1 Beetero 4:11 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹¹ Eti siintiis ti Yeedi Waakh lacheeko tahe, yeedaas a cheeko giꞌde. Eti siintiis ti us ꞌdooꞌdi addan gargaaro tahe, miigti Waakh siiche tuumman ka ꞌdooꞌdi addan a gargaaro. Iꞌda ka walah tuumman ka Yeesso Kiriisto ka Waakh a laweynaacha. Us ba jirtuu tuummamba inkaanyit ichoow miig ꞌhela. Aamiin.

1 Beetero 4:11 Referans Kwoze

1 Koriinto 10:31

ꞌDeerka golossatteey ommos wohoo danteey ka ba, ommos walahbaaw at yeesso ka, waha tuumman saggoo Waakh liikoolicho iyeel.

Efeesso 6:10

Ayti ꞌdaꞌddaboot talla. Atin ichoow Kamur a wohoo kalday gone, taba miigtiisti weyti buure ka miigowa.

1 Beetero 4:10

Ebba siimbaaw us ꞌhele ka ꞌdooꞌdi addan a ihilo. Iꞌda ka ebba haaggi Waakhe buurenye fil ittaawe mujjume dakhta.

Hilassi Ergaano 7:38

Maanti ꞌdooꞌdi Issiraayel hidaad ka iskafurte, Muusahaase leejire. Muusahaase Hali Sinnaay ka, Waakh iꞌdi herti Waakh u isoobahe, leeyyeede. Ulla Waakh ichoow aacchinyeteen dahcho kajire. Muusa la Yeedi Waakhe jirtuu tuumman imassan Waakh kaꞌhele inno laka inno isookucche.

Efeesso 4:29

Yeedi ꞌdooꞌdi addan gaameero uus afiin leeimaatane, yeedassi ꞌdooꞌdi gargaar ꞌdoono gargaaro toro la uur miigoocho on kaayyeeda. Iꞌda ka la ꞌdooꞌdi atin daago buuhi Waakhe ꞌhela.

Rooma 3:2

Rumanka Yaꞌhuudhi layahe indigirti buurenye khaba. Kolooraat wori Waakh yaafohi Yaꞌhuude dahan lagesse.

Yaakoobo 1:19

ꞌDooꞌd Kiriistokaaw, taba waha tissiba, atin tuumman dowwa nabah suda, dowwa ayeedina, dowwa ahollowina.

Kolossaay 4:6

Kol dakkhan harrabi haaggane, enenyet nabah isudin ꞌdoono khaba, ꞌdee ebba wihi atin ilaabtaan garda.

1 Koriinto 12:4

Siimohi yeerarenye jira, iꞌdaasenyi Rubeyta Munyee kalday on siimohaas enenyet siissa.

1 Beetero 2:5

Toolla la iꞌdi dagahti jiro khabtuu, Waakh minki ꞌdooꞌdi Waakh waho iche atin kadisa. Waakh la iꞌdane yeela ꞌdee kuhaaniyyohi munyee atin kayeela. Iꞌdi kuhaaniyyoot u la, Yeesso Kiriisto ka, iꞌdi soorriyoti Rubeyti Munyee woyto toro Waakh kahamaaduu Waakh isibihissaan.

Yuuda 1:25

Toro la Yeesso Kiriistohi Kamureene ka, Waakkheenki kaldaye ꞌDoorribeheene koolo ichoow kussi ichoow miig ichoow anto ba wihiissa on a yitaaheen geeddi harra liisoouumin ichoow toolla ichoow jirtuu tuummamba. Aamiin.

Ibiraaniya 5:12

Atin geeddi deere ꞌdooꞌd Kiriisto eheet. Kootte geeddee ka, atine ꞌdooꞌdi addan walah abissaan. Iꞌdaasenyi, atin laka toolla wihi Yeedi Waakh ka kolooraat lakasooumho, iche eti atin abcho ꞌdoontaan. Wihi Waakh miinsan ka, atin uliba a iꞌdi nyaakhuti gololi miige ohom iubaaꞌdane, haanu kalday on damo.

1 Timooti 6:16

Usu kalday on iumaatane banayhi weyti ababo liikadowwaan goya fiddiya. Et injire arge mele et sooargo la mele. Jirtuu tuumman la inkaanyit ichoow miigti jirtuu imassan a wihiissa. Aamiin.

1 Timooti 1:17

Toollaka Karnati jirtuu tuumman jiro, jirtuu iumaatane, indo ka liiargine, Waakkhi keleye, jirtuu tuumman a liinkaanyito toro la a lasaaꞌdo. Aamiin.

1 Koriinto 3:10

Haaggi Waakhe buurenye liisiiche ka, an a iꞌdi tagaanki minan diso, anna daddaabohi ilaat a dise. Etoo addan la daddaabohaas sarcheeda min kadisa. Iꞌdaasenyi ebba saggi us min idiso a yuubicho giꞌde.

Mattaayo 6:13

Kajmeti uskeel nah kaluguꞌddo nah kajeyiche, iꞌdaasenyi Seytaanki uskeel leh nah karib!’

1 Beetero 5:11

Jirtuu tuumman la miige a tiissa. Aamiin!

Yaakoobo 1:26

Chirri etoo kol us wihi Waakh ꞌdoono mujjum raaho koogyahe toro la harrabiis ijeyin, etaas a isekkeesta, saggi us Waakh iraaho la a wihi ilmarhaatteet on.

Fiiliffi 2:11

toro la icho tuumman saggi Yeesso Kiriisto Kamur iyahe ꞌdow ka a cheekaane, ꞌdee Waakkhi Aabbaheene lasaaꞌda.

Efeesso 5:20

Toro la magah Yeesso Kiriistohi Kamureene ka, kol dakkhan Waakkhi Aabbaheene walah tuumman ka kalaꞌd ilaaba.

1 Koriinto 6:20

A mehe Waakh wihi buurenye gute atin gatte. Maantaka ebba sartiis ka Waakh a inkaanyito.

Rooma 11:36

A mehe Waakh a uumacchoti walah tuummane, usu on ka walah tuumman lasoouume toro la walah tuumman usu liisoouume. Jirtuu tuumman usu a lakoolicho. Aamiin.

Fiiliffi 1:11

Iꞌda ka Yeesso Kiriisto ka gurnaanki fiffissane jirotiin goya buuhicha. Waha la Waakh weynaan ichoow koolo ikeenaan.

2 Koriinto 9:13

Hila saggi atin rumanka Kiriisto iraahtaane tuse. Wori Haaggane atin kakhuufteen ka, wahanyeyyohi Waakh a raahteen. Toro la wihi atin khabtaan icho ichoow ꞌdooꞌdi addan a leegisanteen. Jeenteti waha dakkhan u ꞌdooꞌd Waakh a koolicha.

Rooma 16:27

Yeesso Kiriisto ka, Waakkhi kaldaye khara tuumman leh, jirtuu tuumman a lakoolicho. Aamiin.

Yoohana 13:31

Inkoo Yuuda bahe ka, Yeesso wihi us yidah, “Toolla Ínam Aadam a laweynaache. Ulla saggi Waakh iweenyahe ꞌdooꞌd a tusa.

Rooma 12:3

A mehe haaggi Waakhe buurenye liisiiche ka, an etiimba waansihane siicha. Taba etiimba uus weyti serey isgeen iꞌdoo us khummanyahuu. Iꞌdaasenyi ebba mujjum a isfiiricho geeddi kakhuufnaanki Waakh usu siiche ka.

2 Koriinto 2:17

A mehe nah iꞌdi ꞌdooꞌdi buurenye Yeedi Waakh cheeko ꞌdee chilimme kaꞌhelo mee. Iꞌdaasenyi nahi koo Kiriistee, a ergaanoti Waakh sooergate. Wori khollokkhan mee cheekno.

Efeesso 1:19

toro la miigtiisti wohoo liikeekkaanne innohi usu rummeysanne inno gargaarto, wihiche abattaan. Miigta ichoow ti

1 'Dessaloonika 2:4

Iꞌdaasenyi nah saggi ꞌdooꞌdi Waakh khaatte, hili Wori Haaggan lakorche iche iyeyyeena. Nah hol ma downo weeli enenyet ma kahamaadinno, Waakkhi uurasseen kajo kahamaadinna.

Tiito 2:1

At la tabe wahanyeyyohi icho ichoow wori Waakhe rummaat ba israahaan ꞌdooꞌd abi.

Tiito 2:15

Wahanyeyyoha ꞌdooꞌd abiche uuricho miigooche, toro la antohi tuum lakisiiche ka leejaakh. Uus etoo kalday laka kiꞌdarraawin.

Ibiraaniya 13:7

Bal ꞌdooꞌdi oraate atin woye, Yeedi Waakh atin isoocheeke, kasooꞌhela. Jiroti haaggane icho jireen, wihi iche desse kamalda, toro la atin laka saggichuu Waakh kakhuufa giꞌde.

1 Beetero 2:12

ꞌDooꞌdi Waakh igaran goyaka jiroti haaggan jira, ꞌdee koli icho suujoonkoo atin kacheektaan tuumman, jeenteti icho haaggi atin yeessaan ifiirichaan u, Waakh a koolicheen maanti us yamiit.

1 Beetero 4:16

Iꞌdaasenyi chiꞌ jeenteti at koo Kiriisto itahuu sina kitaham uuryaawine, jeenteti magah Kiriisto liikaawahuu Waakh kooli.