EFESIOS 1:4 - Nuevo Testamento en Quichua Cañar 1996

⁴ Taita Diosca paipac c'uyaimantami manarac cai pachata ruhuashpa, ñucanchictaca Cristohuan shuc shinalla tucushpa jucha illac, paipaclla paipac ñaupapi cachun acllashca.

Dios Rimashcata Quillcashcami

⁴ Diosca paipac cuyaimantami manarac cai pachata ruhuashpa, ñucanchictaca jucha illac paipac ñaupapi paipaclla cachun acllashca.

EFESIOS 1:4 Referans Kwoze

2 TIMOTEO 1:9

Taita Diosmi paipaclla causachun nishpami, ñucanchictaca quishpichishpa c'ayarca. Mana ñucanchic ima allita ruhuashcamantachu quishpichirca, ashtahuanpish Taita Dios c'uyashcallamantami, Jesucristohuan ñucanchic shuc shinalla tucucpi quishpichirca. Cai pacha manarac tiyacpimi, ñucanchictaca Taita Diosca c'uyashpa, chashnaca ruhuasha nishca.

EFESIOS 2:10

Taita Diosmi ñucanchictaca ruhuashca. Chashna ruhuashpaca, Jesucristohuan shuc shinalla tucushcamanta allicunata ruhuachunmi mushucta ruhuashca. Chai allicunata ñucanchic ruhuachunmi, ñaupamanta pacha allichishca.

SAN MATEO 25:34

Ñuca alli maqui ladoman caccunataca: ‘Ñuca Taita alli nishcacuna, ñucahuan pacta mandangapac shamuichic, japinguichic. Cai mandanataca Diosmi cai pachata ruhuashca punzhamanta pacha, cancunaman cungapac allichishpa charicushca.

SANTIAGO 2:5

Ñuca c'uyashca criccuna, caita uyaichic: Taita Diosca cai pachapi imata mana chariccunataca, crishcahuan chayuc tucuchunmi acllarca. Dios maipi mandacucpi paita c'uyaccuna pai cusha nishcata japichunmi, chashnaca acllarca.

1 PEDRO 2:9

Ashtahuanpish cancunaca Dios acllashpa ch'icanyachishcacuna, Jatun Mandacpacta ruhuac curacuna, jucha illaccuna cachun acllashcacuna, shinallatac Dios munashpa paipacllatac ruhuashcacunami canguichic. Amsamanta sumac achic luz shina causaiman llucchic Dios ruhuashca sumaimanacunata huillachunmi, chashnaca ruhuashca.

APOCALIPSIS 13:8

Tucui cai pachapi causaccunami chai animaltaca “allimari cangui” ningacuna. Chaicunaca cai pachata Taita Dios ruhuashca punzhamanta pacha huiñaita causangapac quillcachina libropi mana quillcashcachu can. Chai librotaca huañuchishca cac Pactalla Ovejami*f** charicun.

SAN JUAN 15:16

Cancunallatacca ñucataca mana acllarcanguichicchu, ashtahuanpish ñucami cancunataca acllarcani. Cancuna rishpaca, alli granota p'ucuc yura shina causaita ricuchichunpish, chai p'ucushcacuna ama chingarichunpish minganimi. Shina ruhuashpa, cancuna ñuca shutipi imata mañacpica, ñuca Taitaca cungallami.

1 PEDRO 1:2

Cancunataca Taita Diosmi ña ñaupamanta pacha pai munashca shina paipac huahuacuna cachun acllashca. Taita Diosca paita c'uyashpa causachun, shinallatac Jesucristopac yahuarhuan chuyayachishca cachunmi, cancunata paipac Espiritumanta paipacllatac ruhuashca. Taita Dios mai c'uyashpa, cancunaman sumac causaita yallita cushca cachun ninimi.

1 PEDRO 1:20

Diosca cai pachata manarac ruhuashpami, Cristotaca huañushpa gentecunata quishpichichun nishca. Shina cashpami, cai tucuri punzhacunapi cancunapac allipac quishpichingapac shamurca.

COLOSENSES 3:12

Taita Diosca cancunata c'uyashpami, paipaclla cachun acllarca. Chaimantami mushuc churanata churaric shina, shungumanta llaquishpa, c'uyashpa, mana jatun tucushpa, mana p'iñarishpa, shinallatac c'uyac shunguhuan causana canguichic.

COLOSENSES 1:22

Shina cacpipish cunanca Cristo runa tucushpa, llaquita apashpa huañushcamantami, Taita Diosca cancunata paihuan alli tucuchun chasquirca. Chashnami cancunataca paipac ñaupapi paipaclla cachun, jucha illac cachun, shinallatac chuyayachishca cachunpish chashnaca ruhuarca.

EFESIOS 5:27

Tandanacushca criccunaca paipac ñaupapi chuyalla, ima mana alli ruhuashcacunapish illac, llambuclla sumaimana ricurichunmi, chashnaca ruhuarca.

APOCALIPSIS 17:8

Can ricushca manchana animalca ñaupamanmi tiyarca, cunanca ña mana tiyanchu. Shina cashpapish huiñaita jatun llaquipi chingaringapacllami, ucu pacha jutcumantaca llucshinga. Taita Dios cai pachata ruhuashca punzhamanta pacha, huiñaita causangapac quillcachina libropi mana quillcachishca cai pachapi causac gentecunaca chai utcaman tiyashca, cunanca mana tiyac, cutin shamuna cashca manchana animalta ricushpaca, yallitami manchangacuna.

HECHOS 13:48

Chashna nicta mana israelcuna uyashpaca: “¡Diosmanta alli huillaica sumacmari!” nishpami, munai cushicurcacuna. Huiñai causaita charichun Taita Dios acllashcacunaca, tucuimi crircacuna.

SAN JUAN 17:24

Taitalla, cai pacha manarac tiyacpimi, ñucataca c'uyashpa sumacyachishcangui. Chaimantami can cushcacunaca ñuca sumacyachishca cashcata ricuchunca, ñuca maipimi cani chaillapitac paicunapish cachun munani.

1 TESALONICENSES 4:7

Taita Diosca millaita ruhuashpa causachunca mana acllarcachu, ashtahuanpish paipaclla causachunmi acllarca.

FILIPENSES 2:15

Chashna ruhuashpami, cai pacha mana cric millai gentecunapac chaupipica, Diospac huahuacuna cashcamanta mana pi juchanchishca, allita ruhuac, achicyachic lucerocuna shina canguichic.

2 TIMOTEO 2:19

Shina cacpipish Taita Diosca huasita ruhuangapac callaripi churashca rumi shinatami, paipac rimashcataca churashca. Chai rimashcaca: “Taita Dios pai acllashcacunataca ricsinmi. Shinallatac Diosta criccunaca tucui millaimanta anchurinami can” nishcami.

HECHOS 18:10

Ñucaca canhuanmi cani. Chaimanta pi cantaca imata mana ruhuangachu. Cai pueblopica achcacunami ñucataca crincuna” nirca.

2 TIMOTEO 2:10

Chaimantami Taita Dios tucui acllashcacuna Jesucristohuan shuc shinalla tucushpa, sumaimana huiñai causaita paicunapish japichun nishpa cai llaquicunataca apacuni.

EFESIOS 4:2

Ama pihuanpish jatun tucushpa, ama p'iñarishpa, c'uyac shunguhuan caishuc chaishuchuan apanacushpa c'uyanacuichic.

1 CORINTIOS 1:8

Apunchic Jesucristo cutimui punzhapi ama pi juchanchichunmi, chai punzhacaman Taita Diosca sinchi cricta ruhuashpa charicun.

SAN MATEO 24:31

Chashna shamushpaca, ñuca angelcunatami cachasha. Trompetapi sinchita tocacpi, paicunami ñuca acllashcacunata cai pachapi tiyac mai llactacunamantapish tandachingacuna.

EFESIOS 5:2

Jesucristo ñucanchicta c'uyac shinallatac, cancunapish c'uyanacushpa causaichic. Paica c'uyashcamantami, Diosman cushpa rupachishca mishquiman ashnacuc shina cangapac, pai quiquinllatac japi tucushpa, ñucanchicmanta huañurca.

SAN JUAN 10:16

Shinallatac mana cai corralpi cac ovejacunatapish charinimi. Paicunatapish pushamunami cani. Paicunaca ñuca ima nishcataca uyangacunami. Chashna uyashpa tandarishpaca, shuc shinallami tucunga, shinallatac shuc michicllami tiyanga.

1 TESALONICENSES 3:12

Ñucanchic cancunata c'uyac shinallatac, cancunamanpish caishuc-huan chaishuc-huan, shinallatac shuctaccunahuanpish c'uyanacuna yuyaita Apunchic Jesús ashtahuan cuchunmi munanchic.

EFESIOS 3:17

Crishcallamanta cancunapac shungupi Cristo causachun, shinallatac cancuna imata ruhuashpapish c'uyaillamanta ruhuachun nishpami mañacuni.

GÁLATAS 5:13

C'uyashca criccuna, cancunataca Taita Dios ama huatashca shina causachunmi c'ayarca. Cunanca “ña mana huatashca shinachu canchic” nishpaca, imapish mana alli munaicunataca ama ruhuanguichicchu. Chaipac randica caishuc chaishuchuan c'uyanacushpa, ayudanacushpa causaichic.

ROMANOS 8:33

Taita Dios acllashcacunataca, ¿pitac juchanchingayari? Taita Diosmi paihuan alli tucuchun paicunataca chasquin.

SAN MATEO 24:24

Chai punzhacunapica ‘ñucami Cristo cani’ nishpa huillaccunapish, ‘Diosmantami huillacunchic’ niccunapish tiyangami. Chaicunaca pi mana ruhuaipaccunatapish, pi mana ricushcacunatapish ruhuashpa ricuchingami. Chashna ruhuashpaca, Taita Dios acllashcacunatapish ima shinapish pandachinatami yuyangacuna.

SAN MATEO 24:22

Chai llaqui punzhacunata Taita Dios mana ashata chaupicpica, pipish mana causai pudinmanchu. Ashtahuanpish Taita Diosca pai acllashcacunata c'uyashcamantami, chai llaqui punzhacunataca chaupinga.

1 JUAN 4:16

Chashnami Taita Dios ñucanchicta c'uyac cashcata yachashpa crinchic. Taita Diosca c'uyacmi. Maijanpish Diospac c'uyaita charicca Dioshuanmi causan, shinallatac Taita Diospish paihuanmi causan.

2 PEDRO 3:14

Chaimanta c'uyashca criccuna, caicunata shuyacushcamantaca, Taita Dios taripacpi alli ricuringapacca pi mana juchanchishca, ima millaimanta anchurishca, sumacta causacuichic.

COLOSENSES 2:2

Paicuna tucui shunguhuan crishpa, c'uyanacushpa, sinchiyashpa c'atichunmi, chashnaca ruhuacuni. Chashna ruhuacpimi, Dios pacashca ima shina cashcataca tucui allita yachanga. Chaica Cristomi.

GÁLATAS 5:22

Ashtahuanpish Diospac Espíritu yuyaita cushca causaccunaca c'uyaccunami, cushi causaccunami, sumacta causaccunami, mana utca p'iñariccunami, llaquiccunami, cuccunami, imatapish pactachiccunami,

GÁLATAS 5:6

Shina cashcamanta Jesucristohuan shuc shinalla cashpaca, circuncisionta ruhuashca cashpa, mana ruhuashca cashpapish mana ima canchu, ashtahuanpish Cristota criccuna cashcamanta c'uyanacushpa causanami ashtahuan alli.

HECHOS 15:18

Ñaupamanta pacha tucui ima tucuna cashcata huillac Mandac Diosmi, chashnaca nicuni’ ninmi.