1 TIMOTEO 6:4 - Nuevo Testamento en Quichua Cañar 1996

⁴ imatapish mana yachac jatun tucushcallami. Paica ima rimashcapish “caica cashnami nisha nin” nishpa, shuccunahuan rimanacushpa p'iñanacunallatami munan. Chashna cacpimi shuccuna ama charichun nishpa munanacuipish, macanacuipish, rimanacuipish, shinallatac imatapish mana crinacuipish tiyan.

Dios Rimashcata Quillcashcami

⁴ imatapish mana yachac, jatun tucushca, caica cashnami nicun nishpa, shuccunahuan piñanacunallatami munan. Chashna cashpami shuccuna shina casha nin, macanacun, rimanacun, shuccuna mana alli cashcata yuyan.

1 TIMOTEO 6:4 Referans Kwoze

2 TIMOTEO 2:23

Imapish yanga parlocunataca ama uyanguichu. Chaicuna p'iñanacuipi churac cashcataca canllatac yachanguimi.

2 TIMOTEO 3:4

Taita Diosta cazunapac randica, imapish quiquin shungupi munashcata ruhuashpa cushicushpami, jatun tucushpa, ima millaitapish ruhuashpa llaquichina yuyailla cangacuna.

1 TIMOTEO 3:6

Chashna cashcamantaca chai pushacca unai cricmi cana can. Pacta jatun tucushpa diablo urmashca shina llaquichishca cangapac urmanman.

SAN JUDAS 1:10

Shina cacpipish chai llullashpa yachachiccunaca manapish chashna cacta yachashpa, mana allita rimancunallami. Imata yachashpapish, animalcuna shina yuyai illac cashcamantami, paicunallatac llaqui tucungapac millaita ruhuancuna.

2 PEDRO 2:12

Chai pandata yachachiccunaca animalcuna shinami. Chashna cashpami, imatapish mana entendishpa, ima shinapish causashpa, japishpa huañuchina animalcuna shina causancuna. Paicunaca manapish entendishpami, mana allichu nishpa rimancuna. Chashna mana allita ruhuashcamantami, animalcuna shina huañungacuna.

2 TIMOTEO 2:14

Tandanacushca criccunapurapi “caica chashnami, chaica chashnami” ninacushpa ama p'iñanacui tiyachunca, Diospac ñaupapi cunashpa caicunata yachachingui. Chashna rimanacuicunaca imapacpish mana allichu, ashtahuanpish uyaccunata pandachinmi.

SAN JUDAS 1:16

Chai shina caccunaca huashalla parlarishpa rimaccunami, ima charishcacunahuanpish mana cushilla caccunami, shinallatac quiquinman imapish alli cachunllami munancuna. Paicuna jatun tucushpami, imatapish japingaraiculla pitapish “canca allimi cangui” nic tucuncuna.

2 PEDRO 2:18

Paicunaca yanga mapa rimaicunallatac sinchita rimashpami, “allimi canchic” nincuna. Chashnami quiquin munashca mapacunata ruhuashpa, mana alli causaccunapuramanta cunanlla anchurishcacunatapish cutin pandachincuna.

1 TIMOTEO 1:7

Paicunaca imata nicushcatapish, “caica cashnami” nishpa yachachicushcatapish mana entendinchu. Shina cashca jahuami, paicunaca Taita Dios mandashcacunata yachachic canata munancuna.

1 TIMOTEO 1:4

yachacushpallapish ama c'atichun nishpa jarcangui. Chai yachanacunaca yanga parlocuna, shinallatac mana yupaipac ñaupa taitacunapac shuticunallami. Tucui chaicunaca p'iñanacuillapi churashpami, maijanpish Jesusta cricpi, Taita Dios quishpichisha nicushca crinataca jarcan.

SANTIAGO 1:19

Ñuca c'uyashca criccuna, imapish uyanallataca alli uyaichic. Shinallatac rimaringapacpish, p'iñaringapacpish jarcariccuna caichic. Chaitaca alli yuyarichic.

TITO 3:9

Shina cacpipish imapish yanga parlocunamanta, mana yupaipac ñaupa taitacunapac shuticunamanta, Moisés mandashcacunata pactachinami nishpa p'iñanacunamanta, shinallatac ima shuctac p'iñanacunamantapish huacaichiringui. Chaicunaca imapish mana alli cashpami yangalla can.

HECHOS 15:2

Chashna yachachicucpimi, Pabloca Bernabendic chai yachachic runacunahuan sinchita rimanacurcacuna. Ña mana allichipac cacpimi, Antioquía criccunaca Pablota, Bernabeta maijan shuc criccunandic Jerusalenman rishpa, Jesús acllashca huillaccunahuanpish, criccunata pushaccunahuanpish parlanacushpa, allichichun cacharcacuna.

APOCALIPSIS 3:17

Shina cashpapish cancunaca ‘chayuccunami canchic, imapish mana illanchu, tucuipimi alli ricurinchic’ nishpami niricunguichic. Cancunaca imatapish mana charic, lluchulla, ñahui mana ricuc, misa, pipish mana c'uyashca cashcataca mana yachanguichicchu.

2 TESALONICENSES 2:4

Chai millaita ruhuac runami Taita Diostapish, chashnallatac imatapish Diosta shina alli ninacunatapish p'iñanga. Chaipac jahuapica chai runallatacmi Diosman mañana huasipipish “ñucami Dios cani” nishpa tiyaringa.

COLOSENSES 2:18

“Diosta alli cazuccunami canchic” nishpa nic tucuccuna, “angelcunata alli niccunami canchic” niccuna, shinallatac “muscuipi imatapish ricuccunami canchic” niccuna pandachichunca, ama saquinguichicchu. Paicunaca imamantapish “allimi canchic” mana nirina cashpapish, paicunapac yuyaillamantami “allimi canchic” nirincuna.

FILIPENSES 2:14

Ama huashalla rimanacushpa, ama p'iñanacushpa imatapish ruhuaichicchu.

FILIPENSES 2:3

Shuccunata llaquichingaraiculla ama yachac tucuichicchu, ashtahuanpish quiquinca mana yachac cashca shinalla, shuccunata ashtahuan allipi churaichic.

FILIPENSES 1:15

Maijancunaca ñuca shina huillac casha nishpa, p'iñanacungaraicullami Cristomantaca huillancuna. Chashna cacpipish maijancunaca alli shungumantami huillancuna. Chaica chashnatacmi.

GÁLATAS 6:3

Maijan manapish ima cashpa, “allimi cani” nicca, paillatacmi llullarishpa pandaricun.

GÁLATAS 5:26

Ñucanchicpurapica mana jatun tucushpa, shuccunahuan mana p'iñanacushpa, shinallatac shuccuna ama charichun nishpaca, ama munashunchic.

GÁLATAS 5:15

Cancunaca sacha animalcuna shina caninacushpa, caishuc chaishuc llaquichinacushpaca chingaringuichicmi.

2 CORINTIOS 11:20

Shinallatac servichiccunatapish, shuhuashpa quichuccunatapish, umaccunatapish, mana ricunachiccunatapish, p'iñashpa ñahuipi huactaccunatapish, cancunaca imata mana nishpa chasquinguichicllami.

1 CORINTIOS 11:18

Cancuna Taita Diosta cushichingapac tandanacushpapish, ch'icanyarinacui tiyashcatami puntaca uyani. Chai shina nishcacunaca, maijan cutinca chashnatacmi canga yuyanimi.

1 CORINTIOS 11:16

Tucui caicunamanta maijanpish mana uyasha nishpa rimasha nicca, caita entendichun: Ñucanchicpish, Diospaclla cac tandanacushca criccunapish, chashna shuctac layaman causana tiyashcataca mana yachanchicchu.

1 CORINTIOS 3:18

Maijanpish “ñucaca allimi cani” nishpaca, ama pandaringuichicchu. Cancunapuramanta maijanpish cai pacha gentecuna yuyashca shina “mai yachacmi cani” nishpa yuyacushpaca, imata mana yachac shinami tucuna canguichic. Chai shina tucushpami, mai yachaccunatac tucunguichic.

1 CORINTIOS 3:3

Cancunaca cai pacha jucha munashca shina causacushcamantami, shuccuna ama charichun nishpa munanacunguichic, shinallatac p'iñanacunguichic. Chashna ruhuashpaca, chairac cai pacha jucha munashca shina causacushcamantami ruhuacunguichic.

ROMANOS 14:1

Manarac sinchi criccunataca mana caita chaita nishpami, alli chasquina canguichic.

ROMANOS 13:13

Shina cashcamanta punzhapi puricuc shina, allita ruhuashpa causashunchic. Jatun micuitapish, ubianatapish ama ruhuashunchic, ama huacllirishunchic, ama p'iñanacuipi churashunchic, shuccuna ama charichun nishpa ama munashunchic, shinallatac ima mana allicunatapish ama ruhuashunchic.

ROMANOS 12:16

Caishuc chaishuchuan alli apanacushpa causaichic. Ima cashpapish ama jatun tucuichicchu, ashtahuanpish chai mana jatun tucuccunahuan tandanacuichic. Cancunapac quiquin yuyaillapi ama “yachacmi cani” nichicchu.

ROMANOS 2:8

Shina cacpica, maijanpish quiquin munashcata ruhuashpa, cashcata nic huillashcata mana cazushpa, mana allita ruhuaccunataca paipac p'iñaihuan Taita Diosca llaquichingami.

HECHOS 18:15

Mana chashnachu cashca. Cai runa yachachishcacunaca, cancunata mandashcacunapi nishca shina mana alli cacpica, cancunallatac allichichic. Ñucaca mana imata nishachu— nirca.

HECHOS 8:9

Chai Samaria pueblopica, shuc brujo Simón runami causarca. Paica chai llactapi causaccunataca, pai imalla ruhuashcacunahuanca “allimi cani” nishpami, crichishpa causac carca.