1 Beetero 4:14 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹⁴ Chirri jeenteti at koo Kiriisto itahe lakaabaaro, ati Waakh a kimaale. Iꞌdi tahe Rubeyti weynaan lehe toro Rubeyti Waakhe a kileejirta.

1 Beetero 4:14 Referans Kwoze

1 Beetero 3:14

Iꞌdaasenyi chirri jeenteti wihi fissane atin yeessaan on sina atin loomhicho, a atin liimaale. “Wihi icho karooraan akaroorina, anahina.”

Luuka 6:22

Waakh a atin imaala maanti enenyet jeente Ínam Aadam u atin ꞌdiiꞌdo, atin riho, ommos atin abaaro, magahiin uskeeli nool kawaho.

Yaakoobo 1:12

Waakh eti sinayyohi kharaat ka garrahsati a imaala. A mehe inkoo us kajmeyyohaas ka mujjum tolossate, Waakh kalaꞌddi us ꞌdooꞌdi usu ꞌdoono iayyiche iche siicha, kalaꞌdda la a jiroti jirtuu imassan.

Mattaayo 5:11

“Waakh a atin imaala maanti enenyet jeenteteey u atin abaaro, sina atin omhicho, been ka suujoonki nool atin kacheekti.

1 Beetero 3:16

Toro rubeyti suujoon atin ikacheekan khaba, ꞌdee jirotiinti haaggane jeenteti atin Kiriisto ikakhuuftaan jirtaan ka atin hayhayo hankichokaas ka lakhaanyo a khaatatti.

2 Koriinto 12:10

Chaꞌan indigir Kiriistuu ꞌdaranahe, ommos chirri ꞌdooꞌdoo ileeabaarramo, ommos chirri an sina ꞌhelo, ommos chiꞌ sina liiomhicho ommos walahbaaw miigenye an goya leeamiit ka laka, an a hamaada on. Iꞌdi tahe ꞌdarriteey ka, miig a khaba.

Yoohana 15:21

Waha tuumman la jeenteti atin keey itahiin u, a atin layeela. Iꞌdi tahe icho eti ani isooergate ma gartaan.

Yaakoobo 5:11

Saggi atin igarattaan u, inno ꞌdooꞌdi sinayyo lakawaariche garrahsate ꞌdooꞌdi Waakh imaale iekkaanna. Atin saggi Ayuub igarrahsate ichoow wihi Kamur yomboka iyeele a daagteen. Waakh weyti uur nugulyahe, toro la enenyet a isoonaha.

Hilassi Ergaano 13:45

Chirri ꞌdooꞌdi Yaꞌhuud ururi buure arge ka, inaaf buuhiche, wihi Baawulo essi abaareen.

1 Beetero 2:12

ꞌDooꞌdi Waakh igaran goyaka jiroti haaggan jira, ꞌdee koli icho suujoonkoo atin kacheektaan tuumman, jeenteti icho haaggi atin yeessaan ifiirichaan u, Waakh a koolicheen maanti us yamiit.

Ibiraaniya 11:26

Usu ka la lakhaanyoti us jeente Kiriisto iꞌhelo leedeefta, kamurroonki us ili Miissiri kaꞌhelo ka. Iꞌdi tahe usu kalaꞌddi buurenye berri Waakh guto, iche rerreege.

Galaatiya 1:24

Icho la wihi ani ikayitah ka Waakh koolicheen.

Yoohana 9:34

Waha ka wihi icho laabeen, “At uskeel goya kadelatte, toro la uskeel goya on kaweynaatte. Saggoh toollaka nah walah nah iabissa?” Khar iseyeen.

Yoohana 9:28

Farissaayo et leeabaarrante, wihi iche itidah, “At laka a abattiti etaase, nah la a abatti Muusa!

Yoohana 8:48

ꞌDooꞌdi Yaꞌhuud wihi us Yeesso ilaabe, “Chirri nah, ‘At a yaafohi biꞌdirenye Saamariya toro la ginna kidakhatta,’ kinidah, nah ma eysiinna?”

Mattaayo 5:16

Taba giꞌde atin laka iꞌdaasu, haaggi atin yeessaan weeli enenyet tuumman a argo, ꞌdee enenyet tuumman Aabbahiinki serey jiro a inkaanyito.

2 Beetero 2:2

ꞌDooꞌdi buure la sohoꞌddarriti ꞌdooꞌda yeelo raaha, jiti rummaat igafa.

Hilassi Ergaano 18:6

Iꞌdaasenyi chirri ꞌdooꞌdi Yaꞌhuud Baawulo tirrime icho usu leeabaarrameen ka, ebeeri darfohiis ijillaanjilliche saggi icho ikhufeen tuse. Wihi us iyidah, “Chirri atin baabaateen, atin on awtiin u isooya. Ani walah liiworsati mele. Uus toolla kakhabatti, an yaafohi Yaꞌhuud ieheynane iirda.”

Hilassi Ergaano 5:41

Ergaano Jaldaabti Weene Yaꞌhuud katabte. Weyti hamaadeen a mehe jeenteti icho koo Yeesso iyahiin u sinati lakawaaricho a muꞌdanyahiin.

Hilassi Ergaano 28:22

Iꞌdaasenyi nah ati malaah daagin ꞌdoonna, iꞌdi tahe saggi meel tuumman ka rabitta at kajirto woricho baabul liikaayyeedo a garanna.”

2 Koriinto 4:10

Kol dakkhan sarteenyo ka omoot Yeesso sinna, ꞌdee jiro Yeesso laka sarteenyo ka lasoobabbakkaahicha.

2 Koriinto 4:16

Maantaka chirri sarteenyo tamuut laka, nah yombuu yombo ma inokhanni rubeyoheenyo kol dakkhan a lamiigoocha.

1 Beetero 4:16

Iꞌdaasenyi chiꞌ jeenteti at koo Kiriisto itahuu sina kitaham uuryaawine, jeenteti magah Kiriisto liikaawahuu Waakh kooli.