

1 'Dessaloonika 5:8

Iꞌdaasenyi inno a ꞌdooꞌdi banay goya kijiro gone, isjeyinno giꞌde. Saggi eti iskareete birtiis gessate kacchiis jeychuu, inno laka kakhuufnaanki inno Kiriisto kakhuufno ichoow ꞌdooninti inno khabno gaacchaankeen a yitaaheen. Toro la khajjeeli saggi Waakh inno iribo kuubno, iꞌdi koofiyati eti iskareet matah jeyisso a inno iyitaahe.

Hilassi Ergaano 15:11

Mele! Wihi inno rummeysanni a innohi haaggi buurenye inno imunneynane koo Yeessohi Kamureene ka inno laribe. Icho laka a iꞌdaas on.”

1 Koriinto 3:10

Haaggi Waakhe buurenye liisiiche ka, an a iꞌdi tagaanki minan diso, anna daddaabohi ilaat a dise. Etoo addan la daddaabohaas sarcheeda min kadisa. Iꞌdaasenyi ebba saggi us min idiso a yuubicho giꞌde.

2 Koriinto 4:15

Sinayyoheeyka tuumman a iroonotiinna, ꞌdee haaggi Waakhe buurenye inno imunneynan ballaasta ꞌdooꞌdi buure eleela. Iꞌda ka Waakh a lakoolicha jeenteti ꞌdooꞌdi Waakh kalaꞌd ilaabo ibuuraatuu.

Galaatiya 1:13

Maanti an hugummeti Yaꞌhuud raahe, saggi an ijire a daagteen. An ururi Waakh sina omhiche toro baabiin ꞌdoone.

1 Timooti 2:15

Iꞌdaasenyi Waakh deyyeho delnaan ka a riba, chiꞌiche orey isohatti Waakh kakhuufto iche enenyet ꞌdoonto, jiti munyee kafiddiito toro la isjeyisso.

1 Timooti 4:12

Uus etoo kalday laka jeenteti at inugussahuu kiꞌdarraawin. Iꞌdaasenyi yeedi afaah kasoobaho ka ichoow jiroti at jirto ka ichoow ꞌdooninti at enenyet ꞌdoonto ka ichoow kakhuufnaanki at Kiriisto kakhuufto ka ichoow jiroti el ikhabine at jirto ka, ꞌdooꞌdi Kiriisto rummeeste iyookko iateeh.

1 Timooti 6:11

Iꞌdaasenyi at a eti hili Waakh haaggicho. Maantaka uskeelaas tuumman kafirid. Hol dowe jiroti fissan yowo, jiroti Waakh kahamaado jire, Waakh kakhuufe, ꞌdooꞌdi addan ꞌdoone, garrahso toro samacchaar ateeh.

2 Timooti 2:22

Tabe suujoonki tuummane eti nugul imoono kafirid. Hol dowe, jiroti fissan yowo, Waakh kakhuufe, ꞌdooꞌdi addan ꞌdoone, eti nebey dowo ateehe, ururi ꞌdooꞌdi uuri haaggan ka magahi Kamur waho goya kijir.

Tiito 2:2

Makhaaballeti araarrinyee isjeycha, saggoo atin liinkaanyito ifiddiya, ꞌdooꞌdi samacchaare ateeha idah. Kakhuufnaanki icho Waakh kakhuufaan ichoow ꞌdooninti icho ꞌdooꞌdi addan ꞌdoonaan ichoow garrahsihi rumanka icho khabaan abi.

Mattaayo 20:9

ꞌDooꞌdi hil haaggicho sahaꞌd tomon ichoow koow lakireeste ebba chilimmeti eti orrahti nool hil haaggiche laguto, lagute.