Ajilanic 23:13 - Quiché Bible

¹³ Xucoj c'u u chuk'ab ri Balac: “Tasaj wuc' pa jun c'olbal chic, kas jawije' xak xuwi catcuinic cawil wi ri u chi' ri u setelibal ri tinimit, man cawil ta c'u ri tinimit tz'akat chebac'okoj apan kas chila' quincha' chawe.”

Ajilanic 23:13 Referans Kwoze

Salmib 109:17

Are c'u xkaj ri c'okonic chuwäch, ¡chc'okox ba'! Man xraj ta ri tewichibal, ¡mawi ba' jubik' chtewichixok!

Ri Miquey 6:5

Nu tinimit, chnataj chawe camic ri e u chomanic tak ri Balac, ajawinel re Moab, xukuje' ri xutzelej u bixic ri Balaam che ri u c'ojol ri Beor. Chnataj chawe aretak xatoc'ow pa Sitim xatopan pa Jilgal, chebaya' qui k'ij ri e u ch'äcanic ri Ajawaxel.”

Nabe Ajawinelab 20:28

Xopan c'ut jun k'axal tzij ruc' ri ajawinel re Israel, xubij c'u che: “Jewa' cubij ri Ajawaxel: ‘Rumal rech chi qui bim ri aj siriyab chi ri in in jun dios quech ri c'ache'laj, chi ri in man in jun dios taj c'ut quech ri beya', quebenjach we q'uialaj winak ri' pa a k'ab. Jeri' cawetamaj na chi in ri' ri Ajawaxel.’ ”

Nabe Ajawinelab 20:23

Ri e qui nimakil tak ri e rajch'ojab ri ajawinel re Siriy xquibij wa' che: “Ri e qui diosib ri aj israelib e diosib quech tak ri c'ache'laj; rumal ri' uj qui ch'äcom. We ta c'u cujch'ojin cuc' pa ri lianic, chila' kas quekach'äc wi na.

Ri Josue 24:9

Are' chi c'u ri Balac, ri u c'ojol ri Zipor, ajawinel pa Moab, xpe che u banic ch'o'j iwuc'. Ri Balac xutak ri Balaam, u c'ojol ri Beor, rech qui xuc'okoj.

Ajilanic 22:41

Ak'ab chucab k'ij, ri Balac xutzucuj ri Balaam xuban c'u che chi capaki' puwi' ri Bamot-baal, kas chila' c'ut xcuin wi che rilic ri u setelibal ri qui kajebal ri aj israelib.

Ajilanic 23:12

Ri Balaam xutzelej u bixic: “Uj canajinak chi ri in xuwi quinbij na ri cuya' ri Ajawaxel chi nu chi'.”

Ajilanic 23:14

Ri Balac xuc'am bic ri Balaam pa ri ulew re Zopim, puwi' ri juyub Pisga, jawije' ri xuwoc wi wukub porobal xebupil c'u paquiwi' chquijujunal jun c'ojol ama' wacax xukuje' jun ama' chij.

Ajilanic 22:6

Tasaj ba' chanim chel a c'okoj we tinimit ri' che nu to'ic, sibalaj c'u c'o na u chuk'ab chkawäch uj. Craj ne ruc' wa' quincuin in che qui ch'äquic quebenwesaj ta c'u bic chupam ri ulew. In weta'm chi ri e a tewichi'nic xukuje' ri e a c'okonic amak'el je quebelic.”