Efesios 2:16 - Tayta Diospa Wilakuynin

¹⁶ Cruzcho wanurmi Tayta Dioswan amistasimashkansi mana chikinakur alina kawanansipaq.

Efesios 2:16 Referans Kwoze

Romanos 5:10

Tayta Diospa contran kaykash Surin wanuyninpa perdonaykämashpansiqa ¿manasuraq kawarimuyninpa salvamäshun?

Colosenses 2:14

Saynölami leyninkunata mana cumplir Tayta Diospa jaqan kar castigash kanansipaq karqansi. Kananmi isanqa Jesucristo cruzcho wanuyninpa Tayta Diospa jaqan kansinasu, sinöqa lapan jusansipita perdonashnami kaykansi.

Efesios 2:15

Sayno shuntamashkansi Israel runakunapa leyninkunata, mandamientukunata y reglamentukunata anularmi. Jesucristucho mushuq runa kanansipaqmi Israel runakunatapis y mana Israel runakunatapis shuntamashkansi.

Gálatas 2:20

Noqaqa Jesucristuwan cruzcho wanushnömi kaykä. Manami noqanasu kawä, saypa trukanqa Jesucristumi noqacho kawan. Saymi Tayta Diospa Surinman yärakur kawaykä. Paymi kuyamashpansi noqansi rayku wanurqan.

Romanos 8:3

Jusalikuypa munaynincho kaptinsimi Tayta Diospa leyninkuna salvamarqansisu. Sayno kaptinmi Surin Jesucristuta Tayta Dios kachamurqan noqansino runa kananpaq. Paymi sacrificiupaq apayashqan uywano noqansi rayku wanurqan. Saynöpami Tayta Dios salvamashkansi jusalikuypa munaynincho kashqansipita.

Romanos 8:7

Jusalikuypa munaynincho kawaqkunaqa Tayta Diospa contran karmi leyninkuna nishqanno kawayta munayansu ni kamäpakuyanpissu.

Romanos 6:6

Shumaq tantiyakushun. Unay kawayninsiqa Jesucristuwan cruzcho wanushnami kaykan. Saymi kananqa jusalikuypa munayninchönasu kaykansi.

1 Corintios 10:17

Santa Cënacho juk tantalata askaq mikuykarpis juk cuerpulami kaykansi.

Efesios 3:6

Say wilakuy kaynömi nikan: Tayta Diospa ali wilakuyninta chaskikurmi mana Israel runakunapis salvacionta tariyanqa. Saymi Israel runakunata Tayta Dios promitishqankunata paykunapis chaskiyanqa. Saynöpami lapansipis say ayllunölana kaykansi.

Efesios 4:4

Jesucristuman yärakuq kaqqa lapansimi juk cuerpula kaykansi. Juklaylami Espíritu Santupis. Juk salvacionlata chaskinansipaqmi Tayta Dios qayamashkansi.

Colosenses 3:15

Jesucristupita ali kawayta chaskikush kaykarqa pïmaywanpis ali kawayay. Juk shonqula kawayänaykipaqmi Tayta Dios qayayäshushkanki. Saynöpis Tayta Diosta imaypis päkilä niyay.