4 Saykunata qelqaykämü kushish kawanansipaqmi.
Saykunata nikä noqa kushish kawashqäno qamkunapis kushish kawayänaykipaqmi.
Noqapa jutïcho manami Taytäta imatapis manakuyashkankiraqsu. Kananpitaqa jutïcho manakuyay. Manakur chaskiyankimi. Saynöpami seqaypa kushikuyanki.
Yäsinäpaq maspis kaykanraqmi. Isanqa cartalacho manami qelqamushaqsu. Kikï shamurnami mastaqa yäsishayki. Saychömi shumaq kushikushun.
Qamkunata mandar jaqayäsiyänäpa trukanqa qamkunawan juntu Tayta Diosta sirviytami munayä. Saynöpami Tayta Diosman yärakur qamkunapis kushish kawayanki.
Saymi Tayta Diosta manakü kuyakuyninta tantiyasiyäshunaykipaq. Saynöpami Tayta Dios qamkunacho kar pay munashqanno kawayänaykipaq imaypis yanapäyäshunki.
Majasakänanpaq kaq maqtalami parlakushqan jipashyuqqa. Majasakaq maqta parlashqanta wiyar amïgun kushikushqannölami noqapis kushikü.
Tayta Diosnï yanapämaptinmi kushikuypita shonqüpis asikyarkun. Paymi salvación mödanata jatipämash. Kuyaylapaq mödanänömi ali ruraykunapis kaykan. Casarananpaq shumaq trukakush maqtanömi kaykä. Casaraq jipash kuyaylapaq mödanan jatish kaykaqnömi kaykä.
Kuyay wamräkuna, kay cartata cartakaykämü mana jusalikuyänaykipaqmi. Jusalikush imashqaqa Tayta Diospa nawpancho favorninsi sharkunanpaq abogädunsi kaykanmi. Say abogädunsiqa alilata ruraq Jesucristumi.
