Oseas 14:5 - Tayta Diosninchi Isquirbichishan

⁵ Israelcunapäga cashaj tamyariptin shullay quëdashanömi. Paycunanami caycanga liryucuna waytajno. Paycunaga canga Líbano jircacho yöracuna sumaj sapichasha caycajnömi.

Oseas 14:5 Referans Kwoze

Isaías 35:2

Chauraga waytapis aypallami canga. Cushicur cantaypis cangami. Tayta Diosmi camacächej-aywan chaqui jircacuna Libanuno cuyayllapaj cananpaj. Chaynöpis camacächenga Carmelo jircano, Sarón guechwano alli allpa cananpaj. Chayrämi llapan ricangapaj Tayta Dios cuyayllapaj munayniyoj caycajta.

Isaías 27:6

Shamoj watacunachöga Jacobpita miraj Israelcuna tacyangami. Paycunaga guerunömi chillguenga y waytanga. Wayuynenga intëru nasyunpämi aypanga.

Efesios 3:17

Chaynöpami yäracuptiqui Jesucristo gamcunawan caycangapaj. Chaynöpis mañacö gamcunapa cuyacuyniqui jacha sumaj sapichasha cashanno, wasipa simintun sumaj pergasha cashanno cananpaj.

Mateo 6:28

Chauraga ¿imanirtaj röpapaj pasaypa yarpachacunquicuna? Ricay waytacunata. Chaycunaga jircacunacho cuyayllapaj wiñan mana aruycar mana puchcaycashpan.

Salmos 72:16

¡Cay nasyunchöga rïgu amatar wayuchun! ¡Intëru jircacunachöpis juntasha cachun! Libanuchöno rïgucuna wiñachun. Runacunapis aypalla mirachun jirca jachacunanöraj cananpaj.

Job 29:19

Nogaga caycä yacu ñaupancho yöra caycajnömi. Chay yörapa rämanga shullaypashami warämun.

Deuteronomio 32:2

Yachachicuynëga tamyanömi runacunaman chayanga. Willapashäga shullaynömi, jachaman chirapa chayajnömi, tajtacho shullay caycajnömi canga.

Miqueas 5:7

Chaura Jacobpita miraj quëdajcunaga intëru nasyuncunachömi caycangapaj. Shullayta Tayta Dios guewaman cada tuta chayachimushannömi caycanga. Chaycunataga manami runachu chayachimun. Chaypa ruquenga Diosllami chayachimun.

Isaías 44:3

Nogami camacächej-aywä chunyaj jircapa yacu aywananpaj, chaqui jircacunachöpis mayu aywananpaj. Gamcunapita mirajcunamanga nogami Espiritöta cachamushaj. Paycunatami bindisyunta goshaj.

Isaías 26:19

Gamman yäracamoj runacunaga cawarimongami. Allpacho pamparaycajcunami cawarimonga. Nircorga cushicuyllawanmi gaparpangaraj. Llapan guewacunata shullay wiñachir yagarichimushannömi llapan wañushacunatapis cawarachimunquipaj.

Isaías 18:4

Tayta Dios caynömi nimaran: «Shuyashpä syëlupitami ricapäshaj usya captin alli shanashan wichan, cosëcha captin shullay pucutay llanturashan wichanpis.»

Salmos 72:6

¡Payga cachun cay pachaman tamyar guewacunata pargojno!

2 Reyes 19:30

Quëdaj caj Judá runacunaga cangapaj lanta jachanömi. Lanta sapichajnöpis mana llojshiypanami tiyaconga. Früta yörancho wayojnöpis mirangapämi.

2 Samuel 23:4

canga pacha waraptin rama-rama achicyaycajno, tamyariptin guewacunata wiñachinanpaj lliuyaraycaptin tutapa inti ratamojno.›

Lucas 12:27

«Ricay waytacunata. Chaycunaga jircacunacho cuyayllapaj wiñamun mana aruycar mana puchcaycashpanmi. Ichanga noga në: Unay ray Salomonpa röpanpis manami chay waytacunapita mas cuyayllapächu caran.

Cantares 4:5

Ishcan chuchuyquicunaga caycan millish lluychucuna liryu waytacunapa chaupincho micuycajnöraj.

Cantares 2:16

Cuyaynëga nogallapami. Nogapis payllapami cä. Payga uywancunata michin liryu waytacuna caycashallanpami.

Proverbios 19:12

Ray ollgorga liyunno manchacuypämi. Ray cushisha captenga guewaman shullay chayajnömi.

Salmos 80:9

Chacrata sumaj picharcurmi lantashcanqui. Lantanami sapichar intëru nasyunman juntasha.

Salmos 92:12

Alli runacunaga carcaycan cuyayllapaj palma yöra tucturaycajnörämi. Miranpis Libanucho sedru wiñamojnörämi.

Salmos 133:3

Chaynöpis caycan Hermón puntapita Sionman shullay chayajnömi. Chayno alli goyajcunatami Tayta Diosga unaycama cawananpaj bindisyunta gon.

Isaías 45:8

«Chauraga syëlu quichacäcuptin bindisyunta mashtamushaj. Chaycunaga cangapaj shullay shicwamojno, pucutaypita tamyamojnömi. Chaycunata allpachöga cushishami chasquenga. Chaynöpami salbacoj cashäga imapis wayojno achcaman miranga. Chaynönami alli cajllata ruraypis waytajno canga. Chaycunataga noga Tayta Diosmi camacächë.

Salmos 92:13

Chay lantacunanömi Tayta Diospa Wasincho carcaycan allita ruraj runacunaga. Wasin Puncunchöpis carcaycan lantacuna waytajnörämi.

Isaías 12:1

Chay wichanga ninquipaj: «Gamta agradësicömi Tayta Dios. Nogapaj fiyupa rabyashami caycarayqui. Cananga rabyashayquipita allchacashcanquinami. Allinami goyaycächimanqui.

Isaías 57:18

Mana wiyacamashantaga ricashcämi. Chaypis mana wiyacamaj caycajta allchacächishämi. Nircorga allimi jamachishaj. Chaura mana yarpachacuypanami goyangapis. Llaquisha caycajcunatapis nogami cushicachishaj.

Isaías 57:19

Nircorga caynömi willacachishaj: ‹¡Carucho caycajcunapaj alli goyay cachun! ¡Sercacho goyaycajcunapäpis alli goyay cachun!› nir. ¡Acrashä runacunataga nogami allchacächishaj!

Jeremías 3:22

Mana wiyacoj wamräcuna nogaman cuticamuy ari. Nogami allchacächishayqui mana wiyacoj cashayquipita.» Chayno niptin Israelcuna niran: «Nogacunaga cutimushcänami. Ñaupayquichönami caycä tayta. Nogacunapaga gammi Tayta Diosnë canqui.

Jeremías 32:41

Alli goyänanpaj paycunata yanapashpämi cushicushaj. Llapan shongöwan cuyashpämi paycunata cay nasyunman tiyachishaj.

Oseas 6:3

Tayta Diosman cutishun ari. Cutiptinchëga Tayta Diosmi noganchïman shamongapaj. Inti waran-waran yagamushannöpis Payga rasunpami shamonga. Jachacuna chillguinan wichan, waytanan wichan imaypis tamya tamyashanno rasunpami shamonga.

Miqueas 7:18

«Gamnöga manami juc Dios canchu. Gamga perdunanquimi mana allita rurajtapis. Chaynöpis gonganquimi nogacuna wallcalla quëdaj acrashayqui runacuna juchata rurashäta. Imaycamapis manami rabyashallaga cacunquichu. Gamga nogacunata cuyamashayquita musyachimanquimi.