Jeremías 2:30 - Tayta Diosninchi Isquirbichishan

³⁰ Wamrayquicunatapis yangami castigashcä. Castigaptëpis manami wanacushachu. Profëta shamojcunatapis quiquiquicunami fiyu liyuncunanöpis wañuchishcanqui.

Jeremías 2:30 Referans Kwoze

Nehemías 9:26

«Ichanga mana wiyacojmi caran. Contrayqui ricacuran. Layniqui niycashantapis mana cumlir manacajman churaran. Mana allita ruraptin profëtayquicuna piñacushpan willaparan gamman yapay yäracamunanpaj. Chaura paycuna fiyupa rabyachishushpayquimi profëtayquicunata wañuchiran.

1 Tesalonicenses 2:15

Chay Israel nasyun runacunallami Tayta Jesucristutapis chiquir wañuchiran. Tayta Diosninchïpa profëtancunatapis unay Israel runacuna wañuchiran. Chaynömi nogacunatapis gargamasha. Tayta Dios munashanno ruranapaj cajta manami munanchu. Paycunaga pï-maywanpis tincuypami tincuycan.

Hechos 7:52

Unay castanchïcunapis Tayta Diospa profëtancunata chiquir magaran. ‹Tayta Dios acrashan Cristo shamongami› nir willacuptinpis wañuchiran. Tayta Dios acrashan Cristo chayamuptinnaga contran jatarir paytapis wañuchishcanqui.

Jeremías 5:3

Tayta Dios gamga munanqui alli runacunatami. Cay runacunaga castigaptiquipis manami wiyacushachu. Fiyupa mana alliman chayachiptiquipis manami yarpachacushachu. Paycunapaga shongunpis caycan ruminömi. Chaymi arpinticuytapis mana munashachu.

Isaías 1:5

¿Imapänataj mastaga castigasha caytapis munanqui? ¿Jinallarächu mana wiyacoj caycanqui? Cuerpuyquipis manami jäcunnachu maynincho astinäpäpis. Umayquipis intëru rachishallanami. Imata ruranayquipäpis gänasniqui manami cannachu.

Mateo 23:29

«¡Ay imanöraj canqui lay yachachejcunawan fariseucuna! ¡Janan shongullami carcaycanqui! Gamcunaga unay profëtacunapaj jatun mïchucunata ruraycächinqui. Wañoj alli runacunapa mïchuncunatapis adurnaycanqui.

Jeremías 7:28

Paycunata niy: ‹Cay nasyun runacunaga Tayta Diosnin nishanta manami ni imanillarpis wiyacunchu. Piñacuptinpis manami wiyacunchu. Nishancunataga manami cumlinnachu.

Isaías 9:13

Chayno castigaycaptinpis runacunaga manami wanacuranchu. Ni munayniyoj Tayta Diosmanpis manami yäracuranchu.

Apocalipsis 16:9

Rupaptinpis runacunaga jucha rurayta manami cachaycuranchu. Ni Tayta Diosmanpis manami yäracuranchu. Chaypa ruquenga Tayta Diospa contranmi ima-aycatapis rimaran. Chayno rimaran Tayta Dios castigananpaj caycashanta musyaycarmi.

Sofonías 3:2

Gamcunaga manami pï willapäshushayquitapis wiyacushcanquichu. Tayta Diosmanga manami yäracushcanquipischu. Tayta Dios yanapäshunayquitapis manami munashcanquichu.

Ezequiel 24:13

«Jerusalén, nogaga chaynömi mana pengacuypa pï-maywanpis cacur ganracushayquipita limyuyächiyta munashcä. Chayno ruraptëpis manami limyuyashcanquichu. Limyuyanquipäga rabyasha caycashäta gamcho pascacächiptërämi.

Jeremías 31:18

Wiyashcämi acrashä runacuna llaquicur parlajta. Paycunaga nisha: ‹Nogacunaga goyäcurä manaraj aroj törunömi. Chayno caycajtami gam castigamashpayqui manshuyächimashcanqui. Yapay shuntacamay ari. Gammi canqui nogacunapa Tayta Diosnëga.

2 Crónicas 36:16

Tayta Diospa willacuyninta willapaptinpis pasaypa manacajman churar asiparan. Profëtacunatapis asiparan. Chaymi Tayta Diosga acrashan runacunapaj fiyupa rabyacurcuran. Chaymi runacunaga Tayta Diosman yäracunanpaj manana imata ruraytapis camäpacurannachu.

2 Crónicas 28:22

Fiyupa ñacaycarpis ray Acazga manami Tayta Diosta rispitaranchu.

2 Crónicas 24:21

Chayno niptin Zacariaspa contran parlacuran. Ray «wañuchiy» niptinmi Templupa sawannincho runacuna sajmaran.

1 Reyes 19:14

Chaura pay niran: «Nogaga llapan shongöwanmi gamta sirbishcä munayniyoj Tayta Dios. Israelcunami ichanga conträtuta rurar parlacushayquitapis mana cäsushachu. Altarniquicunatapis juchurgärachisha. Profëtayquicunatapis llapantami wañuchisha. Nogallanami cawaycä. Cananga nogatapis ashiycäman wañuchimänanpaj.»

1 Reyes 19:10

Chaura pay niran: «Nogaga llapan shongöwanmi sirbishcä munayniyoj Tayta Dios. Israelcunami ichanga conträtuta rurar parlacushayquitapis mana cäsushachu. Altarniquicunatapis juchurgärachisha. Profëtayquicunatapis llapantami wañuchisha. Nogallanami cawaycä. Nogatapis ashiycäman wañuchimänanpämi» nir.

Isaías 59:3

Gamcunapaga maquiquipis yawarwan tiñicashami caycan. Dëduyquicunapis runa wañuchejllami. Llullacuyllatami parlanquipis. Shimiquicunapis mana allicunallatami parlan.

Jeremías 46:14

«Egiptucho, Migdolcho, Menfischo, Tafneschöpis cayno willacuy-llapa: ‹¡Ricaj-ricajlla camaricushallana carcaycay! ¡Intëru ñaupayquipanami sabliwan wañuycächin!›

Lamentaciones 4:13

Chaynöga llapanpis casha profëtacuna juchata rurashanpitami, cüracuna fiyupa mana allita rurashanpitami. Paycunaga jinan siudächömi alli runacunata wañuchishpan yawarninta mashtaran.

Ezequiel 22:24

«Runa, gamga Israelcunata cayno niy: ‹Gamcunaga castigashami caycanqui. Tamya manami tamyamunchu. Yacupis manami canchu.

Daniel 9:13

Cay ñacaycunaga llapanmi nogacunaman chayamusha Moisés isquirbishan laycho niycashanno. Chaypis nogacunaga manami gamman ricäramushcächu. Gam nishayquita ruranäpäga manami yarpachacushcächu. Llutan ruraycunallachömi goyashcä.