1 Beetero 4:13 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹³ Iꞌdaasenyi hamaada jeenteti atin Kiriisto sina ileegisantaane ꞌdee weyti ihamaaddaan maanti weynaantiis enenyet liisoobabbakkaahicho.

1 Beetero 4:13 Referans Kwoze

Rooma 8:17

Inno a nyaakhutiissa gone, wihi Waakh nyaakhutiis siicho a muꞌdannahe. Toro wihi Waakh Kiriisto siicho laka a leeꞌhella. A mehe chirri rumanka inno sinati usu lakawaariche leegisanno, weynaanti usu laweynaacho laka a leegisanna gon.

Rooma 5:3

Wahaas kalday menye, sinayyohi inno ꞌhello laka a keeylajna. Iꞌdi tahe wihi inno garanni, sina a inno gargaarta, ꞌdee garrahsanna.

Fiiliffi 3:10

Wihi an ꞌdoono kallaayo, a Kiriistohi an abdi, ichoow miigti usu omoot kasookahisse jiroteey miigoosso, toro la sinati usu lakawaariche usu leegismo toro iꞌdiis u amuut.

2 Koriinto 1:7

Khajjeeli nah atin kakhabno la ma sesseeho. A mehe wihi nah tissibno saggaas atin sinayyo nah ileegisantaan u, khoboonnaanki Waakh uur nah khoboocho a nah leegisantaan.

1 Beetero 5:10

Waakkhi haaggi buure leh, Yeesso Kiriisto ka weynaantiisti armaanjireen a atin iwahe. Inkoo geeddoor sina atin tuhum, usu rubeytiis a atin okkhicha, kakhuufnaanki atin usu kakhuuftaan miigoocha, atin toollicha toro inti wohoo atin ikaasseehin atin gessa.

2 Koriinto 4:10

Kol dakkhan sarteenyo ka omoot Yeesso sinna, ꞌdee jiro Yeesso laka sarteenyo ka lasoobabbakkaahicha.

2 Timooti 2:12

Chiꞌinno garrahsanni, usu walah a leedakhanna. Chiꞌinno usu ꞌdiiꞌdne, ullaka a inno ꞌdiiꞌda.

2 Koriinto 4:17

Iꞌdi tahe sinayyohaar ꞌdabakhe a wihi geeddoor one, wihi icho keenaan la a ababnaanki weyti khummane jirtuu tuumman imassanne sinayyohaas kussan.

Hilassi Ergaano 5:41

Ergaano Jaldaabti Weene Yaꞌhuud katabte. Weyti hamaadeen a mehe jeenteti icho koo Yeesso iyahiin u sinati lakawaaricho a muꞌdanyahiin.

Bakkaahit 1:9

Ani a Yoohanahi iꞌdiin u ani ichoow Kiriisto wohoo kalday nahe. Sina inno loomhicha. Inno a garrahsanna. Inno tuumman la dakhi Waakh a iskaleejirra. Wahaas dakkhan a isleegisanna. ꞌDeerka jeenteti an Yeedi Waakh ichoow runti Yeesso miinsan icheeko, iche kurti bey goya kijirto Baatimos layadeeh liigeeche.

1 Beetero 5:1

Maantaka, wihi an ewweenki urur Kiriisto woyo daaho a waha. Ani laka a ewweenkoo iꞌdiinenye, toro la garti saggi Kiriisto sina liiomhiche a laaba. Ani laka maanti us soonokhti weynaantiis a leegisma.

Kolossaay 1:24

Toolla sinayyohi an iroonotiin u ꞌhelo ka a hamaada, toro sarteey ka wihi sinayyo Kiriisto kaankhan indigirti sartiis u a buuhicha. Sarta la a urur Kiriisto.

Mattaayo 16:27

Iꞌdi tahe Ínam Aadam dowwanoha ka herti Waakh khabaayi anto Aabbahiissa leeyamiite, ꞌdee ebba wihi us yeele ka sina ommos kalaꞌd laguta.

Mattaayo 5:12

Girꞌdaama weyti hamaada giꞌde. Waakh goobiis ka kalaꞌddi buurenye atin gutaa. A mehe ꞌdooꞌdi Waákh íyeyyeedo goorat saggaas on sina liiomhiche.

1 Beetero 1:13

Maantaka maliin hil itannabicha, isjeycha, haaggi Waakhe buurenye maanti Yeesso Kiriisto atin liisoobabbakkaahicho atin lasiicho tuum khajjeel kakhaba.

Hilassi Ergaano 16:25

Geeddi ibeene il ekka seley kagowe ka, Baawulo ichoow Siila Waakh wahteene, geeyohi Waakh laka dowteen. ꞌDooꞌdi addane hidan la a dagansata on.

Mattaayo 25:34

“Karnat ꞌdeerka wihi us ꞌdooꞌdi ankiiski miigeet toollo iyadeeh, ‘Kaaleya, atinhi Aabbaheey atin imaale, goobi Waakhe atin liiabbire, uus harra lasoouume atin muꞌdantahiin gela.

Mattaayo 25:31

“Maanti Ínam Aadam herti Waakh khabaayi miigtiis leesoonokhti, kombortiisti antoote karnatoote koorronta.

Mattaayo 25:23

“Kamuriis wihi us ilaabe, ‘At weyti haaggisse! At rumanka a ilbooyi haaggane toro lakakhuufo! At wihi rucchule dahan lakisoogesse ka laka a lakaakhuufa gone, wihi ittaawenye kiweynaacha. Kaale kamuraah hamaadiis leegisam.’

Mattaayo 25:21

“Kamuriis wihi us ilaabe, ‘At weyti haaggisse! At rumanka a ilbooyi haaggane toro lakakhuufo! At wihi rucchule dahan lakisoogesse ka laka a lakaakhuufa gone, wihi ittaawenye kiweynaacha. Kaale kamuraah hamaadiis leegisam!’

Bakkaahit 1:7

Yeya, Yeesso mirise leeyamiite, weeli enenyet tuumman usu a arga, ꞌdooꞌdi goorat usú ꞌhune laka usu a arga. Jeentetiis u yaafohi harra tuumman a ooyaan. Iꞌdaas la a titaahe giꞌde! Aamiin.

Luuka 17:30

“Maanti Ínam Aadam enenyet liisoobabbakkaahicho laka iꞌda on tateeh.

Marko 8:38

Chirri etoo ꞌdooꞌda weyꞌdane waakkhassi addan wahti uskeel leh goyaka ani ikuuryaawo toro yeedeey kuuryaawo, Ínam Aadam laka maanti us miig Aabbahiis ichoow ti herti Waakhe munyee leesoonokhti, usu a kuuryaawa.”

Rooma 8:18

An wihi an kamalde a waha, sinayyohi toolla harrata ka inno khabno ichoow weynaanti buurenye Waakh ꞌdee inno isoobabbakkaahicho ma isiyeyno.

2 Koriinto 1:5

A mehe geeddi sina Kiriisto jiroteenyo ka weyti buuraatti, geeddaase Kiriisto ka laka khoboonnaanki uureenyo lakhoboocho weyti buuraata.

1 Beetero 2:21

A mehe jeentetane atin liiwahe. Kiriisto laka sina a kawaarte gone, us iyookkoti atin dabatiis raahtaan a atin iyitah.

Yuuda 1:24

Toollaka weynaan tuumman a ti Waakkhi tarraantarran atin kaholin yabuuꞌde, toro la atinhi wohoo rucchul laka atin liikacheekan hamaadi buure khabtaani ortiisti ababto atin keeno.