SAN JUAN 13:18 - Nuevo Testamento en Quichua Cañar 1996

¹⁸ Mana tucui cancunamantachu nicuni. Maijanlla ñuca acllashca cashcataca yachanimi. Dios quillcachishcapi nishcaca pactanatacmi can. Chaipica: ‘Ñucahuan micucucllatacmi ñucataca p'iñai callarirca’ ninmi.

Dios Rimashcata Quillcashcami

¹⁸ Mana tucui cancunamantachu nicuni. Maijanlla ñuca acllashca cashcataca yachanimi. Dios quillcachishcapi: “Ñucahuan micucucllatacmi ñucataca piñanga” nishca pactachunmi, chashnaca tucunga.

SAN JUAN 13:18 Referans Kwoze

SAN MATEO 26:23

Chashna tapucpi Jesusca: —Cancunapuramanta ñucahuan cai platollapitac tandata jucuchishpa micucllatacmi, ñucataca japichigrin.

SAN JUAN 17:12

Cai pachapi ñuca paicunahuan cashpaca, can imatapish ruhuaclla cashcata ricuchishpami huacaichircani. Can cushcacunataca tucuitami huacaichircani. Shucllapish mana chingarircachu, ashtahuanpish chingaringapac cashca runallami can quillcachishcapi nishca shina pactachun chingarirca.

MARCOS 14:20

Chashna tapucpi Jesusca: —Chunga ishcaipuramanta ñucahuan cai platollapitac tandata jucuchishpa micucucmi, ñucataca japichinga.

SAN JUAN 13:26

Chashna nicpi Jesusca: —Maijanmanmi tandata jucuchishpa cugrini, chaimi— nirca. Chaita nishcahuanmi p'itilla tandata jucuchishpa, Simón Iscariotepac churi Judasman curca.

SAN JUAN 6:70

Shina nicpi Jesusca: —¿Manachu chunga ishcai yachacuccunata cancunataca acllarcani? Shina cacpipish cancunapuramanta shucca diablohuanmi— nirca.

SAN JUAN 15:19

Cancuna cai pachapaclla causaccuna shina causacpica, cai pachapaclla causaccunaca paicuna c'uyanacuc shinami c'uyanmancuna. Shina cacpipish cancunataca paicunapuramantami ñucaca acllarcani. Ña mana cai pachapaclla causaccuna shina cashcamantami, cancunataca p'iñancuna.

HEBREOS 4:13

Taita Dios tucui ruhuashcacunaca paipac ñaupamantaca mana miticuipacmi. Tucui imapish paipac ñaupapica mana pacashcachu. Paimanmi ñucanchicca tucui imatapish huillana canchic.

SAN JUAN 15:16

Cancunallatacca ñucataca mana acllarcanguichicchu, ashtahuanpish ñucami cancunataca acllarcani. Cancuna rishpaca, alli granota p'ucuc yura shina causaita ricuchichunpish, chai p'ucushcacuna ama chingarichunpish minganimi. Shina ruhuashpa, cancuna ñuca shutipi imata mañacpica, ñuca Taitaca cungallami.

SAN MATEO 10:36

Shina p'iñaccunaca huasi ucullamantatacmi canga.

APOCALIPSIS 2:23

Shinallatac paipac huahuacunatapish huañuchishami. Chashna ruhuacpimi tucui tandanacushca criccunaca paicunapac yuyaitapish, shungutapish ñuca yachac cashcataca yachac chayangacuna. Cancuna imata ruhuacushcata c'atishpami, japina cashcataca cusha.

SAN JUAN 21:17

Ña quimsa cutinhuan Jesús tapushpaca: —Juanpac churi Simón, ¿ñucataca c'uyanguitacchu?— nirca. Ña chaihuanca quimsa cutin tapushcamantami, Pedroca llaquilla tucushpaca: —Apunchic Jesús, canllatacmi tucuita yachangui. Shina cashpaca, canllatac ñuca canta c'uyac cashcataca yachanguimi— nirca. Shina nicpimi Jesusca: —Shinashpaca, ñuca ovejacunata cuidangui.

2 CORINTIOS 4:5

Ñucanchicca mana ñucanchic quiquinllamantatacchu huillacunchic, ashtahuanpish Apunchic Jesús Mandac cashcatami huillacunchic. Ñucanchicca Jesusta c'uyac cashcamantami, cancunata serviccuna canchic.

SAN MATEO 26:21

Chashna mizapi micushpa tiyacushpami Jesusca: —Cancunapuramanta shucmi, ñucataca huañuchiccunaman japichinga. Chaica chashnatacmi canga— nirca.

MARCOS 14:17

Ña tutayacucpimi, Jesusca paipac chunga ishcai yachacuccunandic chai huasiman chayarcacuna.

MARCOS 14:18

Ña mizapi tiyarishpa micucushpami, Jesusca paipac yachacuccunataca: —Cancunapuramanta ñucahuan micucuc shucmi, ñucata huañuchiccunaman japichinga. Chaica chashnatacmi canga— nirca.

SAN LUCAS 22:21

Chashna cacpipish ñucata japichic runaca, ñucallahuantacmi cai mizapi micucun.

SAN JUAN 13:21

Chaita nishca q'uipami, shungupi munai llaquirishpa Jesusca: —Cancunapuramanta shucmi ñucataca japichigricun. Chaica chashnatacmi can— nirca.

SAN JUAN 13:22

Chashna nicpimi, yachacuccunaca Jesús maijanta nicushcatapish mana yachashpa, caishuc chaishuc ñahuipura ricunacurca.

SAN JUAN 15:25

Caica paicunaman mandashcapi quillcashca pactachunmi, chashnaca tucurca. Chaipica: ‘Manapish juchayuc cacpi, ñucataca p'iñarcacuna’ ninmi.

SAN JUAN 18:32

Chashnami, Jesús pai ima shina huañuna cashcata huillashcaca pactarca.

SAN JUAN 19:24

soldadocunaca: “Ama lliquishpa suerteta ruhuashunchic, maijanmanmi urman ricungapac” ninacurcacuna. Soldadocuna chashna ruhuacpica, Dios quillcachishcami pactarca. Chai quillcachishcapica: “Ñuca churanacunataca chaupinacushpa, ucu churanataca suertetami ruhuarca” ninmi.

SAN JUAN 19:36

Caicunaca Dios quillcachishcapi nishca pactachunmi, chashnaca tucurca. Chaipica: “Shuc tullullatapish paitaca mana p'aquingachu” ninmi.

HECHOS 1:2

Apunchic Jesusta Taita Dios manarac jahua pachaman pushacpimi, huillagrichun acllashcacunamanca Diospac Espíritu yuyaita cushpa, imalla ruhuana cashcata yachachirca.

HECHOS 1:16

“Caipi tandanacushca tucui criccuna. Jesusta Judas japichina cashcataca, ñaupamanmi Diospac Espíritu yuyaita cushpa, Davidman quillcachishca. Chaica pactanami carca.