Daniel 3:2 - Tayta Diospa Wilakuynin

² Saypitanami qayasirqan nacionta mandäsiqninkunata, prefectukunata, gobernadorkunata, yäsikuqkunata, tesorërukunata, juezkunata, marka autoridäkunata y provinciakunacho kaykaq wakin autoridäkunatapis. Paykunata qayasirqan monumentuta ichisishqanpita kushikur fiestata rurayänanpaqmi.

Daniel 3:2 Referans Kwoze

Daniel 3:27

Yarqayämuptinmi paykuna kaqman nación mandäsiqninkuna, prefectukuna, gobernadorkuna y yäsikuqkuna rikaq shuntakäyarqan. Saychömi rikayarqan say maqtakunata ichiklatapis nina mana rupashqanta. Ni aqsalanpis ni mödanankunalapis mana rupash kaptinmi ni rupa rupalapis asyäyarqansu.

Proverbios 29:12

Lulakuqkunata chaskipaq autoridäqa lapan yanapaqninkunatapis yaqa kaytami yachasin.

1 Reyes 12:32

Saynöpis Jeroboam mandarqan Judácho Ramäda fiestata rurayashqanno Israel runakuna Bet-elchöpis cada wata fiestata rurayänanpaqmi. Say fiestata qalaykuyaq puwaq killacho chunka pisqa junaq kaykaptinmi. Bet-elcho fiesta kaptinmi kikin Jeroboam sacrificiukunata rupasirqan qoripita rurash turïtukunata adorashpan. Saynölami runakunata churarqan markakunacho kaq altarkunacho cüra kayänanpaq.

Jueces 16:23

Saypitanami filisteo runakunapa mandaqninkuna shuntakäyashpan diosnin Dagónpaq sacrificiukunata rupasiyarqan. Saycho kushikurmi say mandaqkuna niyarqan: <<¡Contransi Sansóntami diosninsi Dagón munayninsiman churamush!>>

Números 25:2

Saynöpis say warmikunami Israel runakunata pushayarqan sacrificiukunata rurar diosninkunata adorayänanpaq. Sayno pushayaptinmi Israel runakunapis moabita runakunapa diosninkunata adorayarqan. Nirkurmi diosninkunapaq churayashqan mikuytapis mikuyarqan.

Apocalípsis 17:2

Say warmiwanqa mana penqakuypami mandaq reykuna kakuyash. Mana ali costumbrinkunaqa shinkäsikuq vïnunömi kaykan. Say vïnuta upurmi kay pasacho runakuna shinkäyarqan>>.

Daniel 3:3

Sayno qayasiptinmi nacionta mandäsiqninkuna, prefectukuna, gobernadorkuna, yäsikuqkuna, tesorërukuna, juezkuna, marka autoridäkuna y provinciakunacho kaykaq wakin autoridäkunapis monumentu ichisishqan kaqman lapan shuntakäyarqan.