1 Corintios 6:11 - Quiché Bible

¹¹ E c'o c'u jujun chiwe e je tak wa' nabe canok. Camic c'ut ix ch'ajtajinak chic, banom chi tastalic tak winak chiwe, ix k'alajisam chic chi ix suc' chuwäch ri Dios pa ri u bi' ri Ajawaxel Jesucrist, rumal ri Uxlabal re ri ka Dios.

RI KꞌAKꞌ TESTAMENTO PA TZIJOBꞌAL KꞌICHEꞌ

¹¹ Je kꞌu waꞌ kenoꞌjin jujun chiꞌwe ojer. Kamik kꞌut xixchꞌajtajik, xixtyoxirisatajik, pa ri ubꞌiꞌ ri Ajawxel Jesucristo xuqujeꞌ rumal ri Ruxlabꞌixel ri Dios.

K'iche'

¹¹ Jujun chiwe je' i banic wa' nabe, cämic c'ut ch'ajch'oj chi ri iwanima', i jachom chi iwib pu k'ab ri Dios, banom chi jicom che ri iwanima' cho ri Dios rumal ri Kajaw Jesús, xukuje' rumal ri Espíritu rech ri ka Dios.

K'iche' (New Orthography)

¹¹ Jujun chiwe je' i b'anik wa' nab'e, kämik k'ut ch'ajch'oj chi ri iwanima', i jachom chi iwib' pu q'ab' ri Dios, b'anom chi jikom che ri iwanima' cho ri Dios rumal ri Qajaw Jesús, xuquje' rumal ri Espíritu rech ri qa Dios.

1 Corintios 6:11 Referans Kwoze

1 Corintios 1:30

Rumal c'ut ri are' ix nuc'utal ruc' ri Crist Jesus, ri rumal ri Dios uxinak no'j chke, xukuje' suq'uilal, tastaliquil xukuje' colobal ib.

1 Corintios 1:2

quintz'ibaj we wuj ri' chque ri kachalal ri comon cojonelab aj Dios ri e c'o pa Corint, ri e tastal pa ri Crist Jesus, e siq'uim rech quebux tastalicalaj tak winak, xukuje' chque conojel ri cäquita' ri u to'banic ri Kajaw Jesucrist pa ronojel c'olbal, Cajaw ri e are' xukuje' Kajaw uj.

Hechos 22:16

Are c'u ri camic, ¿jasche catbeytajic? Chatwalijok, chban ri a bautism, chnataj ri u bi' ri Ajawaxel Jesus quech'ajtaj c'ut ri e a mac.’ ”

Romanos 8:30

Ri winak ri xebucha' ulok ri Dios ojer are wa' xebusiq'uij, xukuje' ri xebusiq'uij, are wa' ri xebuk'alajisaj chi e suc' chuwäch. Ri xebuk'alajisaj chi e suc' chuwäch, are wa' xunimarisaj qui k'ij.

1 Pedro 1:2

ri e cha'tal jas ri xuchomaj ulok ojer ri Dios Tataxel. Ri are' u banom tastalic tak winak chiwe rumal ri Uxlabaxel, rech quixniman che xukuje' quixchiquichax ruc' ri u quiq'uel ri Crist: are ta ri Dios sibalaj cuban tok'ob chiwe xukuje' sibalaj cuya' jamaril chixo'l.

Hebreos 10:22

Jeri' chujkeb chuwäch ri Dios, man ruc' ta quieb kanima', kas ruc' nimalaj ka cojonic, rumal rech chi chiquicham chi quic' pa ri kanima' rech cäkana' pa ri kanima' chi man c'o ta chi ka mac, xukuje' ch'ajtajinak chic ri ka cuerp ruc' ch'ajch'ojalaj ja'.

Efesios 5:26

Jeri' xuban che rech cux jun tastalic comon cojonelab. Je ta ne xuch'aj ruc' ja' aretak xujosk'ij rumal ri tzij,

Efesios 5:8

Ri i c'aslemal ojer c'o pa ri k'eku'm. Are c'u ri camic c'o chic pa ri sakil rumal rech chi ix jun chic ruc' ri Ajawaxel. Chibana' ba' iwech ri caquiban ri e aj sakilal.

Hechos 26:18

rech quebajak ri qui bak'wäch; rech quebel pa ri k'ek'um, quek'ax pa ri sakil; rech quebel chuxe' ri u cuinem ri Satanas, quek'ax ruc' ri Dios; rech cäquic'am jun quechbal cuc' ri banom tastalic tak winak chque rumal cojonic chwe in.’ ”

Romanos 8:33

¿Jachin ta ri cäcuinic cuban tzij chquij ri e cha'om rumal ri Dios? Ri Dios c'ut quek'alajisanic chi e suc' chic chuwäch.

Romanos 5:1

Aretak k'alajisam chic chi uj suc' rumal ri ka cojonic, c'o jamaril chkaxo'l ruc' ri Dios, rumal ri Kajaw Jesucrist.

2 Tesalonicenses 2:13

Kachalal ix lok'ok'em rumal ri Ajawaxel, rajawaxic chi amak'el cujmaltioxin che ri Dios rumal iwech. Rumal rech chi pa ri u tiquiritajic, ri Dios xixucha' rech quixcolotajic rumal ri Uxlabaxel ri cuban tastalic tak winak chiwe, rumal ri i cojonic che ri kastzij.

Apocalipsis 1:5

xukuje' che ri Jesucrist ri jicalaj k'alajisanel, ri xc'astaj nabe chquixo'l ri cäminakib, c'o u takanic paquiwi' ri ajawinelab e aj uwächulew. Ri Crist cujulok'ok'ej uj resam c'ut pa qui k'ab ri e ka mac rumal ri u quiq'uel,

Gálatas 3:11

Quel c'u chi sak chi man c'o ta jun cäk'alajisaxic chi suc' chuwäch ri Dios rumal ri pixab. Tz'ibatal c'ut: “Ri suc'alaj winak cäc'asi' na rumal ri cojonic.”

Apocalipsis 7:14

Xinbij c'u che: “Wajaw, wa' lal lal etamaninak.” Ri are' xubij chwe: “E are wa' ri e elinak ulok pa ri nimalaj c'axc'olil, ri qui ch'ajom ri catz'iak, xquisakarisaj pa ri u quiq'uel ri Alaj Chij.

Gálatas 2:16

Keta'm chi man c'o ta jun winak cäk'alajisaxic chi suc' chuwäch ri Dios rumal ri u nimaxic ri pixab; xane' rumal ri qui cojonic che ri Jesucrist. Ri uj xukuje' xujcojon che ri Crist Jesus, rech cäk'alajisaxic chi uj suc' rumal ri cojonic, man rumal ta ri u nimaxic ri pixab. Man c'o ta c'u jun winak cäk'alajisaxic suc' rumal ri u nimaxic ri pixab.

1 Corintios 12:2

Iweta'm chi aretak c'ä majok chixcojonok i sachom i be, xixc'am bic chquij ri memalaj tak diosib.

Ri Isaiy 53:11

Aretak oc'owinak chic ri nimalaj c'axc'ol cäril na ri chäj, cäquicot c'u na aretak caretamaj, ri suc'alaj u pataninel ri Ajawaxel q'ui quebuk'alajisaj na chi e suc'urisan chic chuwäch ri Dios, cärekaj c'u na ri quetzelal wa'.

Salmib 51:7

Chinjosk'ij la ruc' k'ayes re hisop, quinjosk'itaj c'u na; chinch'aja' la, sak c'u quincanaj na chuwäch ri sakalaj tew.

Salmib 51:2

¡Chinch'ajch'obisaj la chesaj la ri wetzelal! ¡Chinjosk'ij la chesaj la ri nu mac!

Hebreos 2:11

Are ri Jun ri cäbanow tastalic tak winak chque, xukuje' ri e rech ri cäban tastalic tak winak chque, ruc' ri Tataxel e elinak wi conojel. Rumal ri' ri Jesus man cäq'uix ta che u bixic chi e rachalal.

Gálatas 3:24

Jeri' ri pixab xujuchajij, je jas jun winak cuchajij jun ac'al, che ka c'amic bic ruc' ri Crist, rech cäk'alajisaxic chi uj suc' rumal ri cojonic.

Romanos 5:9

E ta c'u lo ri camic, k'alajisam chic chi uj suc' rumal ri u quiq'uel ri Crist, ri rumal are' cujcolotaj na chuwäch ri royowal ri Dios.

Romanos 3:24

Ri Dios cuk'alajisaj chi uj suc' chuwäch rumal ri u tok'ob, e colotajinak c'u rumal ri Crist Jesus, man c'o ta cäquitoj che.

Ri Ezequiel 36:25

Quixinch'aj na ruc' josok'alaj ja', quixinjosk'ij na che ronojel ri i tz'ilol, quixinch'ajch'ojirisaj na chque tak ri e u rikic iwib cuc' tak ri e diosib;

Ri Isaiy 45:25

Wumal in, ronojel ri tinimit Israel cux na ch'äcanel, cunimarisaj c'u na rib chwij in.”

1 Pedro 3:21

Are c'u ri ja' pa ri u k'ijol ri Noe are' cuq'uexwächij ri roc'owem ri Jesus pa ri nimalaj c'ax ri cujcolow camic; rumal c'u ri' man cujcolotaj ta rumal ri u josk'ixic ri ka cuerp, xane' ri u c'amowaxic ri jun ch'ajch'ojalaj anima' che ri Dios rumal ri u c'astajic ri Jesucrist.

1 Pedro 1:22

I josk'im ri iwanima' rumal rech chi xinimaj ri kastzij, rech quebilok'ok'ej ri iwachalal, man xak ta quieb i wäch. Chilok'ok'ela ba' iwib ruc' ronojel iwanima' xukuje' ronojel i chuk'ab.

Gálatas 3:8

Ri Tz'ibatalic cubij c'u ulok chi ri Dios cuk'alajisaj chi e suc' ri man aj judeyib taj rumal ri cojonic. Xutzijoj ulok ri utzalaj tak tzijol che ri Abraham aretak xubij: “Conojel ri nimak tak tinimit quetewichitaj na rumal awech.”

Romanos 4:5

We c'u jun cäcojon che ri Dios, ri cuk'alajisaj chi suc' ri ajmac chuwäch, ri Dios cuc'amowaj jacha' jun suc' rumal ri u cojonic, man rumal ta jun chac ri u banom.

Ri Isaiy 1:16

¡Chich'aja' iwib, chijosk'ij iwib! ¡Chebinajtajisaj ri iwetzelal chnuwäch! ¡Chik'ila iwib che u banic ri man utz taj!

E C'ambal tak Tzij 30:12

E c'o jachin tak cäquichomaj quib chi sibalaj e ch'ajch'oj man qui ch'ajch'ojirisam ta c'u quib che ri qui tz'ilol.

Ri Lucax 18:14

Quinbij chiwe chi ri tok'il alcabal, aretak xel bic xbe cho rachoch, are' k'alajisam chic chi suc' chuwäch ri Dios. Man je ta wa' ri jun chic, ri pariseyib. Conojel c'u ri cäquinimarisaj quib, ri e are' cäkasax na qui k'ij. Apachin c'u ri man cunimarisaj ta rib, are ri' cänimarisax na u k'ij.”

Ri Jeremiy 4:14

Jerusalen, chajosk'ij ri awanima' che ri etzelal we je caban wa' catto'taj na. ¿C'a jampa' lo catanaba' qui chomaxic pa a jolom ri itzel tak chomanic?

Ri Xuan 13:10

Ri Jesus xubij che: “Ri jun ri ch'ajom chic, man rajawaxic ta chic chi cäch'ajic, xane' xuwi ri rakan rajawaxic cäch'ajic, ronojel c'ut ch'ajch'oj chic. Ri ix ix ch'ajch'oj chic, man iwonojel ta c'ut.”

Aj Levitib 8:6

Xuban c'u ri Moises chi ri Aaron e rachil ri e u c'ojol xekebic, xebuch'aj c'u ruc' ja'.

Ri Xuan 13:8

Xubij ri Lu' che: “Mawi jubik' quech'aj la ri wakan.” Xutzelej u bixic ri Jesus: “We man catinch'ajo, man c'o ta awech wuc'.”

Hebreos 10:29

¡E ta c'u lo ri jun ri cäretzelaj u wäch ri u C'ojol ri Dios, man nim ta cäril wi ri quic' ri xbanow tastalic winak che are', are ri quic' re ri u c'ulwächinic ri Dios cuc' ri winak, o cuyok' ri Uxlabaxel ri cäbanow tok'ob chke, sibalaj c'ax na ri c'äjisabal u wäch ri jun ri jewa' cubano!

1 Juan 2:12

Quintz'ibam chiwe ix lok'alaj tak walc'ual, rumal rech chi e cuyum ri e i mac, rumal ri u ya'ic u k'ij ri u bi'.

Aj Levitib 14:48

We c'u aretak coc ri cojol tabal tok'ob che u nic'oxic u pam ri ja, crilo chi man u jabum ta rib ri yabil pa ri ja, aretak c'ac' chi u tz'akic ri u pam, ri cojol tabal tok'ob cuk'alajisaj chi man c'o ta yabil che ri ja, ri yabil xoc'owic.

Ri Matey 20:4

Xubij chque: ‘Xukuje' ri ix, jix pa ri nu tico'n re uva. Quinya' c'u na jas ri takal chiwe.’ Xebe c'u wa'.