HECHOS 5:32 - Nuevo Testamento en Quichua Cañar 1996

³² Ñucanchicca cai tucui uyashcatapish, ricushcatapish huillaccunami canchic. Shinallatacmi Diospac Espiritupish cai tucuita huillacun. Taita Diosca paita cazuccunamanmi paipac Espiritutaca cushca— nircacuna.

Dios Rimashcata Quillcashcami

³² Ñucanchicca cai tucui uyashcatapish, ricushcatapish huillaccunami canchic. Diospac Espiritupish cai tucuita huillacunmi. Diosca paita cazuccunamanmi paipac Espiritutaca cushca— nirca.

HECHOS 5:32 Referans Kwoze

HECHOS 1:8

Shina cacpipish, Diospac Espíritu cancunapacman shamucpimi, tucui imatapish ruhuai pudinguichic. Chaimantami Jerusalén pueblopipish, tucui Judea llactapipish, Samaria llactapipish, shinallatac mai tiyashca llactacunapipish ñucamanta huillagringuichic— nirca.

1 PEDRO 1:12

Paicuna chashna yachashun nicucpipish, Diosca pai huillachishcaca mana paicunaman cashcata, ashtahuanpish cancunapac allipac cashcatami yachachirca. Chaitatacmi jahua pachamanta shamushca, imatapish ruhuaclla Diospac Espíritu yuyaita cucpi, alli huillaita huillaccunallatac cancunaman huillarca. Cai huillashcacunataca jahua pacha angelcunapish yachanata munancunami.

HECHOS 13:31

Chashna causachicpica, utcapi Galilea llactamanta Jerusalenman paihuan puriccunallamanmi, tauca punzhacunacaman ricurirca. Cunanca chaita ricuccunami, tucui ñucanchic israelcunamanca paimanta huillacun.

HECHOS 5:29

Shina nicpi, Pedroca Jesús acllashca caishuc huillaccunandicmi: —Taita Diostami runacunata yalli ashtahuan cazuna canchic.

HECHOS 15:28

Diospac Espiritumanpish, ñucanchicmanpish alli cacpimi, cancunataca mana ashtahuan p'iñachingapac cai ruhuana cashcallatac nishun ninchic:

HECHOS 2:4

Chashna tiyarishpami, tucui chaipi caccunapac shunguman Diospac Espíritu shamushpa, paicunata rimachicpi, ch'ican ch'ican rimaicunata rimai callarircacuna.

SAN JUAN 7:39

Jesús chashna nishpaca, Diospac Espirituta paita criccuna chasquina cashcatami nisha nirca. Jesusta Taita Dios manarac jahua pachaman pushacpimi, Diospac Espirituca manarac shamushca carca.

2 CORINTIOS 13:1

Caihuanca quimsa cutinmi cancunata ricungapac rigrini. Tucui imatapish ishcai cashpa, quimsa cashpa imata ricushcata huillac tiyacpimi, allichishca canga.

HECHOS 10:44

Pedro chashna huillacucpiracmi, chai huillashcata tucui uyaccunapac shungumanca Diospac Espíritu shamurca.

HECHOS 2:32

Taita Diosca pai cachashca Jesusllatatacmi causachirca. Ñucanchicca chai ricushcata huillaccunami canchic.

ROMANOS 8:16

Diospac Espiritullatacmi ñucanchic espirituhuan shuc shinalla tucushpa, ña Taita Diospac huahua cashcataca ricuchin.